నేడు మాటల మాంత్రికుడు, గురూజీ అయిన త్రివిక్రమ్ శ్రీనివాస్ పుట్టిన రోజు. అప్పుడే పుట్టిన బిడ్డ ని ఆప్యాయంగా చూస్తూ తల్లి ,ఎదిగిన కొడుకుని చూసి గర్వంతో తండ్రి పొందే ఆనందం ఎలా ఉంటుందో ఆయన మాటలు ,సినిమాలు కూడా అంతే ఆనందాన్ని ఇస్తాయి. ఈ సినిమా త్రివిక్రమ్ సినిమా అనే ఒక బ్రాండ్ ని ఆయన ప్రేక్షకుల దృష్టిలో ఏర్పాటు చేసుకున్నాడు.ఈ నవంబర్ 7 తో 52 సంవత్సరాలని పూర్తి చేసుకుంటున్న త్రివిక్రమ్ కి మన తెలుగు వన్ నుంచి బర్త్ డే విషెస్..

త్రివిక్రమ్ శ్రీనివాస్ అసలుపేరు ఆకెళ్ళ నాగ శ్రీనివాస్ శర్మ. ఎమ్ ఏ న్యూక్లియర్ ఫిజిక్స్ లో గోల్డ్ మెడలిస్ట్ సాధించిన ఆయన తన కలానికి పెట్టుకున్న త్రివిక్రమ్ అనే పేరుతో కొన్ని దిన పత్రికలకి రచనలని రాయడం ప్రారంభించాడు. నెలకి 3000 వేల రూపాయల జీతంతో ప్రముఖ టెలివిజన్ ఛానల్ ఈటీవీ లో సినిమాలకి సంబంధించిన ప్రోగ్రామ్స్ కి కంటెంట్ రైటర్ గా కూడా త్రివిక్రమ్ వర్క్ చేసాడు. ఆ తర్వాత ప్రముఖ సినిమా రైటర్ పోసాని కృష్ణ మురళి, దర్శకులైన ముత్యాల సుబ్బయ్య ,ఈవివి సత్యనారాయణ, బి.గోపాల్ లాంటి దిగ్గజాల దగ్గర అసిస్టెంట్ రైటర్ గా త్రివిక్రమ్ పనిచేసాడు.
1992 వ సంవత్సరంలో వేణు తొట్టెంపూడి హీరోగా వచ్చిన స్వయంవరం అనే మూవీతో డైలాగ్ రైటర్ గా త్రివిక్రమ్ శ్రీనివాస్ తన సినీ ప్రస్థానాన్ని ప్రారంభించాడు. ఆ సినిమా విజయానికి తివిక్రమ్ మాటలే ప్రధాన కారణం అనేది అక్షర సత్యం. అక్కడ నుంచి ఆయన మాటల గిలిగింతల ప్రవాహంలో తెలుగు సినిమాతో పాటు తెలుగు సినీ ప్రేక్షకులు ప్రవహిస్తూనే ఉన్నారు. చిరునవ్వుతో, మల్లేశ్వరి, నువ్వే కావాలి, నువ్వు నాకు నచ్చావ్ , జై చిరంజీవ, మన్మధుడు ఇలా ఎన్నో సినిమాలకి తన మాటల సుగంధాలని అద్ది ప్రేక్షకుల దృష్టిలో ఆ సినిమాల పరిమళం నేటికీ వెదజిల్లుతూనే ఉండేలా చేసాడు.

వెండి తెర మీద ఆయన ప్రభావం కేవలం మాటలతోనే ఆగకుండా దర్శకుడిగా కూడా 2002 లో తరుణ్ హీరో గా వచ్చిన నువ్వే నువ్వే అనే సినిమాతో ప్రారంభం అయ్యింది. ఇక అక్కడ నుంచి త్రివిక్రమ్ వెనక్కి తిరిగి చూసుకునే అవసరం రాలేదు. అతడు,జల్సా, ఖలేజా, జులాయి ,అత్తారింటికి దారేది, సన్ అఫ్ సత్య మూర్తి, అరవింద సమేత, అల వైకుంఠ పురంలో ఇలా ఎన్నో సినిమాలతో తెలుగు సినిమా ప్రేక్షకుల కుటుంబ సభ్యుడు గా త్రివిక్రమ్ మారాడు. ఆయన తన ప్రతి సినిమాని కూడా అన్ని వర్గాల ప్రేక్షకులకి నచ్చే విధంగా తెరకెక్కిస్తాడు. ఆయన సినిమాలోని హీరో హీరోయిన్ లు ప్రేక్షకులకి ఎంతగా నచ్చుతారో ఆయన సినిమాలోని విలన్ కూడా అంతే స్థాయిలో ప్రేక్షకులకి నచ్చుతాడు. పొదుపు మాటలతో భారీగా నవ్వించే త్రివిక్రమ్ కి మరో సారి మన తెలుగు వన్ తరుపున జన్మదిన శుభాకాంక్షలు చెప్తూ త్రివిక్రమ్ సర్ మహేష్ బాబు హీరోగా మీరు తెరకెక్కిస్తున్న గుంటూరు కారం మూవీ అఖండ విజయం సాధించాలని అలాగే మీరు మరిన్ని మంచి సినిమాలని ప్రేక్షకులకి అందించాలని కోరుకుంటూ గురూజీ ఒన్స్ ఎగైన్ హ్యాపీ బర్త్ డే .