ప్రస్తుతం మాస్ మహారాజా రవితేజ కెరీర్ ఒక హిట్, రెండు ఫ్లాప్ లు అన్నట్టుగా సాగుతుంది. 'క్రాక్'తో సూపర్ హిట్ అందుకున్న ఆయన.. 'ఖిలాడీ', 'రామారావు ఆన్ డ్యూటీ' సినిమాలతో నిరాశపరిచాడు. ఆ తర్వాత 'ధమాకా'తో బ్లాక్ బస్టర్ అందుకోగా.. 'రావణాసుర', 'టైగర్ నాగేశ్వరరావు' సినిమాలు నిరాశపరిచాయి. ముఖ్యంగా ఇటీవల విడుదలైన 'టైగర్ నాగేశ్వరరావు'పై ఆయన ఎన్నో ఆశలు పెట్టుకోగా.. ఆ సినిమా అంచనాలను అందుకోలేక బాక్సాఫీస్ దగ్గర చేతులెత్తేసింది. దీంతో తన తదుపరి చిత్రం 'ఈగల్'తో లెక్క సరిచేయాలని చూస్తున్నాడు మాస్ రాజా.

రవితేజ హీరోగా 'సూర్య వర్సెస్ సూర్య' ఫేమ్ కార్తీక్ ఘట్టమనేని దర్శకత్వంలో రూపొందుతోన్న చిత్రం 'ఈగల్'. "ఒక వ్యక్తి చుట్టూ ఇన్ని కథలేంటి? ఒక వ్యక్తికి ఇన్ని అవతరాలేంటి?" అంటూ కొద్ది నెలల క్రితం విడుదల చేసిన టైటిల్ అనౌన్స్ మెంట్ వీడియోతోనే ఈ సినిమా అందరి దృష్టిని ఆకర్షించింది. ఇక తాజాగా విడుదలైన టీజర్.. సినిమాపై అంచనాలను అమాంతం పెంచేసింది.

ఈగల్ టీజర్ ను సోమవారం ఉదయం విడుదల చేశారు. "కొండలో లావాని కిందకి పిలవకు. ఊరూ ఉండదు, నీ ఉనికీ ఉండదు" అంటూ రవితేజ వాయిస్ తో టీజర్ ప్రారంభమైంది. ఆ వాయిస్ వచ్చే సమయంలో టీజర్ లో శవాలు కుప్పలుగా పడి ఉండటం గమనించవచ్చు. దానిని బట్టి రవితేజ పాత్ర ఎంత పవర్ ఫుల్ గా ఉండబోతుందో అర్థం చేసుకోవచ్చు. "అడవిలో ఉంటాడు. నీడై తిరుగుతుంటాడు. కనిపించడు.. కానీ వ్యాపించి ఉంటాడు", "వెలుతురు వెళ్ళే ప్రతి చోటుకి వాడి బులెట్ వెళుతుంది" వంటి పవర్ ఫుల్ డైలాగ్స్ తో రవితేజ పాత్ర తీరుని తెలిపిన విధానం బాగుంది. టీజర్ లో విజువల్స్, బ్యాక్ గ్రౌండ్ స్కోర్ అదిరిపోయాయి. పొడవాటి జుట్టు, గుబురు గడ్డం, మీసకట్టుతో లుంగీ ధరించి ఉన్న రవితేజ లుక్ కూడా వావ్ అనిపిస్తుంది. ఇక టీజర్ లో "జనాలకు కట్టుకథ. ప్రభుత్వాలు కప్పెట్టిన కథ" అని చెప్పడం చూస్తుంటే.. ఇది యదార్థ సంఘటనల ఆధారంగా రూపొందుతోన్న సినిమా అనిపిస్తోంది. అడవిలో ఉండి విధ్వంసం సృష్టించిన ఆ ఈగల్ ఎవరు? అతని కథ ఏంటో తెలియాలంటే కొద్దిరోజులు ఆగాల్సిందే.

మొత్తానికి ఈగల్ టీజర్ సూపర్బ్ గా ఉంది. అందుకే సంక్రాంతి బరిలో ఎన్ని సినిమాలున్నా.. తమ సినిమా మీదున్న నమ్మకంతోనే ఈగల్ టీమ్ వెనకడుగు వేయడం లేదని టీజర్ తో క్లారిటీ వచ్చేసింది. ఈ సినిమా 2024, జనవరి 13న విడుదల కానుంది.