Home  
Politics

మోడీ విద్యార్హతలపై డౌట్ క్లియర్.. ఎంఏ పొలిటికల్ సైన్స్ చదివారు..

  ప్రధాని నేరంద్ర మోడీ విద్యార్హతలు ఏంటో తెలియజేయాలని ఢిల్లీ ముఖ్యమంత్రి కేజ్రీవాల్ సమాచార కమిషనర్ కు లేఖ రాసిన సంగతి తెలిసిందే. అయితే ఈ ప్రశ్నలకు వారు సమాధానం చెప్పారో లేదో తెలియదు కాని..  గుజరాత్ కు చెందిన 'అహ్మదాబాద్ మిర్రర్' పత్రిక మోదీ విద్యార్హతల వివరాలను బయటపెట్టింది. ఆయన విస్నగర్ లోని ఎంఎన్ సైన్స్ కాలేజీలో ఎంఏ పొలిటికల్ సైన్స్ చదివారని, ఫస్ట్ క్లాస్ లో పాసయ్యారని తెలిపింది. 1983లో 62.3 శాతం మార్కులతో పట్టాను పొందారని వివరించింది. ఆయన చదువుకుంటున్న సమయంలోనే ప్రస్తుత రాష్ట్ర ముఖ్యమంత్రి ఆనందీ బెన్ పటేల్, ఇనార్గానిక్ కెమిస్ట్రీ విభాగంలో ఎంఎస్సీ చేస్తున్నారని, వీరిద్దరి రోల్ నెంబర్ 71 అని పేర్కొంది. మరి కేజ్రీవాల్ గారికి  ఈ వివరాలు సరిపోతాయో లేదో చూడాలి మరి.

అగస్టా పై పారికర్.. 4న అంతా బయట పడుతుంది..

  అగస్టా వెస్ట్ ల్యాండ్ హెలికాఫ్టర్ కుంభకోణంలో సోనియా గాంధీపై ఆరోపణలు వస్తున్న సంగతి తెలిసిందే.  ఈ డీల్ లో కాంగ్రెస్ లోని పలువురు సీనియర్ నేతలకు ముడుపులు అందాయన్న ఆరోపణలు కూడా వస్తున్నాయి. ఈకేసు వ్యవహారంలో ఇప్పటికే మాజీ ఎయిర్ చీఫ్ మార్షల్ త్యాగికి ఈడీ సమన్లు జారీ చేసింది కూడా. అయితే ఇప్పుడు దీనిపై రక్షణ శాఖ మంత్రి మనోహర్ పారికర్ మరో విషయం వెల్లడించారు. 4వ తేదీన పూర్తి వివరాలతో కూడిన దస్త్రాలన్నింటినీ పార్లమెంట్ లో ప్రవేశపెడతానని, దాంతో ఎవరి తప్పెంతన్నది తేలుతుందని ఆయన అన్నారు.   మరోవైపు కాంగ్రెస్ మాత్రం ఈ ఆరోపణలను ఖండిస్తుంది. కాంగ్రెస్ ను ఇరుకున పెట్టేందుకు మరోసారి అగస్టా కుంభకోణాన్ని బీజేపీ వెలుగులోకి తీసుకురాగా, పూర్తి విచారణ జరిపించాలని కాంగ్రెస్ డిమాండ్ చేస్తోంది.

పవన్ పై వర్మ సెటైర్లు... గబ్బర్ సింగ్ కావాలి.. బెగ్గర్ సింగ్ వద్దు..

  ప్రత్యేక హోదాపై జనసేన అధినేత పవన్ కళ్యాణ్ కేంద్రంపై ట్విట్లర్లో ఘాటుగా స్పందించిన సంగతి తెలిసిందే. అయితే ఇప్పుడు పవన్ కళ్యాణ్ వ్యాఖ్యలపై రామ్ గోపాల్ వర్మ స్పందిస్తూ..  మరోసారి తనదైన శైలిలో సెటైర్ వేశారు. పవన్ ప్రత్యేక హోదాపై కేంద్రాన్ని అడుక్కోవడం మానాలని.. పవన్ గబ్బర్ సింగ్ అని, బెగ్గర్ సింగ్ కావొద్దని వివాదాస్పదవ్యాఖ్యలు చేశాడు.  వీరుడు అడుక్కోకూడదని, ఏ కాపులకైతే మీరు పవర్ ఇచ్చారో.. వాళ్లని మీ విన్నపాలతో బీదవాళ్లను చేశారని వ్యాఖ్యానించాడు. అరే కెసిఆర్‌లా నీ తాట తీస్తాననే పవర్ హీరో మాకు కావాలి. విన్నపాలు కోరే పవర్ లేని స్టార్‌లు వద్దని వ్యాఖ్యానించారు. డిమాండ్ చేస్తే ప్రత్యేక హోదా వస్తుంది కాని.. విన్నపాలు చేస్తే ప్రత్యేక హోదా రాదని అన్నారు.

