ఆర్జే కాజల్ మీద యాంకర్ రవికి ఒక రేంజ్‌లో కోపం వచ్చింది. కానీ, కంట్రోల్ చేసుకున్నాడు. బహుశా... కోప్పడితే మహిళా ప్రేక్షకులకు దూరం అవుతానని అనుకున్నాడేమో! గతంలో లహరి, ప్రియ ఇష్యూలో తాను అన్న మాటలను అనలేదని అనడం, తర్వాత నాగార్జున ఆధారాలతో సహా చూపించడంతో చాలా బ్యాడ్ అయ్యాడు. అందుకు క్షమాపణలు కోరాడనుకోండి. ఇక, లేటెస్ట్ ఇష్యూకు వస్తే...

'బిగ్‌బాస్ 5' మంగళవారం ఎపిసోడ్‌లో రవి, లోబో దగ్గరకు వచ్చి 'ఈ రోజు డిన్నర్‌కు ఏం చేస్తున్నారు?' అని కాజల్ అడిగింది. వాళ్లు ఏదో చెప్పబోతుండగా... "నిన్న గొడవ జరిగింది దేనికంటే? రవి, లోబో వాష్‌రూమ్ నుండి డిన్న‌ర్‌కు రావ‌డానికి" అంటూ ఆట పట్టించాలని అనుకుంది. కానీ, అక్కడ సీన్ రివర్స్ అయ్యింది. ఇన్‌డైరెక్ట్‌గా కాజ‌ల్‌కు లోబో మిడిల్ ఫింగ‌ర్ చూపించాడు. ఆ విషయం కాజల్ ఇతర సభ్యులతో చెప్పగా 'నాకు అలా ఎవరైనా చూపిస్తే కట్ చేసి పారేస్తా' అని ప్రియాంక చెప్పింది. ఈలోపు రవి, లోబో అక్కడికి వచ్చారు.

'నేను సరదాగా అన్నాను' అని కాజల్ సర్దిచెప్పుకోవడానికి ప్రయత్నించింది. 'నీకు సరదా ఏమో! అవతలి వ్యక్తికి కాదు. అది తెలుసుకోకుండా ఎలా వస్తారు? నా నోటి నుండి తప్పుడు మాటలు వస్తాయేమో అని కంట్రోల్ చేసుకున్నా' అని రవి సీరియస్ అయ్యాడు. తర్వాత కాజల్, రవి మధ్య మాట మాట పెరిగి ఒకరి మీద మరొకరు అరుచుకున్నారు. లోబో మిడిల్ ఫింగర్ చూపించడం ప్రాబ్లమ్ కాదా? అని రవిని కాజల్ ప్రశ్నించింది. దీన్ని శ్రీరామచంద్ర పరిష్కరించడానికి ప్రయత్నించాడు.