రేవతి దర్శకత్వంలో బాలీవుడ్ కి నటి స్నేహ వెళ్ళనుందని సమాచారం. వివరాల్లోకి వెళితే హీరోయిన్ స్నేహకు తెలుగులో అవకాశాలు తగ్గటంతో దాదాపు కనుమరుగయ్యే స్థితిలో ప్రస్తుతం ఆమె సినీ కెరీర్ ఉంది. అందుకే ఆమె బాలీవుడ్ వైపు తన దృష్టి మళ్ళించింది. ఆ దిశలో భాగంగా హిందీలో "మ్యాడ్ డాడీ" అనే చిత్రంలో నటించటానికి అంగీకరించింది. హీరోయిన్ గా మాత్రం కాదులెండి. హీరోయిన్ ఆయేషా టకియాకి తల్లి పాత్రలో నటి స్నేహ నటించటానికి అంగీకరించింది.

ఈ చిత్రానికి ప్రముఖ నటి రేవతి దర్శకత్వం వహిస్తారు. ఈ చిత్రంలో నటి స్నేహ ప్రముఖ నటుడు నసీరుద్దీన్ షా సరసన అతని భార్యగా నటించనుంది. అంటే ఆయేషా టకియాకి స్నేహ, నసీరుద్దీన్ షా తల్లిదండ్రులుగా నటిస్తారన్న మాట. ఇక ఈ చిత్ర దర్శకురాలు గతంలో తెలుగులో విక్టరీ వెంకటేష్ సరసన "ప్రేమ" అనే చిత్రంలో హీరోయిన్ గా నటించింది. ఈ చిత్రానికి సంబంధించిన వివరాలు ఇంకా తెలియాల్సి ఉంది.