'ప్రధానమంత్రి ఉజ్వల యోజన పథకం’ ను ప్రారంభించిన మోడీ..

  ప్రధాని నరేంద్ర మోడీ మరో వినూత్న పథకానికి శ్రీకారం చుట్టారు. ఉత్తరప్రదేశ్‌ లోని బాలియాలో కొద్దిసేపటి క్రితం 'ప్రధానమంత్రి ఉజ్వల యోజన పథకం’ను ఆయన ప్రారంభించారు. ఈ సందర్బంగా ఆయన మాట్లాడుతూ.. ఈ పథకం ద్వారా దేశంలోని 5 కోట్ల పేద కుటుంబాలకు ఉచితంగా గ్యాస్‌ కనెక్షన్లు అందించనున్నట్టు తెలిపారు. పలువురు మహిళలకు స్వయంగా గ్యాస్‌ కనెక్షన్లు పంపిణీ చేసిన మోదీ, పేదలందరి జీవితాల్లో వెలుగులను నింపే లక్ష్యంతో తమ ప్రభుత్వం మరిన్ని పథకాలను ప్రకటించనుందని వివరించారు. గ్రామాల అభివృద్ధితోనే దేశం ముందడుగు వేస్తుందని తాను నమ్ముతానని అన్నారు.

ఈసారి జయలలితకు ఓటమి తప్పదా..? తమిళనాట కొత్త సర్వే..

  తమిళనాడులో త్వరలో ఎన్నికలు జరగనున్న సంగతి తెలిసిందే. అయితే ఈసారి ఎన్నికలు మాత్రం చాలా వాడీ వేడీగా జరగనున్నట్టు తెలుస్తోంది. ఒకపక్క ఎన్నికల బరిలో సెలబ్రిటీలు ఉండగా, మరోపక్క ఈసారి హిజ్రాలు కూడా పోటీ చేస్తుండటంతో మరి రసవత్తరంగా మారింది. అయితే ఈసారి మాత్రం ముఖ్యమంత్రి జయలలితకు పరాభవం తప్పదని, తదుపరి ప్రజలు డీఎంకేకు పట్టం కట్టనున్నట్టు తెలుస్తోంది. ఈ విషయాన్ని చెన్నై లయోలా కాలేజ్ పూర్వ విద్యార్థులు చెబుతున్నారు. పూర్వవిద్యార్థుల సంఘం సమన్వయకర్త తిరునావుక్కరసు మీడియాతో మాట్లాడుతూ.. మార్చి 29 నుంచి ఏప్రిల్ 28 మధ్య రాష్ట్రవ్యాప్తంగా వేలాది మందిని సర్వేలో భాగంగా ప్రశ్నించామని.. ఈ సర్వేలో జయలలితపై ప్రజల్లో తీవ్ర వ్యతిరేకత ఉందని తెలిసిందని.. సర్వే వివరాలు తెలియజేస్తూ, డీఎంకేకు 124 సీట్లు లాభించనున్నాయని, అన్నాడీఎంకే 90 స్థానాలకు పరిమితం కానుందని వివరించారు.

స్పీకర్ కోడెలను కలిసిన వైసీపీ ఎమ్మెల్యేలు.. చంద్రబాబునాయుడు ప్రోత్సహిస్తున్నారు..

