Home  
Politics

తెలుగువాళ్లుక ఆ హక్కు ఉంది.. వెంకయ్య

తమిళనాడులో తెలుగు నిర్భంధ చట్టం ద్వారా అక్కడ ఉన్న తెలుగు విద్యార్ధులు ఇబ్బందులు పడుతున్న సంగతి తెలిసిందే. అయితే సుప్రీంకోర్టు కూడా తెలుగు విద్యార్దులు తెలుగులోనే పరీక్షలు రాసే విధంగా చూడాలని తమిళనాడు ప్రభుత్వానికి ఆదేశించినా సర్కార్ మాత్రం అదే పట్టించుకోనట్టు కనిపిస్తోంది. ఇప్పుడు ఈ విషయంపై కేంద్రమంత్రి వెంకయ్యనాయుడు స్పందించారు. ఢిల్లీలో ఈరోజు ఆంధ్రా అసోసియేషన్ 2016 క్యాలెండర్‌ను ఆవిష్కరించిన వెంకయ్య మాట్లాడుతూ.. తమిళనాడులో తెలుగు నేర్చుకోకుండా చేయడం దురదృష్టకరమని అన్నారు. సొంత బాష నేర్చుకోవడం రాజ్యాంగం ఇచ్చిన హక్కు అని.. ఒడిశా, మహారాష్ట్ర, తమిళనాడులో ఉన్న తెలుగు విద్యార్ధులకు తెలుగు నేర్చుకునే హక్కు ఉందని స్పష్టం చేశారు. అయితే తమిళనాడులో తెలుగుపై ఆంక్షలు విధించడం శోచనీయమన్నారు.

జమ్మూ కాశ్మీర్ సీఎం మృతి..

జమ్మూ కాశ్మీర్ ముఖ్యమంత్రి ముఫ్తీ మహమ్మద్ సయిూద్ (79) మృతి చెందారు. చాలా కాలంగా ఆనారోగ్యంతో బాధపడుతున్న ముఫ్తీ మహమ్మద్ సయిూద్ ఈరోజు కన్నుమూశారు. అయితే ఇప్పుడు ముఫ్తీ మహమ్మద్ సయిూద్ మృతితో తరువాత సీఎం పదవి ఎవరికి ఇవ్వాలన్న దానిపై చర్చలు జరుగుతున్నాయి. ఈక్రమంలోనే ఆయన కూతురు మహబూబా మఫ్తీని తదుపరి ముఖ్యమంత్రిని చెయ్యడానికి పీడీపీ నాయకులు సిద్దం అవుతున్నారు. అంతేకాదు మహబూబా మఫ్తీని ముఖ్యమంత్రిని చెయ్యడానికి బీజేపీ కూడా మద్దతు తెలిపింది. అయితే గతంలోనే ముఫ్తీ మహమ్మద్ సయిూద్ అనారోగ్యం కారణంగా బాధ్యతలు సరిగా నిర్వర్తించడానికి సమయం లేకపోవడంతో మహబూబా మఫ్తీనే ముఖ్యమంత్రిగా చేయాలని నిర్ణయించారు. కానీ అది అప్పుడు జరగలేదు. ఇప్పుడు ముఫ్తీ మహమ్మద్ సయిూద్ మరణించడంతో మహబూబా ముఫ్తీనే తమ నాయకురాలు అని అంటున్నారు. ఇక ఆయన అంత్య క్రియలు అయిన తరువాత పీడీపీ, బీజేపీ నాయకులు సమావేశం అయ్యి తుది నిర్ణయం తీసుకుంటారని పార్టీనేతలు అంటున్నారు.

