సంపూర్ణేష్ బాబు టైటిల్ రోల్ పోషించిన తాజా చిత్రం 'మార్టిన్ లూథర్ కింగ్'. వైనాట్ స్టూడియోస్, రిలయన్స్ ఎంటర్‌టైన్‌మెంట్ సమర్పణలో మహాయాన మోషన్ పిక్చర్స్ నిర్మించిన ఈ చిత్రానికి పూజ కొల్లూరు దర్శకత్వం వహించారు. ఈ సినిమాలో వి.కె. నరేష్, వెంకటేష్ మహా ముఖ్యపాత్రలు పోషించారు. 'కేరాఫ్ కంచరపాలెం', 'ఉమామహేశ్వర ఉగ్రరూపస్య' చిత్రాలతో దర్శకుడిగా ఆకట్టుకున్న వెంకటేష్ మహా.. ఈ చిత్రానికి స్క్రీన్ ప్లే, డైలాగ్స్ అందించడంతో పాటు క్రియేటివ్ ప్రొడ్యూసర్ గా వ్యవహరించడం విశేషం. వినోద ప్రధానంగా రూపొందిన ఈ రాజకీయ వ్యంగ్య చిత్రం అక్టోబర్ 27న విడుదల కానుంది.

'మార్టిన్ లూథర్ కింగ్' ట్రైలర్ ను బుధవారం సాయంత్రం విడుదల చేశారు. కనీసం తన పేరేంటో కూడా తెలియని చెప్పులు కుట్టే వ్యక్తిగా సంపూర్ణేష్ బాబు పాత్రను పరిచయం చేస్తూ ట్రైలర్ ప్రారంభమైంది. అతనికి 'మార్టిన్ లూథర్ కింగ్' అనే పేరు పెట్టడం ఆసక్తికరంగా ఉంది. అతను నివసించే గ్రామంలో ఎన్నికలు వస్తాయి. ప్రత్యర్థులు నరేష్, వెంకటేష్ మహా ఎలాగైనా గెలవాలని పోటీ పడతారు. గెలుపుకోసం విశ్వప్రయత్నాలు చేస్తారు. అయితే గెలుపుని నిర్ణయించే ఒక్క ఓటు మార్టిన్ లూథర్ కింగ్(సంపూర్ణేష్ బాబు)ది కావడంతో.. ఒక్క రాత్రిలో అతని జీవితం మలుపు తిరుగుతుంది. ఓటు విలువని తెలియ జేస్తూనే వినోదభరితంగా సాగిన ఈ ట్రైలర్ ఆకట్టుకుంటోంది. "వాడుకోవడం చేతకానప్పుడు స్వతంత్రం ఉంటే ఎంత లేకపోతే ఎంత?" వంటి డైలాగ్ లు ఆలోచింపజేసేలా ఉన్నాయి. ట్రైలర్ లో సంగీతం, కెమెరా పనితనం కూడా ఆకట్టుకున్నాయి.

ఇప్పటికే తెలుగు రాష్ట్రాల్లోని పలు నగరాల్లో ముందస్తు ప్రీమియర్‌ షోలను ప్రదర్శించగా ప్రేక్షకుల నుంచి విశేష స్పందన లభించింది. ట్రైలర్, ప్రీమియర్స్ కి వస్తున్న రెస్పాన్స్ చూస్తుంటే కంటెంట్ బేస్డ్ ఫిల్మ్ తో సంపూ అదిరిపోయే హిట్ కొట్టేలా ఉన్నాడు.