విశ్వక్ సేన్ హీరోగా నటించి దర్శకత్వం వహించిన చిత్రం 'దాస్ కా ధమ్కీ'. ఉగాది కానుకగా నిన్న(మార్చి 22న) విడుదలైన ఈ సినిమా డివైడ్ టాక్ సొంతం చేసుకుంది. అయినప్పటికీ మొదటి రోజు వసూళ్లు మాత్రం రికార్డు స్థాయిలో వచ్చాయి. ఈ సినిమా విశ్వక్ సేన్ కెరీర్ లో అత్యధిక ఓపెనింగ్స్ రాబట్టింది. అతని గత చిత్రాలు 'అశోకవనంలో అర్జున కళ్యాణం', 'ఓరి దేవుడా' ఫుల్ రన్ లో రూ.5-6 కోట్ల రేంజ్ లో షేర్ రాబట్టగా.. 'దాస్ కా ధమ్కీ' మాత్రం మొదటిరోజే రూ.4 కోట్లకు పైగా షేర్ వసూలు చేసి సత్తా చాటింది.

ట్రేడ్ వర్గాల అంచనా ప్రకారం మొదటి రోజు నైజాంలో రూ.91 లక్షల షేర్, సీడెడ్ లో రూ.43 లక్షల షేర్, ఆంధ్రాలో రూ.1.72 కోట్ల షేర్ వసూలు చేసిన దాస్ కా ధమ్కీ.. తెలంగాణ, ఆంధ్రప్రదేశ్ లో కలిపి రూ.3.06 కోట్ల షేర్(రూ.5.85 కోట్ల గ్రాస్) రాబట్టింది. రెస్టాఫ్ ఇండియా రూ.40 లక్షల షేర్, ఓవర్సీస్ లో రూ.62 లక్షల షేర్ కలిపి మొదటి రోజు ప్రపంచవ్యాప్తంగా రూ.4.08 కోట్ల షేర్(రూ.8.20 కోట్ల గ్రాస్) కలెక్ట్ చేసింది. మూవీ ఓవరాల్ థియేట్రికల్ బిజినెస్ వాల్యూ రూ.7.5 కోట్లు కాగా మొదటి రోజే సగానికి పైగా రాబట్టడం విశేషం. ఈ వీకెండ్ లోనే ఈ చిత్రం బ్రేక్ ఈవెన్ సాధించి విజయాన్ని అందుకునేలా ఉంది.

'దాస్ కా ధమ్కీ'కి ఈస్థాయి ఓపెనింగ్స్ రావడానికి పలు కారణాలు ఉన్నాయి. ఈ సినిమాలో రెండు పాటలు పెద్ద హిట్ అయ్యాయి. ట్రైలర్స్ మాస్ ప్రేక్షకులను ఆకట్టుకున్నాయి. ప్రీరిలీజ్ ఈవెంట్ కి జూనియర్ ఎన్టీఆర్ చీఫ్ గెస్ట్ గా రావడం కూడా కలిసొచ్చింది. అన్నింటికంటే ముఖ్యంగా ఉగాది కావడంతో ప్రేక్షకులు పెద్ద ఎత్తున థియేటర్లకు కదిలారు. ప్రస్తుతం థియేటర్లలో స్టార్ హీరోల సినిమాలు లేకపోవడం, చెప్పుకోదగ్గ కమర్షియల్ సినిమా ఇదొక్క కావడంతో ప్రేక్షకులు ఎక్కువగా ఈ సినిమా చూడటానికి ఆసక్తి చూపించారు. అవన్నీ కలిసొచ్చి 'దాస్ కా ధమ్కీ'కి ఫస్ట్ డే అదిరిపోయే కలెక్షన్స్ వచ్చాయి.