English | Telugu

బోయపాటి శ్రీను దర్శకత్వంలో నాగ చైతన్య.. అక్కినేని మాస్ చూస్తారు..!

బోయపాటి శ్రీను దర్శకత్వంలో నాగ చైతన్య.. అక్కినేని మాస్ చూస్తారు..!

 

అక్కినేని హీరో నాగ చైతన్య రీసెంట్ గా 'తండేల్'తో ప్రేక్షకులను పలకరించాడు. ఫిబ్రవరి 7న విడుదలైన ఈ సినిమా, మంచి వసూళ్లు రాబడుతూ నాగ చైతన్య కెరీర్ లోనే బిగ్గెస్ట్ హిట్ దిశగా దూసుకుపోతోంది. దీంతో అక్కినేని అభిమానులు ఎంతో సంతోషంగా ఉన్నారు. ఇదే జోష్ లో అదిరిపోయే లైనప్ తో అలరించడానికి సిద్ధమవుతున్నాడు చైతన్య. 'తండేల్' తర్వాత 'విరూపాక్ష' ఫేమ్ కార్తీక్ దండు డైరెక్షన్ లో ఓ చేస్తున్నాడు. అనంతరం స్టార్ డైరెక్టర్ బోయపాటి శ్రీనుతో ఓ సినిమా చేయనున్నట్లు తెలుస్తోంది. పైగా ఇది చైతన్యకు 25వ సినిమా కావడం విశేషం. (Naga Chaitanya)

 

బోయపాటి శ్రీను ప్రస్తుతం నందమూరి బాలకృష్ణతో 'అఖండ-2' చేస్తున్నారు. ఈ సినిమా సెప్టెంబర్ 25న ప్రేక్షకుల ముందుకు రానుంది. దీని తర్వాత చైతన్యతో బోయపాటి సినిమా చేసే అవకాశముందని సమాచారం. ఈ ప్రాజెక్ట్ గీతా ఆర్ట్స్ బ్యానర్ లో రూపొందనుందట. (Boyapati Srinu)

 

ఇప్పటికే గీతా ఆర్ట్స్ లో చైతన్య రెండు సినిమాలు చేశాడు. మొదటిది '100% లవ్' కాగా, రెండవది ఇటీవల వచ్చిన 'తండేల్'. ఇప్పుడు బోయపాటి ప్రాజెక్ట్ ఓకే అయితే హ్యాట్రిక్ ఫిల్మ్ అవుతుంది.

 

గీతా ఆర్ట్స్ లో బోయపాటి ఒక సినిమా కమిటై ఉన్నారు. అల్లు అర్జున్ లేదా సూర్య వంటి స్టార్స్ తో ఆ సినిమా ఉంటుందని గతంలో వార్తలొచ్చాయి. కానీ బోయపాటి 'అఖండ-2'తో బిజీ కావడంతో.. ఆ తర్వాత దానికి సంబంధించిన న్యూస్ లేదు. ఇప్పుడు అనూహ్యంగా నాగ చైతన్య పేరు తెరపైకి వచ్చింది. 

 

చైతన్యతో బోయపాటి ఎలాంటి సినిమా చేస్తారోనన్న ఆసక్తి నెలకొంది. గతంలో చైతన్య మాస్ హీరోగా నిలబడాలని ప్రయత్నించాడు. కానీ అవి ఫలించలేదు. మరి ఇప్పుడు బోయపాటి.. మాస్ హీరోగా నిలబడాలనే చైతన్య ఆశను నెరవేరుస్తారేమో చూడాలి.