క్రిస్మస్ కి రామ్ చరణ్ 'గేమ్ ఛేంజర్' (Game Changer), సంక్రాంతికి చిరంజీవి 'విశ్వంభర' (Vishwambhara) విడుదల కానున్నాయని మెగా అభిమానులు ఎంతగానో ఎదురుచూస్తున్నారు. అయితే ఇప్పుడు ఈ రెండు సినిమాల విడుదల తేదీలు మారనున్నట్లు తెలుస్తోంది.

రామ్ చరణ్ (Ram Charan) హీరోగా శంకర్ దర్శకత్వంలో రూపొందుతోన్న చిత్రం 'గేమ్ ఛేంజర్'. ఈ సినిమాని క్రిస్మస్ కానుకగా విడుదల చేయనున్నట్లు ఇప్పటికే నిర్మాత దిల్ రాజు ప్రకటించారు. డిసెంబర్ 20 లేదా 25న విడుదల కానుందని న్యూస్ వినిపించాయి. అయితే ఇప్పుడు 'గేమ్ ఛేంజర్'.. క్రిస్మస్ నుంచి సంక్రాంతికి వాయిదా పడినట్లు సమాచారం.

చిరంజీవి (Chiranjeevi) కథానాయకుడిగా మల్లిడి వశిష్ట డైరెక్షన్ లో రూపొందుతోన్న సోషియో ఫాంటసీ ఫిల్మ్ 'విశ్వంభర' సంక్రాంతి కానుకగా జనవరి 10న విడుదల కావాల్సి ఉంది. అయితే వీఎఫ్ఎక్స్ వర్క్ కి మరింత సమయం కేటాయించాల్సి ఉండటంతో.. సంక్రాంతి నుంచి ఈ చిత్రాన్ని వేసవికి పోస్టుపోన్ చేసినట్లు వినికిడి.

తన తండ్రి చిరంజీవి 'విశ్వంభర' మూవీ సంక్రాంతి రేస్ నుంచి తప్పుకోవడంతో.. సంక్రాంతి సీజన్ పై రామ్ చరణ్ కన్నేసినట్లు తెలుస్తోంది. జనవరి 10న 'గేమ్ ఛేంజర్' థియేటర్లలో అడుగు పెట్టనుందని అంటున్నారు. మామూలు టైంలో కంటే సంక్రాంతి సీజన్ లో స్టార్ హీరోల సినిమాలకు వసూళ్లు ఎక్కువగా వస్తుంటాయి. ఆ రకంగా 'గేమ్ ఛేంజర్'కి ఇది మంచి విడుదల తేదీ అని చెప్పవచ్చు.