సూపర్ స్టార్ రజినీకాంత్.. ఈ పేరే ఒక బ్రాండ్. ప్రపంచవ్యాప్తంగా భారీ స్థాయిలో అభిమానులున్న లెజండరీ యాక్టర్ గా తలైవాకి ప్రత్యేక ఇమేజ్ ఉంది. అలాంటి స్టార్ పైనే భారీ కుట్ర జరిగిందిప్పుడు. ప్రస్తుతం ఎక్కడ చూసినా ఇదే చర్చ. ఇంతకీ ఏం జరిగిందంటే..

రజినీకాంత్ కొత్త సినిమా 'జైలర్' ఇటీవల ప్రేక్షకుల ముందుకొచ్చిన సంగతి తెలిసిందే. మిశ్రమ స్పందన తెచ్చుకున్న ఈ సినిమా.. వరల్డ్ వైడ్ గా భారీ కలెక్షన్స్ రాబడుతోంది. దాదాపు రూ. 600 కోట్ల గ్రాస్ ఆర్జించిన ఈ సినిమా.. తమిళనాట ఇండస్ట్రీ హిట్ గా నిలిచింది. అంతేకాదు.. రిలీజై 20 రోజులు దాటినా ఇప్పటికీ వసూళ్ళ జోరు తగ్గడం లేదు. ఇంకా మరికొద్ది రోజులు జైలర్ హవాకి తిరుగుండదని ట్రేడ్ వర్గాలు భావిస్తున్న సమయంలో.. అనూహ్యంగా మంగళవారం (ఆగస్టు 29) నుండి హెచ్.డి. ప్రింట్ పలు పైరసీ సైట్లలో ప్రత్యక్షమైంది.

ఏకంగా 10 జీబీ సైజుతో, స్పష్టమైన క్వాలిటీతో, డాల్బీ సౌండ్ తో ఈ హెచ్.డి. ప్రింట్ ఆన్ లైన్ లో హల్ చల్ చేస్తోంది. ఒరిజినల్ గా తమిళ్ వెర్షన్ లోనే ఈ ప్రింట్ వచ్చినా.. దాన్ని ఇతర భాషల సౌండ్ మిక్స్ చేసి మరీ వీక్షకులకు అందించే ప్రయత్నం జరిగింది. ఇదంతా రాత్రికి రాత్రే జరగడం ఫ్యాన్స్ కి షాక్ కి గురిచేస్తోంది. ఉద్దేశపూర్వకంగా జరిగిన భారీ కుట్ర ఇదని.. పైరసీ చేసిన వాడిని వదిలిపెట్టకూడదని తలైవా అభిమానులు డిమాండ్ చేస్తున్నారు.

ఈ పైరసీ కారణంగా.. ఓటీటీ, శాటిలైట్ ప్రీమియర్లను గ్రాండ్ గా ప్లాన్ చేసుకున్న సన్ నెక్స్ట్ కి వ్యూస్, టీఆర్పీ పరంగా ప్రభావం చూపే అవకాశముందని కలవరపడుతున్నారు రజినీ ఫ్యాన్స్. అలాగే జపాన్, మలేసియా దేశాల్లోనూ రిలీజ్ కావాల్సిన జైలర్ కి.. కలెక్షన్ల పరంగా ఈ పైరసీ భూతం పెద్దగండి కొట్టినట్టేనని వారు అభిప్రాయపడుతున్నారు. ఏదేమైనా.. రజినీకాంత్ సినిమాపై జరిగిన ఈ భారీ హెచ్.డి. కుట్ర.. టాక్ ఆఫ్ ఇండస్ట్రీ అవుతోంది.