సల్మాన్ ఖాన్ సినిమాకి కోన వెంకట్ కథను అందిస్తున్నారని విశ్వసనీయ వర్గాల ద్వారా అందిన సమాచారం. వివరాల్లోకి వెళితే ప్రముఖ బాలీవుడ్ నటుడు సల్మాన్ ఖాన్ మొన్నామధ్య సెలబ్రిటీ క్రికెట్ లీగ్ మ్యాచ్ ల ప్రచారం నిమిత్తం ఆంధ్రప్రదేశ్ కు వచ్చాడు. ఆ సందర్భంగా తాను హిందీలో నటిస్తున్న "రెడీ" సినిమాకు కథనందించింది కోన వెంకట్ అని తెలుసుకున్నాడట. వెంటనే కోన వెంకట్ తో భేటీ అయ్యాడు సల్మాన్ ఖాన్. ఈ సందర్భాన్ని పురస్కరించుకుని బాలీవుడ్లో ప్రవేశించాలనుకునే కోన వెంకట్ కు ఇదొక సువర్ణావకాశంగా భావించి, సల్మాన్ తో పూర్తి స్థాయిలో చర్చలు జరిపాడు. ఆ చర్చలు సఫలం అయ్యాయి.

ఫలితంగా సల్మాన్ ఖాన్ నటించబోయే "షేర్ ఖాన్" అనే సినిమాకి కథనందించాల్సిందిగా కోన వెంకట్ ను కోరాడు సల్మాన్ ఖాన్. "షేర్ ఖాన్‍" సినిమాతో డైరెక్టుగా బాలీవుడ్ సినిమాలకు కథలనందించేందుకు సిద్ధమవుతున్నాడు కోన వెంకట్. ఇక మీదట కోన వెంకట్ తెలుగు సినిమాలకు కథలనందించటం కష్టమే. అందుకే అంటారు ఏ క్షణం ఎవరికి ఎలాంటి అదృష్టాన్నందిస్తుందో ఎవరూ చెప్పలేరని.