దమ్ముంటే నన్ను గెంటేయండి.. శత్రుఘ్న సిన్హా

డీడీసీఏ వ్యవహారంలో అరుణ్ జైట్లీ పై బిహార్ బీజేపీ ఎంపీ కీర్తి ఆజాద్‌ జైట్లీ పై విమర్శు చేసిన సంగతి తెలిసిందే. అంతేకాదు తనపై కూడా పరువునష్టం దావా వేయాలని కూడా సవాల్ విసిరారు. ఇందుకు గాను కీర్తి ఆజాద్‌ బీజేపీ నుంచి సస్పెండ్ చేశారు. ఇప్పుడు అదే పార్టీకి చెందిన మరోనేతకు కూడా ఇలాంటి పరిస్థితే వస్తుందనే సందేహాలు వ్యక్తమవుతున్నాయి. అది ఎవరో కాదు బీజేపీ అసమ్మతి నేత, ఎంపీ శత్రుఘ్నసిన్హా. అరుణ్ జైట్లీ పై ఆరోపణలు చేసిన కీర్తి ఆజాద్‌ ను కీర్తి ఆజాద్‌ను హీరో అని పొగుడుతూ శత్రుఘ్నసిన్హా సంచలన వ్యాఖ్యలు చేశారు. దీంతో ఎంపీ కీర్తి ఆజాద్‌ తరహాలో శత్రుఘ్నపై కూడా బీజేపీ చర్యలు తీసుకునే అవకాశముందని వార్తులు వస్తున్న నేపథ్యంలో వాటికి స్పందించిన శత్రుఘ్న దమ్ముంటే బీజేపీ తనను పార్టీ నుంచి బహిష్కరించాలని.. పార్టీ నుంచి తనను తొలగించినా తన పంథా మారదని.. నేను పార్టీకి వ్యతిరేకంగా ఎలాంటి పని చేయలేదు. అయినా నన్ను వారు పార్టీని గెంటేయాలనుకుంటే గెంటేయ్యవచ్చు అని సవాల్ విసిరారు. అంతేకాదు ఈసందర్భంగా ఆయన న్యూటన్ మూడో సిద్ధాంతాన్ని కూడా గుర్తు చేశారు. నన్ను పార్టీ నుండి గెంటేస్తే చర్యకు తగిన ప్రతి చర్య కూడా ఉంటుందని అన్నారు. మరి శత్రుఘ్నవ్యాఖ్యలకు బీజేపీ ఎలా స్పందిస్తుందో చూడాలి.

చివరి నిమిషం వరకూ అభ్యర్ధులను ప్రకటించకూడదు.. టీఆర్ఎస్

జీహెచ్ఎంసీ అభ్యర్ధుల ఎంపికలో టీఆర్ఎస్ ప్రభుత్వం వ్యూహాత్మంగా వ్యవహరిస్తుంది. చివరి నిమిషం వరకూ అభ్యర్ధులను ప్రకటించకూడదని నిర్ణయం.. అభ్యర్ధికన్నా గుర్తుతోనే ప్రజల్లోకి వెళ్లాలనే యోచిస్తుంది. నామినేషన్ విత్ డ్రా రోజున బీ ఫార్మ్ ఇవ్వనుంది. అంతేకాదు ఇతర రాష్ట్రాల నుండి వచ్చి హైదరాబాద్ లో స్థిరపడ్డ 15 మందికి టికెట్లు ఇవ్వాలని చూస్తుంది. ప్రతి వెయ్యి మందికి ఓ కో అర్డ్ నేటర్ ఏర్పాటు చేసుకోవాలని.. ప్రతి డివిజన్ ఇంఛార్జ్ 40 మంది కార్యకర్తలను సమీకరించుకోవాలి సూచించారు. అంతేకాదు 150 డివిజన్ల ఇంఛార్జ్ లతో కేసీఆర్ ప్రతిరోజు టెలికాన్ఫరెన్స్ నిర్వహించనున్నారు. దీనికి సంబధించి వివిధ సంఘాలతో టీఆర్ఎస్ చర్చలు జరుపుతుంది. మొత్తానికి గ్రేటర్ ఎన్నికల్లో టీఆర్ఎస్ చాలా వ్యూహాత్మంగా ఉన్నట్టు తెలుస్తోంది.

ఇద్దరు ముఖ్యమంత్రులు కలవడం ఇష్టం లేదు.. కేటీఆర్

గతంలో తెలంగాణ ముఖ్యమంత్రి కేసీఆర్.. ఏపీ ముఖ్యమంత్రి చంద్రబాబుల మధ్య పచ్చ గడ్డి వేస్తేనే భగ్గుమనే పరిస్థితి ఉండేది. అయితే కాలం మారుతున్న కొద్ది ఇద్దరు సీఎంలు కూడా మారుతూ.. ప్రస్తుతం ఎలాంటి వాదనలు లేకుండా ఉంటున్నారు. అయితే చంద్రబాబు సంగతేమో కాని.. కేసీఆర్ మాత్రం ఇప్పుడు చాలా జాగ్రత్తగా వ్యవహరిస్తారు. ఎందుకంటే అసలే ఇప్పుడు గ్రేటర్ ఎన్నికలు ఉన్నాయి కాబట్టి. అందుకే గ్రేటర్ ఎన్నికల బాధ్యతను మొత్తం తన భుజాల మీద వేసుకున్న కేటీఆర్ కూడా ఎక్కడ విమర్సించకుండా మాట్లాడుతున్నారు. అంతేకాదు చంద్రబాబు, కేసీఆర్ కలవడంపై ఆసక్తికర వ్యాఖ్యలు చేశారు. ఖైరతాబాద్ లో ఏర్పాటుచేసిన ఓ సమావేశంలో కేటీఆర్ మాట్లాడుతూ ఇద్దరు ముఖ్యమంత్రులు కలవడానికి సుముఖంగానే ఉన్నారని.. కానీ అది కొందరికి నచ్చట్లేదని అన్నారు. అంతేకాదు..తమకు ఎవరి పట్లా ధ్వేషం లేదని.. ఉద్యమ సమయంలో సీమాంధ్రులపై పరుషంగా మాట్లాడామని.. కానీ ఈ 18 నెలల్లో తమ పరిపాలన ఏంటో సీమాంధ్రులు కూడా చూశారని.. అందుకే తామేం చేశామో చూసి ఆత్మవిమర్శ చేసుకుని ఓటేయాలని ఆయన కోరారు. తెలుగు ప్రజలు రాష్ట్రాలుగా విడిపోయినప్పటికీ అన్నదమ్ముల్లాగా కలిసి ఉండాలన్నదే తమ ఆలోచన అని చెప్పారు. మరి అన్నదమ్ముల్లా కలిసి ఉంటామని కేటీఆర్ అంటున్నారు.. అది ఎన్నికలంత వరకేనా.. లేక ఎప్పుడూనా అనేది చూడాలి..