  వైసీపీ పార్టీ నుండి ఎమ్మెల్యేలు ఒకరి తరువాత ఒకరు టీడీపీలోకి జంప్ అవుతున్న సంగతి తెలిసిందే. ఇప్పటికే 16 మంది ఎమ్మెల్యేలు టీడీపీ గూటికి చేరగా.. ఇంకా మరికొంత మంది ఎమ్మెల్యేలు కూడా టీడీపీలోకి రావడానికి ప్రయత్నాలు చేస్తున్నట్టు టాక్. ఈ నేపథ్యంలోనే ఆంధ్రప్రదేశ్ స్పీకర్ కోడెల శివప్రసాద రావును వైయస్సార్ కాంగ్రెస్ పార్టీ ఎమ్మెల్యేలు కలిశారు. వైయస్సార్ కాంగ్రెస పార్టీ నుంచి తెలుగుదేశం పార్టీలో చేరిన 16మంది ఎమ్మెల్యేలపై చర్యలు తీసుకోవాలని.. వారిపై అనర్హత వేటు వేయాలని.. పార్టీ ఫిరాయింపులను టిడిపి అధినేత, ఏపీ సీఎం చంద్రబాబునాయుడు ప్రోత్సహిస్తున్నారని .. అవినీతి సొమ్ముతో ఎమ్మెల్యేలను కొంటున్నారని ఫిర్యాదు చేశారు.

కెనడాలో తెలుగు అమ్మాయిపై కాల్పులు..

  విదేశాల్లో తెలుగువారిపై దాడులు జరగడం చూస్తునే ఉన్నాం. ఇప్పుడు కెనడాలో కూడా ఇలాంటి ఘటనే జరిగింది. కెనడాలో ఓ తెలుగు అమ్మాయి పైన గుర్తు తెలియని దుండగలు కాల్పులు జరిపి దాడి చేశారు. వివరాల ప్రకారం.. హైదరాబాదుకు చెందిన తింత్రియాజాన్‌ కెనడాలోని ఓ ఐటీ కంపెనీలో పనిచేస్తోంది. అయితే ఆమె  ఓ షాపింగ్ మాల్లో వస్తువులు కొనుగోలు చేస్తుండగా.. ఆ సమయంలో దుండగులు ఆమెపై కాల్పులు జరిపారు. ఈ కాల్పుల్లో ఆమెకు తీవ్ర గాయాలవ్వగా ఆస్పత్రకి తరలించి చికిత్స అందిస్తున్నారు. సమాచారం అందుకున్న పోలీసులు వెంటనే ఘటనా స్థలికి చేరుకొని దుండగుడిని గుర్తించేందుకు ప్రత్యేక బృందాలను నియమించినట్లు తెలిపారు. కాల్పుల వెనుక గల కారణాలు ఏమిటన్నది తెలియరాలేదని పోలీసులు చెప్పారు

హైదరాబాద్ మ్యాచ్ కు మళ్లీ వరుణుడి అడ్డంకి..!

  ఐపిఎల్ లో ఎవరికీ లేని అడ్డంకి సన్ రైజర్స్ ను మాత్రం వెంటాడుతోంది. రైజింగ్ పుణే సూపర్ గెయింట్స్ తో జరిగిన గతమ్యాచ్ లో అడ్డు వచ్చిన వరుణుడు, ఈ రోజు బెంగళూరు తో జరిగే మ్యాచ్ కు కూడా వచ్చేశాడు. సాయంత్రం నుంచి మబ్బు పట్టి చల్లగా మారింది హైదరాబాద్ వాతావరణం. ఉప్పల్లో ప్రస్తుతానికి చిన్న జల్లులా వర్షం కొడుతుండటంతో, టిక్కెట్ కొని స్టేడియానికి వచ్చిన ప్రేక్షకులు మ్యాచ్ జరుగుతుందో లేదోనని ఆందోళన చెందుతున్నారు. గత మ్యాచ్ లో వరుణుడి ప్రభావంతో, హైదరాబాద్ ఆడిన ఫస్ట్ ఇన్నింగ్స్ లో బౌలింగ్ కు సహకరించిన పిచ్, పుణే బ్యాటింగ్ సమయానికి బ్యాటింగ్ పిచ్ గా మారిపోయింది. డక్ వర్త్ లూయిస్ పద్ధతిలో పుణే టీం కంఫర్టబుల్ గా గెలిచింది. ఈరోజు బెంగళూర్ తో జరిగే మ్యాచ్ కు కూడా వర్షం వస్తుండటంతో, క్రికెట్ ఫ్యాన్స్ ఆందోళన చెందుతున్నా సిటీజనానికి మాత్రం, మలమల మాడ్చుతున్న ఈ ఎండల కాలంలో, వర్షం రిలీఫ్ ఇస్తోంది. ఇంకా వర్షం కురవాలని సిటీవాసులు కోరుకుంటున్నారు.

