గత కొన్నేళ్లుగా పవర్‌స్టార్‌ ఫ్యాన్స్‌ ఎంతో ఈగర్‌గా వెయిట్‌ చేస్తున్న భారీ చిత్రం ‘హరిహర వీరమల్లు’ జూలై 24న థియేటర్లలో సందడి చేయబోతోంది. ఇంతకుముందు ఈ సినిమాకి సంబంధించిన టీజర్‌ సెన్సేషన్‌ క్రియేట్‌ చేసింది. దాదాపు మూడు నిమిషాల నిడివి ఉన్న ట్రైలర్‌ని తాజాగా రిలీజ్‌ చేశారు. జూలై 3న ప్రేక్షకులు, అభిమానుల సమక్షంలో ఎంతో గ్రాండ్‌గా ట్రైలర్‌ విడుదలైంది. ఇప్పటివరకు ఈ సినిమా గురించి ప్రేక్షకులు ఊహించింది వేరు. ఈ ట్రైలర్‌ ఉన్న తీరు వేరు. సినిమా ఇంత గ్రాండియర్‌గా ఉండబోతోందా అని అందరూ ఆశ్చర్యపోయేలా ఉంది ట్రైలర్‌. దీంతో ఒక్కసారిగా సినిమాపై ఉన్న ఎక్స్‌పెక్టేషన్స్‌ రెట్టింపు అయ్యాయి. ఇప్పటివరకు పవన్‌కళ్యాణ్‌ చెయ్యని ఒక విభిన్నమైన క్యారెక్టర్‌ ప్రేక్షకుల్ని, అభిమానుల్ని విపరీతంగా ఆకట్టుకునేలా ఉంది. యాక్షన్‌ సీక్వెన్స్‌లు, బ్యాక్‌గ్రౌండ్‌ స్కోర్‌ స్టాండర్డ్స్‌ హై లెవల్‌లో ఉన్నాయి.

మెగా సూర్య ప్రొడక్షన్స్‌ పతాకంపై ఎ.ఎం.రత్నం, ఎ.దయాకర్‌రావు నిర్మించిన ఈ సినిమాకు మొదట అనుకున్న దర్శకుడు క్రిష్‌. కొంతభాగం షూటింగ్‌ జరిగిన తర్వాత కొన్ని కారణాల వల్ల క్రిష్‌ ఈ ప్రాజెక్ట్‌ నుంచి తప్పుకున్నారు. అప్పుడు ఎ.ఎం.రత్నం తనయుడు, దర్శకుడు జ్యోతికృష్ణ ఈ సినిమాను పూర్తి చేశారు. ట్రైలర్‌ చూస్తే జ్యోతికృష్ణ కష్టం స్పష్టంగా తెలుస్తోంది. సినిమాను ఒక రేంజ్‌లో తెరకెక్కించారన్న ఫీల్‌ అందరికీ కలుగుతోంది. యాక్షన్‌ సీక్వెన్స్‌లలో పవన్‌కళ్యాణ్‌ ఇంతకుముందెన్నడూ చేయని రిస్కీ షాట్స్‌ చాలా చేశారు. ఈ ఫైట్‌ సీన్స్‌కి థియేటర్‌లో ఫ్యాన్స్‌ రెస్పాన్స్‌ మామూలుగా ఉండదని చెప్పడంలో ఎలాంటి సందేహం లేదు. బుర్రా సాయిమాధవ్‌ రాసిన డైలాగులు ఈ ట్రైలర్‌లో ప్రత్యేక ఆకర్షణగా నిలుస్తున్నాయి.

‘హిందువుగా జీవించాలంటే పన్ను కట్టాల్సిన సమయం.. ఈ దేశం మా బాద్‌షా పాదాల కింద నలిగిపోతున్న సమయం.. ఒక వీరుడి కోసం ప్రకృతి పురుడు పోసుకుంటున్న సమయం..’
‘ఇది నేను రాసే చరిత్ర.. సింహాసనమా? మరణ శాసనమా?’
‘ఈ భూమ్మీద ఉన్నది ఒక్కటే కోహినూర్‌.. దాన్ని కొట్టి తీసుకు రావడానికి తిరుగులేని రామబాణం కావాలి..’
ఇప్పటి వరకు మేకల్ని వేటాడే పులిని చూసుంటారు.. ఇప్పుడు పులుల్ని వెంటాడే బెబ్బులిని చూస్తారు..’
‘నేను రావాలని చాలా మంది ఆ దేవుడికి దండం పెట్టుకుంటూ ఉంటారు. కానీ, నేను రాకూడదని మీరు చూస్తున్నారు..’ వంటి షార్ప్‌ డైలాగ్స్‌తో ట్రైలర్‌ ఒక రేంజ్‌లో ఉంది. సినిమా ఎవరూ ఊహించని రేంజ్‌లో ఉంటుంది అనేది ట్రైలర్‌ చూస్తే అర్థమవుతుంది. గ్రాండ్‌గా కనిపించే విజువల్స్‌, కొత్తగా అనిపించే యాక్షన్‌ సీక్వెన్స్‌లు, ఎం.ఎం.కీరవాణి మార్కు బ్యాక్‌గ్రౌండ్‌ స్కోర్‌.. ఇవన్నీ సినిమాపై భారీ అంచనాలను ఏర్పరుస్తున్నాయి. ఈ సినిమాలో ఔరంగజేబు పాత్ర చాలా కీలకంగా కనిపిస్తోంది. మొదట ఈ క్యారెక్టర్‌ను ఓ బాలీవుడ్‌ నటుడు పోషించాడు. జ్యోతికృష్ణ దర్శకత్వ బాధ్యతలు తీసుకున్న తర్వాత ఆ క్యారెక్టర్‌ కోసం బాబీ డియోల్‌ను తీసుకున్నారు. ఔరంగజేబు క్యారెక్టర్‌ను రీ షూట్‌ చేశారని తెలుస్తోంది. పలు కారణాల వల్ల ఇప్పటివరకు చాలా సార్లు ఈ సినిమాను వాయిదా వేశారు. విఎఫ్‌ఎక్స్‌ వర్క్‌ సంతృప్తికరంగా లేకపోవడం వల్లే రిలీజ్‌ లేట్‌ అయిందని యూనిట్‌ చెప్పింది. ట్రైలర్‌ చూసిన తర్వాత అది నిజమే అనిపిస్తోంది. ఎందుకంటే విజువల్స్‌ చాలా అద్భుతంగా వచ్చాయి. ఇదంతా జ్యోతికృష్ణ కృషేనని చెబుతున్నారు. రెండు భాగాలుగా రాబోతున్న ఈ సినిమా మొదటి పార్ట్‌కి ‘స్వార్డ్‌ వర్సెస్‌ స్పిరిట్‌’ అనే ట్యాగ్‌లైన్‌ పెట్టారు. ఏది ఏమైనా మరో 20 రోజుల్లో పవన్‌ కళ్యాణ్‌ ప్రపంచవ్యాప్తంగా సెన్సేషన్‌ క్రియేట్‌ చేయబోతున్నారని ట్రైలర్‌ చూస్తే అర్థమవుతుంది.