తెలంగాణలో ఏపీ తరహా కాల్ మనీ దందా..

గత కొద్దిరోజుల క్రితమే ఆంధ్రరాష్ట్రంలోని విజయవాడలో కాల్ మని దందా చేసిన అరాచకాలు వెలుగుచూశాయి. వడ్డీకి మనీ ఇచ్చి వాళ్లు తిరిగి చెల్లించని నేపథ్యంలో వాళ్లు ఆస్తులను అక్రమంగా లాక్కుంటూ దందా నడిపేవారు. సుమారు 250 కేసులు నమోదయ్యాయి. ఇప్పుడు తెలంగాణలో కూడా అదే తరహాలో దందా చేస్తున్న వారి వైనం బయటపడింది. హైదరాబాద్ లోని పాతబస్తీలో కాల్ మనీ తరహా వడ్డీ వ్యాపారం చేస్తున్న ఫైనాన్స్ సంస్థలపై దాడి చేసి 86 మందిని పోలీసులు అరెస్ట్ చేశారు. ఇందులో ఇద్దరు మహిళలు కూడా ఉన్నారు. వారిలో 26మందిపై కేసులు నమోదు చేసి మరో 36మందిని విచారిస్తున్నారు. దీనిలో భాగంగానే మరో వంద మంది బాధితులు డిసిపి కార్యాలయానికి వచ్చి ఫిర్యాదు చేశారు.

కవితకు రేవంత్ రెడ్డి కౌంటర్.. మీకు భోళా శంకరుడే..

తెలంగాణ టీడీపీ ఫైర్ బ్రాండ్ రేవంత్ రెడ్డి కేసీఆర్ ను విమర్శించడంలో ఎప్పుడూ ముందుంటారు. ఎప్పటిలాగే ఇప్పుడు కూడా కేసీఆర్ పై విమర్శలు గుప్పించారు. కేసీఆర్ కూతురు కవిత.. కేసీఆర్ ను ఉద్దేశించి తన తండ్రి భోళా శంకరుడు అని వ్యాఖ్యానించింది.. ఇందుకు గాను రేవంత్ రెడ్డి కవితకు కౌంటర్ ఇస్తూ కవితమ్మా! కెసిఆర్ మీ కుటుంబానికే భోళా శంకరుడే అని ఎద్దేవా చేశారు. అంతేకాదు కేసీఆర్ చేసిన యాగంపై కూడా రేవంత్ రెడ్డి విమర్శలు చేశారు. తన పదవిని కాపాడుకోవడం కోసమే కేసీఆర్ ఆయుత చండీయాగం చేశారని అన్నారు. గ్రేటర్ ఎన్నికల కోసం కెసిఆర్ చెప్పే మాటలను ప్రజలు ఎవరూ నమ్మవద్దని.. టిడిపి అధ్యక్షులు నారా చంద్రబాబు నాయుడు కోసం ప్రాణాలు ఇచ్చేందుకు తెలంగాణలో వేలాది మంది ఉన్నారని రేవంత్ రెడ్డి వ్యాఖ్యానించారు.

