మెగాస్టార్ ఇంటి ముందు అభిమానుల ధర్నా చేశారు. వివరాల్లోకి వెళితే ఇటీవల మెగాస్టార్, పద్మభూషణ్, డాక్టర్ చిరంజీవి "ఇక మీదట నేను పూర్తిస్థాయి రాజకీయాల్లోనే ఉంటూ ప్రజా సేవ చేస్తాను. సినిమాల్లో నటించను" అని అన్నారు. ఈ స్టేట్ మెంట్ అశేషంగా ఉన్న మెగాభిమానులను బాగా కలవరపరిచింది. మొన్నటి వరకూ మెగాస్టార్ నటించబోయే 150 వ సినిమాకి ఆయన కుమారుడూ, మెగా పవర్ స్టార్ రామ్ చరణ్ తేజ నిర్మాతగా వ్యవహరిస్తారనీ, ఆ సినిమా కథ కూడా సిద్ధమయ్యిందనీ వినపడింది. ఉన్నట్టుండి చిరంజీవి "సినిమాల్లో నటించను" అనగానే అభిమానులకు ఆ మాట శరాఘాతంలా తగిలింది.

దాంతో మెగా స్టార్ అభిమానులు జూన్ 30 వ తేదీన, మెగాస్టార్ ఇంటి ముందు ధర్నా నిర్వహించారు. "అన్నయ్యా ఒక్క సినిమా" అంటు వారు నినదించారు. అప్పుడే అటుగా వచ్చిన మెగా బ్రదర్ నాగబాబుని ఈ విషయమై అన్నయ్య చిరంజీవికి నచ్చచెప్పాల్సిందిగా వారు ఆయన్ని కోరారు. అందుకాయన స్పందిస్తూ " నేను మీలాగే అన్నయ్య అభిమానిని. మా అబ్బాయ్ రామ్ చరణ్ నేను ఈ విషయమై అన్నయ్యతో మాట్లాడాలనుకుంటున్నాం. కనీసం 150 వ నిమా అయినా చేయ్యాలని అన్నయ్యను గట్టిగా అడగాలనుకుంటున్నాం. నాకు ఒక రెండు రోజులు టైమిస్తే అన్నయ్యతో ఈ విషయమై మాట్లాడి అన్నయ్య కనీసం ఒక్క సినిమాలోనైనా నటించేలా వొప్పించటానికి ప్రయత్నిస్తాను" అని వారికి హామీ ఇచ్చారు.