ఐకాన్ స్టార్ అల్లు అర్జున్, స్టార్ డైరెక్టర్ సుకుమార్ కాంబినేషన్ లో వచ్చిన పుష్ప మొదటి భాగం 'పుష్ప: ది రైజ్' పాన్ ఇండియా రేంజ్ లో సత్తా చాటింది. పెద్దగా అంచనాల్లేకుండా విడుదలై నార్త్ లోనూ సంచలన వసూళ్లు సాధించింది. ఈ సినిమాలోని బన్నీ మ్యానరిజమ్స్ కి, సాంగ్స్ కి సెలబ్రిటీలు సైతం ఫిదా అయ్యారు. దీంతో రెండో భాగంగా రానున్న 'పుష్ప: ది రూల్'పై పాన్ ఇండియా రేంజ్ లో భారీ అంచనాలు ఉన్నాయి. ఈ సినిమా నుంచి వచ్చే ఒక్కో అప్డేట్ ఆ అంచనాలను మరింత పెంచేస్తోంది.

అల్లు అర్జున్ పుట్టినరోజు సందర్భంగా ఈ ఏప్రిల్ లో విడుదలైన ఫస్ట్ లుక్, 'వేర్ ఈజ్ పుష్ప' గ్లింప్స్ ఆకట్టుకున్నాయి. ముఖ్యంగా తిరుపతి గంగమ్మ జాతర సాంప్రదాయానికి అద్దంపడుతూ అర్థనారీశ్వర రూపంలో ఉన్న బన్నీ ఫస్ట్ లుక్ కట్టిపడేసింది. ఇక తాజాగా పుష్ప-2 నుంచి ఫహాద్‌ ఫాజిల్‌ లుక్ రివీల్ అయింది. 'పుష్ప-1'లో తెరమీద కనిపించింది కాసేపే అయినప్పటికీ 'పార్టీ లేదా పుష్ప' అంటూ భన్వర్‌ సింగ్‌ షెకావత్‌ గా ఫహాద్‌ ఫాజిల్‌ ఎంతలా మ్యాజిక్ చేశారో తెలిసిందే. ఇప్పుడు 'పుష్ప-2'లో పుష్పరాజ్ ని ఢీకొట్టే పాత్రలో చాలా పవర్ ఫుల్ గా కనిపించనున్నారు. ఫహాద్‌ ఫాజిల్‌ పుట్టినరోజు(ఆగస్టు 8) సందర్భంగా తాజాగా పుష్ప-2 నుంచి ఆయన ఫస్ట్ లుక్ ని రిలీజ్ చేశారు. సిగరెట్ తాగుతూ.. నల్ల కళ్ళద్దాలు, గుండుతో ఉన్న ఆయన పవర్ ఫుల్ లుక్ ఆకట్టుకుంటోంది. ఈ చిత్రాన్ని 2024 ఏప్రిల్ లో విడుదల చేయడానికి సన్నాహాలు చేస్తున్నారు.