మోడీకి తీవ్రవాదులతో లింక్‌లు ఉన్నాయి.. అలీ

పంజాబ్ పఠాన్ కోట్ వైమానిక స్థావరంపై ఉగ్రవాదులు దాడి చేసినందుకు గాను పలువురు ప్రధాని మోడీ విమర్శలు చేస్తునే ఉన్నారు. ఇప్పటికే శివసేన, కాంగ్రెస్ పార్టీ నేతలు విమర్శించగా ఇప్పుడు తృణమూల్ కాంగ్రెస్ పార్టీ సీనియర్ నేత, ఎమ్మెల్సీ ఇద్రిస్ అలీ ప్రధాని నరేంద్ర మోడీ పైన తీవ్ర వ్యాఖ్యలు చేశారు. ప్రధాని మోడీకి తీవ్రవాదులతో లింక్‌లు ఉన్నాయని అందుకే పఠాన్‌కోట్ పై తీవ్రవాద దాడి జరిగిందనుకుంటున్నానని, ప్రధాని మోడీ పాకిస్తాన్ పర్యటన తర్వాత ఈ దాడి ఎందుకు జరిగిందని, ఇది నా వ్యక్తిగత అభిప్రాయమని అతను అన్నాడు. అయితే అలీ చేసిన వ్యాఖ్యలకు బీజేపీ నేతల సంగతేమో కానీ ఆ పార్టీ అధ్యక్షురాలు, ముఖ్యమంత్రి మమతాబెనర్జీ ఆగ్రహంతో ఉన్నట్టు తెలుస్తోంది. అలీ చేసిన వ్యాఖ్యలను ఖండిస్తూ.. అలీ ఇలాంటి వ్యాఖ్యలు చేయడం సరికాదని.. తను వ్యాఖ్యలకు సమాధానం చెప్పాలని కోరారు. ఇంకెప్పుడూ ఇలాంటి వ్యాఖ్యలు చేయోద్దని హెచ్చరించింది. మొత్తానికి అలీకి తమ పార్టీ నేతల నుండి వ్యతిరేకత రావడం గమనార్హం.

జయలలిత డిమాండ్.. నోట మాట రాని మోడీ..

తమిళనాడు సీఎం జయలలిత రాజకీయంగా ప్లాన్ వేయడంలో దిట్ట. ప్లాన్ చేయాలంటే ఆమె తరువాతే ఎవరైనా. ఎప్పటిలాగే ఇప్పుడు కూడా కేంద్ర ప్రభుత్వాన్ని ఇరుకున పట్టేలా నిర్ణయం తీసుకున్నారు జయలలిత. మొన్నీ మధ్యనే తమిళనాడులో జరిగే జల్లికట్టు క్రీడపై అనుమతి ఇవ్వాలని కేంద్రాన్నికోరారు. దీనికి కేంద్రం కూడా ఏం చేయాలో తెలియక అనుమతినిచ్చింది. ఇప్పుడు అది అయిపోయిందంటే.. భారీ వర్షాల వల్ల తమిళనాడు చాలా నష్టపోయిందని.. దీనికి గాను రూ.25912 కోట్లు నష్టపరిహారం ఇవ్వాలని డిమాండ్ చేశారు. అక్టోబర్-డిసెంబర్ మధ్య నాలుగు దశల్లో కురిసిన భారీ వర్షాల వల్ల తమ రాష్ట్రంలో 470 మంది మృతి చెందారని తెలిపారు. లక్ష పశువులు మృతి చెందగా.. 382768 హెక్టార్లలో పంట నష్టం జరిగిందని వివరించారు. అంతేకాదు భారీ వర్షాల వల్ల ప్రాణాలు కోల్పోయిన 245మంది కుటుంబాలకు రూ.4 లక్షల చొప్పున సాయమందించినట్టు జయలలిత తెలిపారు. రానున్న రోజుల్లో మిగతా కుటుంబాలకు సాయమందిస్తామన్నారు. మరోవైపు జయలలిత చేసిన డిమాండ్ కు బీజేపీ నేతలు ఆమెపై గుర్రుమంటున్నట్టు తెలుస్తోంది. త్వరలో ఎన్నికలున్నాయి కాబట్టి ప్రజలను ఆదుకుంటున్న పేరుతో కేంద్రాన్ని ఇరుకున పెట్టాలని జయలలిత చూస్తుందని అంటున్నారు. మరోవైపు జయలలిత డిమాండ్ కు మోడీ కి ఏం మాట్లాడాలో తెలియని పరిస్థితిలో ఉన్నారంట. ఈ నేపథ్యంలో జయలలిత ప్లాన్ వర్కవుట్ అవుద్దో లేదో చూడాలి. కానీ మోడీకి జయలలిత మద్దతు ఖచ్చితంగా కావాల్సిందే.. మరి జయలలిత డిమాండ్ కు మోడీ ఏమంటారో..?