ముక్కు, ముక్కు రాస్తూ ప్రణబ్ ముఖర్జీకి ఘన స్వాగతం..

  రాష్ట్రపతి ప్రణబ్ ముఖర్జీ పపువా న్యూ గినియా, న్యూజిలాండ్ పర్యటన చేస్తున్న సంగతి తెలిసిందే. పపువా, న్యూ గినియా పర్యటన ముగిసిన అనంతరం న్యూజిలాండ్ వెళ్లిన ఆయనకు అక్కడి సంప్రదాయాల ప్రకారం మావోరీ పద్ధతిలో ఘన స్వాగతం లభించింది. ప్రత్యేక వస్త్ర ధారణలో ఉన్న మావోరీ వారియర్స్ నృత్యాలు చేశారు. అనంతరం మావోరీ వారియర్స్ కి చెందిన ఒక పురుషుడు, ఒక మహిళ తమ ముక్కులును ప్రణబ్ ముక్కుకు రాస్తూ స్వాగతం పలికారు. అనంతరం ప్రణబ్ ను తీసుకుని అక్కడి గవర్నమెంట్ హౌస్ కు న్యూజిలాండ్ గవర్నర్ జనరల్ సిర్ జెర్రీ మటెపరే వెళ్లారు.

ఐపిఎల్ 2016 : కోల్ కతా విజయ లక్ష్యం 187

ఢిల్లీలో ఈరోజు జరుగుతున్న కోల్ కతా నైట్ రైడర్స్, ఢిల్లీ డేర్ డెవిల్స్ మ్యాచ్ లో గంభీర్ టాస్ గెలిచి ఫీల్డింగ్ ఎంచుకున్నాడు. బ్యాటింగ్ కు దిగిన ఢిల్లీకి వరస వికెట్లతో రసెల్ ఇబ్బందుల్లోకి నెట్టాడు. వన్ డౌన్ బ్యాట్స్ మ్యాన్ గా వచ్చిన సంజూ శామ్సన్(15) కూడా ఆకట్టుకోలేకపోయాడు. కష్టాల్లో ఉన్న ఢిల్లీని కరుణ్ నాయర్ (68, 50 బంతుల్లో), శామ్ బిల్లింగ్ప్ (54, 34 బంతుల్లో) ఆదుకున్నారు. చివర్లో వచ్చిన కార్లోస్ బ్రాత్ వైట్, 11 బంతుల్లో 34 పరుగులతో మెరుపులు మెరిపించడంతో ఢిల్లీ స్కోర్ 186కు చేరింది. కోల్ కతా బౌలర్లలో రస్సెల్, ఉమేష్ యాదవ్ లకు చెరో మూడు, నరైన్ కు ఒక వికెట్ దక్కాయి.

సెలబ్రేటరీ ఫైరింగ్లో పెళ్లి కొడుకుకే గాయాలు..

  పెళ్లి వేడుకల్లో జరిగిన ఫైరింగ్లో పెళ్లి కొడుకుకి తీవ్ర గాయాలయ్యాయి. ఈ ఘటన హర్యాలోని హిసార్ లో చోటుచేసుకుంది. వివరాల ప్రకారం.. హర్యానాలోని హిసార్‌లో సెలబ్రేటరీ ఫైరింగ్ చేయగా.. పెళ్లి కొడుకుకి తీవ్ర గాయాలయ్యాయి. దీంతో అతనిని వెంటనే ఆస్పత్రికి తరలించి చికిత్స అందిస్తున్నారు. వరుడి తండ్రి ఇచ్చిన ఫిర్యాదు మేరకు కేసు నమోదు చేసి దర్యాప్తు జరుపుతున్నట్టు ఎస్సె మణిదీప్ సింగ్ తెలిపారు. కాగా సెలబ్రేటరీ ఫైరింగ్‌పై నిషేధం వున్నప్పటికీ కొంతమంది బడాబాబులు, ధనవంతులు ఈ నిబంధనని తుంగలో తొక్కి కొన్నిసార్లు తమ ప్రాణాలని, ఇంకొన్నిసార్లు ఇతరుల ప్రాణాలని బలితీసుకుంటున్న ఘటనలు తరచు దేశంలో వెలుగు చూస్తూనే వున్నాయి.

