English | Telugu
ప్రిన్స్ హీరోగా సుకుమార్ స్క్రిప్ట్ రెడీ
Updated : Nov 30, 2011
ప్రిన్స్ మహేష్ బాబు హీరోగా లెక్కల మాస్టారు సుకుమార్ దర్శకత్వంలో ఒక సినిమా తయారయ్యేందుకు రంగం సిద్ధమవుతూంది. దాని తాలూకు స్క్రిప్ట్ వర్క్ కోసం దర్శకుడు సుకుమార్ అండ్ గ్యాంగ్ గోవాకి వెళ్ళి ఇటీవలే హైదరాబాద్ వచ్చారు. అంటే దానర్థం ఆ చిత్రం తాలూకు స్క్రిప్ట్ దాదాపు రెడీ అయ్యిందని. నాగచైతన్య, తమన్నా జంటగా నటించిన "100%లవ్" చిత్రం హిట్టయి తర్వాత సుకుమార్ దర్శకత్వం వహించబోయే చిత్రం ఇదే గనుక ఈ సినిమా మీద అంచనాలు భారీగానే ఉంటాయి.
అందులోనూ మహేష్ బాబు హీరో అనే సరికి ఆ అంచనాలు మరింత భారీగా ఉంటాయని కచ్చితంగా చెప్పవచ్చు. మహేష్ బాబు "దూకుడు" బ్లాక్ బస్టర్ హిట్టయిన తర్వాత పూరీ జగన్నాథ్ తో "బిజినెస్ మ్యాన్"సినిమా చేస్తున్నారు. ఈ సినిమా తర్వాత 2012 మార్చిలో సుకుమార్, మహేష్ బాబుల కాంబినేషన్ లో సినిమా ప్రారంభమయ్యే అవకాశాలున్నాయని ఫిలిం నగర్ వర్గాలంటున్నాయి.