మహిళా జర్నలిస్టును చంపిన ఐసిస్... గూఢాచార్యం చేస్తుందని

ఉగ్రవాదుల ఆకృత్యాలకు అంతులేకుండా పోతుంది. రాక్షసత్వంతో ఎంతో మంది అమాయక ప్రజల ప్రాణాలను బలిగొంటున్నారు. కొద్ది రోజుల క్రిందట పారిస్ లో దాడులు జరిపి ప్రజలను భయాందోళనకు గురిచేసిన సిరియా ఇస్లామిక్ స్టేట్ ఉగ్రవాదులు.. ఇప్పుడు మరోసారి రెచ్చిపోయారు. ఓ మహిళా జర్నలిస్టును చంపేశారు. రక్కా ప్రాంతంలోని పౌర జర్నలిస్టుగా పని చేస్తున్న రుఖియా హసన్ అనే మహిళ గూఢచార్యం చేస్తున్నదని ఆరోపిస్తూ  అతి దారుణంగా ఉరి తీసి చంపేశారు. ఈ విషయాన్ని సిరియాలోని సీనియర్ జర్నలిస్టు సంస్థ ‘సిరియా డైరెక్ట్' తెలిపింది. ఇప్పటివరకూ ఉగ్రవాదులు ఐదుగురు విలేకరులను చంపారని ఈ పత్రికలో పేర్కొంది. అంతేకాదు ఇంకా పలు ఆసక్తికర విషయాలు వెలుగు చూస్తున్నాయి. రఖియా హసన్ నిసాన్ ఇబ్రహీం అనే పేరుతో ఉగ్రవాదులు చేసే అరాచకాలను ఫేస్ బుక్ ద్వారా అందరికి తెలిపేదంట. తాను చివరి సారిగా.. నన్ను ఉగ్రవాదులు చంపేస్తానని బెదిరిస్తున్నారు..  వాళ్లు నన్ను చంపేస్తారని.. ఇలా జీవించడం కంటే చనిపోవడం మేలు అని సిరియా మానవహక్కుల సంస్థ (ఆర్బీఎస్ఎస్) వ్యవస్థాపకుడు అబు అహమ్మద్ కు చివరికి సారిగా ట్వీట్టర్ లో వెల్లడించిందట.

ప్రచారంలో చాలా స్లోగా కాంగ్రెస్ పార్టీ..

జీహెచ్ఎంసీ ఎన్నికల్లో గెలవడానికి పార్టీలు చాలా రకాలుగా కష్టపడుతున్నాయి. ఏం చేస్తే ప్రజలు తమ వైపు మొగ్గుతారా అని ఎవరికి తగిన వ్యూహాలు వారు రచించుకుంటున్నారు. అయితే అందరి సంగతేమే కాని ఈ విషయంలో కాంగ్రెస్ పార్టీ మాత్రం కాస్త వెనకబడే ఉన్నట్టు కనిపిస్తుంది. ఇప్పుటికే అధికారపార్టీ.. టీడీపీ-బీజేపీ పార్టీలు సోషల్ మీడియా ద్వారా ప్రచారం చేపట్టి దూసుకుపోతుంటే.. కాంగ్రెస్ ఇప్పుడు సోషల్ మీడియా ప్రచారానికి శ్రీకారం చుట్టింది. దీనికి సంబంధించి గాంధీభవన్ లో సోషల్ మీడియా విభాగాన్ని ఏర్పాటు చేసింది. హైదరాబాద్ కోసం కాంగ్రెస్ పార్టీ చేసిన పలు అభివృద్ది కార్యక్రమాలను సోషల్ మీడియా ద్వారా ప్రచారం చేసి హైటెక్ ఓటర్లను ఆకట్టుకునేందుకు కార్యాచరణ సిద్ధం చేసింది. టీపీసీసీ అధ్యక్షుడు ఉత్తమ్ కుమార్ రెడ్డి నేతృత్వంలోని పార్టీ నేతలు సోషల్ మీడియాలో పార్టీ ప్రచారానికి తీసుకోవాల్సిన చర్యలపై చర్చించారు. ప్రజావ్యతిరేక విధానాలకు పాల్పడుతున్న అధికార టీఆర్ ఎస్ నిజస్వరూపాన్ని సోషల్ మీడియా ద్వారా బయటపెట్టేందుకు సిద్ధమవుతున్నామని ప్రకటించారు. మరి అందరూ ఎప్పుడో మేల్కొని సోషల్ మీడియాను ఉపయోగించుకుంటుంటే.. కాంగ్రెస్ మాత్రం ఇప్పుడు మేల్కొని సోషల్ మీడియాను ఉపయోగించుకుంటుంది. మరి ఇంత స్లోగా ఉన్న కాంగ్రెస్ పార్టీ ప్రచారంలో ఏం దూకుడు చూపిస్తుందో చూడాలి.