ఢిల్లీ క్యాబ్ ఓనర్లకు సుప్రీం ఝలక్.. సీఎన్జీ కార్లకే అనుమతి

  ఢిల్లీలో క్యాబ్ ఓనర్లకు దిమ్మతిరిగే నిర్ణయాన్ని ఒకటి సుప్రీం కోర్టు తీసుకుంది. ఇక నుండి ఢిల్లీలో పెట్రోల్, డీజిల్ క్యాబ్ లను అనుమతించేది లేదని స్పష్టం చేసింది. అయితే గతంలోనే దీనిపై విచారణ జరిపిన సుప్రీం.. ఏప్రిల్ 30 లోగా పెట్రోల్, డీజిలేతర సీఎన్జీ వాహనాలుగా మార్చుకోవాలని ఆదేశించింది. అయితే ఈ గడువును పొడిగించాలని క్యాబ్స్ యాజమాన్యం కోర్టులో పిటిషన్ వేయగా దీనిపై ఈరోజు విచారణ జరిపిన సుప్రీం.. గడువు పెంచేది లేదని.. మే 1నుంచి సీఎన్జీతో ఉన్న క్యాబులను మాత్రమే అనుమతిస్తామంటూ పిటిషన్ కొట్టివేసింది. అయితే, ఆల్ ఇండియా పర్మిట్ ఉన్న వాహనాలకు మాత్రం మినహాయింపునిచ్చింది.

భార్యను అత్యాచారం చేసిన భర్త... ఇంకా ఇద్దరితో..

  మహిళలపై అత్యాచారాలు జరగడం చూస్తూనే ఉంటాం.. కానీ ఒక భర్తే.. భార్యపై అత్యాచారం చేసిన ఘటన యూపీలో జరిగింది. వివరాల ప్రకారం.. యూపీలోని కప్తాన్‌గంజ్ గ్రామంలో బాధిత మహిళ గత రెండు సంవత్సరాల నుంచి తల్లిదండ్రుల వద్దే ఉంటుంది. అయితే నీతో మాట్లాడాలని చెప్పి సమీత తోటకు తీసుకెళ్లి.. భర్తతో పాటు, మరో ముగ్గురు సామూహిక అత్యాచారానికి పాల్పడ్డారు. బాధిత మహిళ ఈ ఘటనపై పోలీసులకు ఫిర్యాదు చేయగా.. కేసు నమోదు చేసుకున్న పోలీసులు దర్యాప్తు చేపట్టారు. అయితే గత సంవత్సరం ఈ మహిళను రాణి లక్ష్మీబాయ్ ధైర్య సాహసాల అవార్డుతో యూపీ ప్రభుత్వం సత్కరించింది.

పవన్ కళ్యాణ్ కూడా దేశద్రోహేనా..?

  నిన్న రాజ్యసభలో ప్రత్యేక హోదా పై జరిగిన చర్చలో కేంద్ర హోంశాఖ సహాయ మంత్రి హెచ్పీ చౌదరి.. ఏపీకి ప్రత్యేక హోదా అవసరం లేదని సంచలన వ్యాఖ్యలు చేయడంతో ఏపీ ప్రజలతో పాటు పలువురు ఆగ్రహం వ్యక్తం చేస్తున్నారు. దీనిపై ప్రత్యేక హోదా సాధన సమాఖ్య అధ్యక్షుడు, హీరో శివాజీ కూడా స్పందిస్తూ కేంద్రం తీరుపై మండిపడ్డారు. రాష్ట్రం ఇక చీకట్లో మగ్గిపోవాల్సిందే అంటూ, మోదీ ప్రత్యేక హోదాపై పెదవి విప్పాలంటూ వ్యాఖ్యానించారు. అయితే శివాజీ చేసిన వ్యాఖ్య‌ల‌పై బీజేపీ ఆంధ్ర‌ప్ర‌దేశ్‌ యువ‌మోర్చా స్పందించి.. శివాజీపై తీవ్ర స్థాయిలో మండిప‌డింది. ‘దేశం నుంచి ఏపీని విడ‌గొట్టాల‌న్న శివాజీపై కేసు న‌మోదు చేయాలి’ శివాజీపై దేశ ద్రోహం కేసుపెట్టాల‌ని పేర్కొంది.     అయితే ఇప్పుడు ప్రత్యేక హోదాపై పవన్ కళ్యాణ్ చేసిన వ్యాఖ్యలకు శివాజీ స్పందిస్తూ.. ‘ప్రత్యేక హోదాపై ప్రశ్నించే వారందరూ దేశద్రోహులేనా? ఈ రోజున పవన్ కల్యాణ్ గారు కూడా ప్రత్యేక హోదాపై ప్రశ్నించారు.. ఆయన కూడా దేశద్రోహేనా?’ అంటూ మండిపడ్డారు. ప్రత్యేక హోదాపై పవన్ కళ్యాణ్ స్పందించడం చాలా సంతోషించదగ్గ విషయమని..  ప్రత్యేక హోదాపై పవన్ చొరవ చూపాలని, బహిరంగ సభ పెట్టాలని కోరారు. పవన్ కల్యాణ్ ఒక్కరు రోడ్డుపైకి వస్తే ఏపీకి ప్రత్యేకహోదా సమస్యకు పరిష్కారం నాలుగు నెలల్లో లభిస్తుందని అభిప్రాయపడ్డారు.

