English | Telugu
విజయ్ దేవరకొండపై అసభ్యకర వార్తలు ప్రసారం చేసిన వ్యక్తి అరెస్ట్!
Updated : Dec 13, 2023
విజయ్ దేవరకొండపై తాజాగా అసభ్యకర వార్తలు ప్రసారం చేసిన ఓ వ్యక్తిని పోలీసులు అరెస్ట్ చేశారు. అనంతపురంకు చెందిన వెంకట కిరణ్ అనే వ్యక్తి కొన్ని రోజుల క్రితం విజయ్ సినిమాలకు సంబంధించి అసభ్యకర వార్తలను ప్రసారం చేశాడు. సినీ పోలీస్ అనే యూట్యూబ్ ఛానల్ వేదికగా విజయ్ ను అవమానిస్తూ అసత్యపు వార్తలను ప్రసారం చేశాడు. విజయ్ గౌరవాన్ని కించపరిచే విధంగా ఉండటంతో పాటు, ఆయన సినిమాలలోని హీరోయిన్ లను అవమానిస్తూ చేసిన ఈ యూట్యూబ్ వీడియోలను.. విజయ్ టీం పోలీసుల దృష్టికి తీసుకెళ్లగా వారు వెంటనే స్పందించి సదరు వ్యక్తి ఆచూకీని తెలుసుకున్నారు.
కేసు నెంబర్: 2590/2023 గా ఎఫ్.ఐ.ఆర్ నమోదు చేసుకుని దర్యాప్తు చేసిన పోలీసులు సదరు వ్యక్తిని అరెస్ట్ చేశారు. అతనికి కౌన్సిలింగ్ ఇచ్చి ఆ వీడియోలని, ఛానల్ ని డిలీట్ చేయించారు. అంతేకాదు భవిష్యత్ లో ఇలాంటివి చేయకుండా ఉండే విధంగా చర్యలు తీసుకున్నారు. ఇది మాత్రమే కాదు టార్గెటెడ్ గా ఎవరు వ్యాఖ్యలు చేసినా, సామాజిక మాధ్యమాలలో అవమానిస్తున్నట్లు వార్తలు ప్రసారం చేసినా కఠినమైన చర్యలు తీసుకుంటామని పోలీసులు హెచ్చరించారు.