మోడీకి నవాజ్ షరీఫ్ ఫోన్.. ఉగ్రవాదులపై చర్యలు తీసుకుంటాం..!

  పంజాబ్ పఠాన్ కోట్ విమాన స్థావరం పై జరిగిన దాడుల నేపథ్యంలో పాకిస్థాన్ ప్రధాని నవాజ్ షరీఫ్.. భారత ప్రధాని నరేంద్ర మోడికీ ఫోన్ చేసినట్టు తెలుస్తోంది. ఈ సందర్బంగా షరీఫ్ పఠాన్ కోట్ పై దాడి చేసిన ఉగ్రవాదులపై కఠినమైన చర్యలు తీసుకుంటామని మోడీకి హామీకి ఇచ్చారంట. ఈ విషయాన్ని ప్రధాని కార్యలయం తెలిపింది. మోడీ కూడా ఉగ్రవాదులపై కఠిన చర్యలు తీసుకోవాలని షరీఫ్ కు చెప్పారంట. అంతేకాదు దానికి సంబంధించి కొంత సమాచారాన్ని కూడా అందించారట. అయితే పఠాన్ కోట్ విమాన స్థావరంపై దాడి చేసిన ఘటనలో ఐఎస్ఐ, జైషే మహ్మద్ సంస్థల ప్రమేయం ఉందన్న కారణంతో.. ఆసంస్థల నేత అయిన మౌలానా మసూద్ ను వెంటనే అరెస్ట్ చేయాలని డిమాండ్ చేస్తున్నారు.

తెలుగు విద్యార్ధుల సమస్యలను పట్టించుకోండి.. కేటీఆర్

అమెరికా వెళ్లే తెలుగు విద్యార్ధులకు ఇమ్మిగ్రేషన్ అధికారులు ద్వారా కష్టాలు ఎదురవుతున్న సంగతి తెలిసిందే. విచారణ పేరిట చాలా మంది విద్యార్దులను ఇమ్మిగ్రేషన్ అధికారులు ఇప్పటికే వెనక్కి పంపించేశారు. అయితే ఇప్పుడు ఈ సమస్యను పరిష్కరించడానికి కేటీఆర్ ముందుకొచ్చారు. ఈ నేపథ్యంలోనే ఆయన అమెరికా కాన్సులేట్ జనరల్ మైఖేల్ ముల్లిన్సను కలిశారు.  ఈ సందర్భంగా కేటీఆర్ అమెరికా వెళ్లి చదవాలనకునే తెలుగు విద్యార్ధులకు ఎదురవుతున్న సమస్యలను పట్టించుకోవాలని మైఖేల్ ముల్లిన్సను కోరారు. చదువుకోసం హైదరాబాద్ నుండే ఎక్కువ మంది విద్యార్ధులు అమెరికా వెళుతున్నారని.. ఎంతో సమయం.. డబ్బు వెచ్చించి వెళుతున్న వారిని తిప్పి పంపడం సమంజసం కాదని తెలిపారు. దీనిపై కేంద్ర విదేశాంగ మంత్రి సుష్మాస్వరాజ్ కు కూడా లేఖ రాస్తామని.. ఇక్కడ వరకైతే ప్రభుత్వ పరంగా మేం చర్యలు తీసుకుంటా.. కాన్సులేట్ పరంగా మీరు చర్యలు తీసుకోండి అని సూచించారట. అంతేకాదు విద్యార్ధులకు నకిలా డాక్యుమెంట్లు ఇవ్వడం వల్లే నష్టపోతున్నారని ముల్లిన్సన్ కు చెప్పడం జరిగిందట. దీనికి ముల్లిన్సన్ సమస్య పరిష్కారానికి మేం కూడా ప్రయత్నిస్తున్నాం.. విద్యార్ధుల నకిలీ డాక్యుమెంట్లు వల్లే సమస్యలు వస్తున్నాయని.. తొందరలోనే సమస్య పరిష్కరిస్తామని భరోసా ఇచ్చారంట.

సిట్ విచారణకు హాజరైన మల్లాది..

కల్తీ మద్యం కేసులో ఏ9 నిందితుడిగా ఉన్న కాంగ్రెస్ పార్టీ సీనియర్ నేత, మాజీ ఎమ్మెల్యే మల్లాది విష్ణు నేడు కృష్ణలంకలోని సిట్ అధికారుల ముందు హాజరయ్యాడు. ఈ సందర్భంగా సిట్ బృందం మల్లాది విష్ణువును విచారిస్తున్నట్టు తెలుస్తోంది. కాగా కల్తీ మద్యం కేసు నమోదైన తరువాత దాదాపు నెల రోజులు మల్లాది అజ్ఞాతంలోకి వెళ్లిన సంగతి తెలిసిందే. అయితే ఇంతకుముందు విచారణకు హాజరుకావాలని నోటీసులు పంపించినా హాజరుకాలేదు. కానీ ఈరోజు కోర్టుకు హాజరుకావాలని ఆదేశించడంతో  మల్లాది విష్ణు అజ్ఞాతం వీడి బయటకు వచ్చారు.

