మారుతి దర్శకత్వంలో రెబల్ స్టార్ ప్రభాస్ ఓ సినిమా చేస్తున్న విషయం తెలిసిందే. పీపుల్ మీడియా ఫ్యాక్టరీ నిర్మిస్తున్న ఈ చిత్రం అధికారిక ప్రకటన రాకుండానే సైలెంట్ గా షూటింగ్ జరుపుకుంటోంది. అయితే 'బాహుబలి'తో పాన్ ఇండియా క్రేజ్ సొంతం చేసుకొని, వరుస భారీ బడ్జెట్ సినిమాలు చేస్తున్న ప్రభాస్.. ఎక్కువగా యంగ్ హీరోలతో కామెడీ ఫిల్మ్స్ చేసే మారుతితో సినిమా చేస్తుండటం అందరినీ ఆశ్చర్యపరిచింది. అదే సమయంలో ఇందులో ప్రభాస్ రోల్ ఎలా ఉంటుంది? లుక్ ఎలా ఉంటుంది? అని తెలుసుకోవాలనే ఆసక్తి నెలకొంది. అయితే తాజాగా ప్రభాస్ రోల్, లుక్ పై క్లారిటీ వచ్చేసింది.

ప్రభాస్ యాక్షన్ హీరో అయినప్పటికీ ఆయన కామెడీ టైమింగ్ ని ఇష్టపడేవారు ఎందరో ఉన్నారు. ముఖ్యంగా 'బుజ్జిగాడు', 'డార్లింగ్' వంటి సినిమాలలో ఆయన తన కామెడీ టైమింగ్ తో ప్రేక్షకులను ఫిదా చేశారు. ప్రభాస్ కామెడీ టైమింగ్ మిస్ అవుతున్నామని, మళ్ళీ ఆయన ఆ తరహా రోల్స్ చేస్తే బాగుంటుందని ఎందరో ఫ్యాన్స్ కోరుకుంటున్నారు. అయితే మారుతి సినిమాతో వారి కోరిక తీరనుంది.

ప్రభాస్-మారుతి సినిమాలో మహేష్ ఆచంట ఓ పాత్ర పోషిస్తున్నాడు. తాజాగా ఓ ఇంటర్వ్యూలో పాల్గొన్న మహేష్.. ప్రభాస్ మంచి మనసు గురించి, మారుతి సినిమాలో ఆయన పాత్ర గురించి ఆసక్తికర వ్యాఖ్యలు చేశాడు. షూటింగ్ లో ఎంతమంది ఉంటే అంతమందికి ప్రభాస్ అన్న భోజనం తెప్పిస్తారని చెప్పాడు. చాలా రోజుల తర్వాత చెక్ షర్ట్స్ వేసుకొని ఓ మంచి కామెడీ రోల్ చేస్తున్నారని తెలిపాడు. అలాగే ఇందులో ప్రభాస్ అన్న లుక్.. అచ్చం 'అన్ స్టాపబుల్' షోలో పాల్గొన్నప్పటి లుక్ లాగా ఉంటుందని రివీల్ చేశాడు.