టాలీవుడ్ లో ఎన్నిసార్లు చూసినా బోర్ కొట్టని కామెడీ సినిమాల్లో 'సొంతం' ఒకటి. ఆర్యన్ రాజేష్, నమిత జంటగా నటించిన ఈ చిత్రానికి శ్రీనువైట్ల దర్శకుడు. ఆగస్టు 23, 2002 న విడుదలైన ఈ మూవీ ప్రేక్షకులను విశేషంగా ఆకట్టుకుంది. ఇప్పటికీ ప్రేక్షకులను హాయిగా నవ్వుకునేలా చేస్తున్న ఈ చిత్రం నేటితో 20 ఏళ్ళు పూర్తి చేసుకుంది.

'సొంతం' సినిమా హీరోగా ఆర్యన్ రాజేష్ కి రెండోది, దర్శకుడిగా శ్రీనువైట్లకు మూడోది కాగా.. నమితకు హీరోయిన్ గా మొదటి సినిమా కావడం విశేషం. ఈ సినిమా ముగ్గురి కెరీర్ లో ప్రత్యేక స్థానం సంపాదించుకుంది. ఇక ఈ చిత్రంలో సునీల్ పాత్ర గురించి ఎంత చెప్పినా తక్కువే. శేషం పాత్రలో సునీల్ నవ్వులు పూయించాడు. తన కామెడీ టైమింగ్, డైలాగ్ మాడ్యులేషన్ తో 'సొంతం' సినిమా అనగానే ముందుగా సునీల్ పేరు గుర్తొచ్చేలా చేసుకున్నాడు. అలాగే ఈ చిత్రంలో రోహిత్, ఝాన్సీ, ఎంఎస్ నారాయణ, ధర్మవరం, సుబ్రహ్మణ్యం, తనికెళ్ళ భరణి, తెలంగాణ శకుంతల, చిత్రం శ్రీను, అలీ, వేణు మాధవ్, జయప్రకాశ్ రెడ్డి తదితరులు నటించి మెప్పించారు.

దేవిశ్రీప్రసాద్ సంగీతం అందించిన ఈ చిత్రంలోని అన్ని సాంగ్స్ ఆకట్టుకున్నాయి. ముఖ్యంగా 'సొంతం', 'తెలుసునా', 'నాయుడో నాయుడో' సాంగ్స్ విశేష ఆదరణ పొందాయి. జేడీ ఆర్ట్స్ బ్యానర్ పై ఎస్.సోంపల్లి, వి.ఆర్.కన్నెగంటి నిర్మించిన ఈ చిత్రానికి సమీర్ రెడ్డి సినిమాటోగ్రాఫర్ గా వ్యవహరించారు. శ్రీను వైట్ల స్టొరీ, స్క్రీన్ ప్లే అందించిన ఈ సినిమాకి చింతపల్లి రమణ సంభాషణలు రాశారు.