కంటతడి పెట్టిన బరాక్ ఒబామా..

అమెరికా అధ్యక్షుడు బరాక్ ఒబామా కన్నీళ్లు పెట్టుకున్నారు. దేశంలో గన్ కల్చర్ పెరిగిపోతుందని.. అనవసరంగా అమాయక పిల్లలు బలవుతున్నారని అన్నారు. ఈ సందర్భంగా ఆయన మూడేళ్ల క్రితం కనెక్టికట్ లో 20మంది ఎలిమెంటరీ స్కూల్ పిల్లలను ముష్కరులు తుపాకీ గుళ్లకు బలి చేసిన విషయాన్ని గుర్తు చేసుకున్నారు. ఆ విషయం గుర్తు చేస్తూనే ఒబామా కన్నీరు పెట్టుకున్నారు. తుపాకుల వినియోగాన్ని, తుపాకీ హింసను కట్టడి చేయాల్సిన అవసరం ఉందని.. చట్టాల్లో మార్పులు అవసరమని వ్యాఖ్యానించారు. గన్ లైసెన్స్ నియంత్రణ చట్టాలను లాబీ అడ్డుకుంటుంది.. తుపాకుల అమ్మకాల కట్టడికీ కాంగ్రెసు వ్యతిరేకతను పట్టించుకోకుండా కార్యనిర్వాహక ఉత్తర్వులు ఇవ్వాలని ఆయన నిర్ణయించారు.

పంజాబ్ ఉగ్రదాడి.. మన వాళ్ల ప్రమేయం..?

పంజాబ్ పఠాన్ కోట్ విమాన స్థావరంపై ఉగ్రవాదులు దాడి చేసిన సంగతి తెలిసిందే. అయితే ఈ దాడికి సంబంధించి కొన్ని ఆసక్తికర విషయాలు బయటపడుతున్నాయి. ఈ ఉగ్రవాదులు దాడి జరపడానికి మన ఇంటి దొంగల ప్రమేయం ఉందని అనుమానాలు వ్యక్తమవుతున్నాయి. ఈ నేపథ్యంలోనే గురుదాస్ పూర్ ఎస్పీ స్వీందర్ పై అనుమానాలు వ్యక్త చేస్తున్నారు పోలీసులు. ఎస్పీ స్వీందర్ కి జైషెహమ్మద్.. ఐఎస్ఐలతో సంబంధాలున్నట్టు అనుమానిస్తున్నారు. ఇందులో భాగంగా ఎస్పీ అతని మిత్రుడు, వంట మనిషిలను ఎన్ఐఏ విచారణ చేసినట్టు తెలుస్తోంది. మరోవైపు ఐఎస్ఐ అమ్మాయిలను ఎరగా వేసి ఎస్పీని లోబరుచుకున్నారా అన్న దిశగా కూడా విచారణ చేపట్టారు.

పపన్ కోసం టీడీపీ-బీజేపీ ప్రయత్నం..

హైదరాబాద్లో గ్రేటర్ ఎన్నికల్లో వేడి మొదలైంది. గ్రేటర్ ఎన్నిక షెడ్యూల్ విడుదల కాకముందే పార్టీల జోరు పెంచాయి.. ఇప్పుడు షెడ్యూల్ కూడా విడుదలైన పిమ్మట.. కొత్త కొత్త పార్టీ వ్యూహాలతో ప్రజలలోకి వెళుతున్నారు. అయితే ఈ ఎన్నికల్లో టీఆర్ఎస్ పార్టీ బాధ్యతను పూర్తిగా కేటీఆర్ తన భుజాల మీద వేసుకున్నారు. మరోవైపు మిత్రపక్షమైన బీజేపీ-టీడీపీ కూడా గతంలో అత్యధిక స్థానాలు గెలుచుకున్న మాదిరి.. ఈసారి కూడా ఆ ఫలితాలను రాబట్టుకునేందుకు టీడీపీ-బీజేపీ ప్రయత్నిస్తుంది. ఇందులో భాగంగానే ఈసారి ఎన్నికల ప్రచారంలో ఇందులో భాగంగా జనసేన పార్టీ అధ్యక్షులు పవన్ కళ్యాణ్‌తో ప్రచారం చేయించాలని భావిస్తున్నాయి. 2014 సార్వత్రిక ఎన్నికల్లో పవన్ కళ్యాణ్ టీడీపీ-బీజేపీ తరుపున ప్రచారం చేసిన సంగతి తెలిసిందే. పార్టీల గెలుపులో ముఖ్య పాత్ర పవన్ కళ్యాణ్ అన్న విషయం కూడా అందరికి తెలిసిందే. దీంతో ఇప్పుడు  గ్రేటర్‌లోను పవన్ కళ్యాణ్‌తో ప్రచారం చేపిస్తే తమకు లాభిస్తుందని ఈ పార్టీలు భావిస్తున్నాయి. ఇక ఆయనను రంగంలోకి దించేందుకు గాను ఆయనతో మాట్లాడాలని.. ఆయనను కలవడానికి అపాయింట్ మెంట్ కోసం ప్రయత్నిస్తున్నారు. మరి పవన్ కళ్యాణ్ ప్రచారానికి ఓకే చెబుతారో లేదో చూడాలి.

