బాహుబ‌లి విడుద‌ల ఎప్పుడు? వెండి తెర‌పై ప్ర‌భాస్ విశ్వ‌రూపాన్ని మ‌ళ్లీ చూసేదెప్పుడు? ఇంకెంత కాలం బాహుబ‌లిని చెక్కుతారు? ప్ర‌భాస్ అభిమానుల ముందున్న ప్ర‌శ్న‌లు ఇవే. ఏప్రిల్ లో వ‌స్తుంద‌నుకొన్న బాహుబ‌లి ఆ త‌ర‌వాత మేకు వాయిదా ప‌డింది. తర‌వాత జూన్ అన్నారు. ఇప్పుడు జూన్‌లోనూ బాహుబ‌లి రావ‌డం క‌ష్ట‌మేన‌ని విశ్వ‌స‌నీయ వ‌ర్గాల స‌మాచారం. ప్ర‌భాస్ ఫ్యాన్స్ ఈ ఆల‌స్యాన్ని త‌ట్టుకోలేక‌పోతున్నారు. విజువ‌ల్ ఎఫెక్ట్స్‌కి సంబంధించిన ప‌నులు ఇంకా ఓ కొలిక్కి రాలేద‌ని 50 శాతం సినిమాకి ఇంకా విజువ‌ల్ ఎఫెక్ట్స్ పూర్త‌వ‌లేద‌ని తెలుస్తోంది. ఈనేప‌థ్యంలో ఈ సినిమా పూర్తికావ‌డానికి ఇంకా రెండు నెల‌ల స‌మ‌యం ప‌డుతుంద‌ట‌. బాహుబ‌లి రిలీజ్ డేట్ ఇదీ అని క‌చ్చితంగా ఒక‌టి చెప్పొచ్చుగా అనేది ప్ర‌భాస్ అభిమానుల మాట‌. అస‌లే ఇప్ప‌టికే ఈ సినిమాపై భారీ అంచ‌నాలున్నాయి. ఆల‌స్యం చేస్తే.. సినిమాపై అది ప్ర‌తికూల ప్ర‌భావం చూపించే అవ‌కాశం ఉంది. ఇప్ప‌టికే రెండేళ్ల పాటు ప్ర‌భాస్ అభిమానులు నీరీక్ష‌ణ‌లో ప‌డిపోయారు. ఇక ఆల‌స్యం చేయ‌లేమంటున్నారు ఫ్యాన్స్‌. అయితే ఈ సినిమా విడుద‌ల ఎప్పుడ‌నేది ప్ర‌భాస్ చేతుల్లోనూ లేదు. అది రాజ‌మౌళి, విజుల‌వ్ ఎఫెక్ట్స్ నిపుణులూ చూసుకోవాల్సిన విష‌యం. రాజ‌మౌళి మాత్రం ఈ సినిమా విడుద‌ల విష‌యంలో ఏమాత్రం కంగారు ప‌డ‌డం లేదు. అస‌లే భారీ బ‌డ్జెట్‌తో తెర‌కెక్కిన సినిమా. రిలీజ్ డేట్ కూడా ప‌క్కాగానే ఉండాలి అనుకొంటున్నారాయ‌న‌. అందుకే ఆల‌స్య‌మైనా.. ఓపిగ్గా ఈ సినిమాని తీర్చిదిద్దుతున్నారు. మ‌రి ఆ చెక్కుడు కార్య‌క్ర‌మం ఎప్పుడు పూర్త‌వుతుందో రాజ‌మౌళినే చెప్పాలి.