రేవంత్ రెడ్డి వల్లే టీడీపీ సర్వనాశనం..

టీడీపీ నుండి కూకట్ పల్లి ఎమ్మెల్యేగా విజయం సాధించి.. ఆతరువాత టీఆర్ఎస్లో చేరిన మ్మెల్యే మాధవరం కృష్ణారావు రేవంత్ రెడ్డిపై సంచలన వ్యాఖ్యలు చేశారు. టీ టీడీఎల్పీ నేత రేవంత్ రెడ్డి కారణంగానే తెలంగాణలో టీడీపీ సర్వనాశనమైందని.. తన స్వార్థ రాజకీయాలకోసమే ప్రజలను రేవంత్ రెడ్డి ఇబ్బంది పెడుతున్నారని.. రేవంత్ రెడ్డికి ప్రత్యేక భద్రత ఏమీ అవసరం లేదన్న మాధవరం... ప్రజలను రెచ్చగొట్టి ఆయన పబ్బం గడుపుకుంటున్నారని ధ్వజమెత్తారు. మరి మాధవరం మాటలకు రేవంత్ రెడ్డి ఎలా స్పందిస్తారో చూడాలి.

బీహార్ మద్యం నిషేదం.. జార్ఖండ్, ఉత్తరప్రదేశ్లో బిజినెస్ అదుర్స్

  బీహార్లో సంపూర్ణ మద్యపానం నిషేదించిన సంగతి తెలిసిందే. అయితే బీహార్లో నిషేదించడం సంగతేమో కాని.. బీహార్ తో సరిహద్దు పంచుకుంటున్న జార్ఖండ్ లోని పలు జిల్లాల్లో పెద్ద ఎత్తున మద్యం విక్రయాలు పెరిగాయట. ఇప్పుడు తాజాగా ఉత్తరప్రదేశ్లో కూడా మద్యం విక్రయాలు భారీగా పెరిగాయట. ఇది ఎవరో చెబుతున్న విషయం కాదు.. అబ్కారీ శాఖకు చెందిన ఉన్నతాధికారులే ఈ విషయాన్ని వెల్లడిస్తున్నారు. బీహార్లో మద్యం నిషేదించడంవల్ల బీహారీలు యూపీ జిల్లాలోని బల్లియాలోని భరౌలీ గ్రామానికి చెందిన ఓ మద్యం షాపుకు వెళుతున్నారంట. దీంతో రోజు ఆ షాపు జనంతో కిటకిటలాడిపోతుందట. ఆ క్రమంగా మద్యం షాపు విక్రయాలు ఏకంగా 900 శాతం పెరిగాయట. ఆ షాపు ఒక్కటే కాదు.. ఆగ్రామానికి సమీపాన ఉన్న వేరే గ్రామాల్లో కూడా మద్యం విక్రయాలు భారీగా పెరిగాయట. మొత్తానికి బీహార్లో మద్యం నిషేదం జార్ఖండ్, ఉత్తరప్రదేశ్ లకు వర ప్రదాయినిగానే మారిందని చెప్పాలి.