టీడీపీలోకి కాంగ్రెస్ నేత ఎం.మహిధర్ రెడ్డి

తెలంగాణలో టీడీపీ లో ఉన్న కొంతమంది నాయకులు అధికారపార్టీ టీఆర్ఎస్ లోకి చేరుతున్నారు. కానీ ఏపీలో పరిస్థితి మాత్రం వేరు. ఇతర పార్టీ నేతలు అధికార పార్టీ అయిన టీడీపీలోకి చేరడానికి సముఖత చూపుతున్నారు. ముఖ్యమంత్రి చంద్రబాబు నాయుడుపై ఉన్న భరోసా రాజకీయ-పరిపాలన అనుభవం నేపథ్యంలో పలువురు నేతలు సైకిల్ ఎక్కేందుకు మొగ్గుచూపుతున్నారు. ఈ నేపథ్యంలో ఇప్పుడు కాంగ్రెస్ నేత మాజీ మంత్రి ఎం.మహిధర్ రెడ్డి టీడీపీలో చేరనున్నారని సమాచారం.మహిధర్ రెడ్డిని టీడీపీలోకి తీసుకురావడానికి మాజీ మంత్రి ఆదాల ప్రభాకర్ రెడ్డి చొరవ తీసుకుంటున్నట్లు తెలిసింది. అయితే మహిదర్ రెడ్డి తమ పార్టీల్లోకి తీసుకురావాలని వైసీపీ.. టీడీపీలు రెండూ ప్రయత్నించగా మహిందర్ రెడ్డి మాత్రం టీడీపీలోకి రావడానికే సముఖత చూపినట్టు తెలుస్తోంది. సంక్రాంతి పండగ తరువాత మహిధర్ టీడీపీలో చేరవచ్చని భావిస్తున్నారు. గతంలో ఎం.మహిధర్ రెడ్డి మాజీ సీఎం నల్లారి కిరణ్ కుమార్ రెడ్డి కేబినెట్ లో పురపాలక శాఖా మంత్రిగా పనిచేశారు. 

మోడీ పై శివసేన కామెంట్స్.. కప్పు టీ తో ఏడుగురు భారత జవాన్లు మృతి

వివాదాస్పద వ్యాఖ్యలు చేయడంలో శివసేన ఎప్పుడూ ముందుంటుంది. ఇప్పుడు కూడా ప్రధాని నరేంద్రమోడీ పై అలాంటి వ్యాఖ్యలే చేసింది. పంజాబ్ లోని పఠాన్ కోట్ విమాన స్థావరంపై ఉగ్రవాదులు దాడి చేసిన సంగతి తెలిసిందే. దీనిపైన గాను శివసేన తమ అధికార పత్రిక అయిన సామ్నాలో మోడీపై విమర్శలు గుప్పించారు. పాకిస్థాన్ నమ్మరాదని గతంలోనే మోడీని హెచ్చరించామని.. అయినా తమ మాటలను మోడీ లెక్కచేయలేదని.. ఇప్పుడు దానికి తగిన మూల్యం చెల్లించుకోవాల్సి వచ్చిందని అన్నారు. ఇప్పటికైనా మోడీ ప్రపంచాన్ని ఏకం చేసే పనిని మానుకుని భారత్ పై దృష్టి పెట్టాలని ఘాటుగానే సూచించింది. పాకిస్థాన్ ప్రధాని నవాజ్ షరీఫ్ తో కప్పు టీ పంచుకున్నందుకు ప్రతిఫలంగా ఏడుగురు భారత జవాన్లు అమరులయ్యారని విచారం వ్యక్తం చేశారు. మరి శివసేన చేసిన వ్యాఖ్యలకు మోడీ ఎలా రియాక్ట్ అవుతారో చూడాలి.