ఎంపీలను తన్ని అడ్డగోలుగా విడగొట్టారు.. పవన్ కళ్యాణ్

ప్రత్యేక హోదాపై జనసేన అధినేత పవన్ కళ్యాణ్ ఘాటుగా స్పందించారు. కాంగ్రెస్ ఘోరమైన తప్పిదం చేసింది.. పార్లమెంట్లో ఎంపీలను బయటకు నెట్టి రాష్ట్రాన్ని విభజించిందిసీమాంధ్ర ప్రజలకు జరిగిన అన్యాయం ఎవరూ మరిచిపోలేరు.. ప్రత్యేక హోదాపై ఘాటుగా స్పందించిన పవన్ కళ్యాణ్ ప్రత్యేక హోదాపై కేంద్రం ఇచ్చిన మాట నిలబెట్టుకోవాలి అని అన్నారు. ప్రజలు రోడ్లపైకి వచ్చి ఉద్యమించే లోపే అధికార, ప్రతిపక్షపార్టీ ఎంపీలు పార్లమెంట్లో ప్రత్యేక హోదాపై పోరాటం చేయాలని తన ట్విట్లర్లో పేర్కొన్నారు.

వైసీపీ నుండి టీడీపీలోకి జంప్ అయిన గొట్టిపాటి ఫ్లెక్సీలు చించివేత.. వారిపనేనా..?

  టీడీపీలో విబేధాలు మరోసారి బయటపడ్డాయి. అద్దంకి ఎమ్మెల్యే గొట్టిపాటి రవికుమార్ మూడు రోజుల క్రితమే టీడీపీలో చేరిన సంగతి తెలసిందే. అయితే గొట్టిపాటి ఎంట్రీని ఎప్పటినుండో వ్యతిరేకిస్తున్న మాజీ ఎమ్మెల్యే కరణం బలరాం, ఆయన కుమారుడు వెంకటేశ్.. గొట్టిపాటి చేరికను అడ్డుకోవడానికి శత విధాలా ప్రయత్నించారు. కానీ చంద్రబాబు స్వయంగా కరణాన్ని పిలిచి బుజ్జగించడంతో వెనక్కి తగ్గారు. అయితే గొట్టిపాటి టీడీపీలోకి చేరినా వారి మధ్య ఉన్న విభేదాలు మరోసారి బయటపడ్డాయి. గొట్టిపాటి టీడీపీలోకి చేరిన సందర్భంగా అద్దంకి టీడీపీ పార్టీ కార్యాలయంలో ఆయన ప్లెక్సీలను ఏర్పాటు చేశారు. అయితే ఈ ప్లెక్సీలను శుక్రవారం రాత్రి గుర్తుతెలియని నిందితులు కొందరు చించివేసారు. దీంతో గొట్టిపాటి వర్గీయులు ఆగ్రహం వ్యక్తం చేస్తూ.. నిరసనగా ఆందోళనకు దిగారు. మరోవైపు ఇది కరణం వర్గీయుల పనే అంటూ కొందమంది అనుమానం వ్యక్తం చేస్తున్నారు.

ట్రంప్ కు చేదు అనుభవం.. కారు దగ్ధం

  అమెరికా అధ్యక్ష పదవి రేసులో ఉన్న డొనాల్డ్ ట్రంప్ కు వివాదాస్పద వ్యాఖ్యలు చేయడం కొత్తేం కాదు. ఒక రకంగా చెప్పాలంటే ఆ వ్యాఖ్యలే ఆయనకు ప్లస్ పాయింట్ అని కూడా చెప్పొచ్చు. అయితే ఒక్కోసారి మాత్రం అవి బెడిసికొడతాయి. తాజాగా ట్రంప్ కు అదే జరిగింది. కాలిఫోర్నియా ప్రచారంలో భాగంగా అక్కడికి వెళ్లిన ట్రంప్ కు చేదు అనుభవం ఎదురైంది.  తాను అమెరికా అధ్యక్షుడిగా ఎన్నికైతే లక్షలాది మంది అక్రమ వలసదారులను వెనక్కి పంపిస్తానని డొనాల్డ్‌ ట్రంప్‌ చేసిన వ్యాఖ్యలపై మెక్సికన్ లు నిరసనలు చేపట్టి..  ఆయన ప్రచారం నిర్వహిస్తున్న ప్రాంతానికి సమీపంలో రోడ్లను దిగ్బంధించి ట్రాఫిక్‌ నిలిపేశారు. పోలీసుల కారును ధ్వంసం చేశారు. దీంతో ఘర్షణ వాతావరణం నెలకొంది. పరిస్థితి అదుపుచేసేందుకు పోలీసులు 20 మందిని అరెస్టు చేశారు.