2021లో విడుదలైన ‘పుష్ప’ ఎంతటి సంచలనం సృష్టించిందో అందరికీ తెలిసిందే. ఈ సినిమా సాధించిన విజయం, అల్లు అర్జున్‌ పొందిన నేషనల్‌ అవార్డు ‘పుష్ప2’పై బాధ్యతను మరింత పెంచాయి. దానికి తగ్గట్టుగానే సుకుమార్‌ చాలా కేర్‌ తీసుకొని, ఎంతో టైమ్‌ తీసుకొని సినిమాని పూర్తి చేస్తున్నారు. ఆగస్ట్‌ 15న ‘పుష్ప2’ రిలీజ్‌ చేస్తామని ఎప్పుడో ప్రకటించినప్పటికీ ఆ టైమ్‌ వచ్చేసరికి సినిమా పనులు పూర్తి కాకపోవడంతో రిలీజ్‌ని వాయిదా వేశారు. ఎట్టకేలకు డిసెంబర్‌ 6న చిత్రాన్ని రిలీజ్‌ చేయబోతున్నట్టు ప్రకటించారు. ‘పుష్ప2’ రిలీజ్‌కి ఒకరోజు ముందే ప్రీమియర్లు వేసేందుకు ప్లాన్‌ చేస్తున్నారు. ఈ సినిమాకి సంబంధించి రెండు పాటలు మినహా షూటింగ్‌ పూర్తయింది. కొంత ప్యాచ్‌ వర్క్‌ కూడా బ్యాలెన్స్‌ ఉందని తెలుస్తోంది. వచ్చే నెల బ్యాలెన్స్‌ ఉన్న పాటల్ని చిత్రీకరిస్తారు. అందులో ఒక ఐటమ్‌ సాంగ్‌ కూడా ఉంది. జాన్వీ కపూర్‌, దీప్తి తిమ్రి, శ్రద్ధాకపూర్‌ పేర్లు పరిశీలనలో ఉన్నాయి. ఎవరితో ఆ ఐటమ్‌ సాంగ్‌ చెయ్యాలి అనే విషయంలో ఓ నిర్ణయం త్వరలోనే తీసుకుంటారు. 

ఇదిలా ఉంటే.. పుష్ప సిరీస్‌లో మూడో భాగం కూడా ఉందని చిత్ర యూనిట్‌ గతంలోనే ప్రకటించింది. అయితే దీనికి సంబంధించి ఓ ట్విస్ట్‌ ఇచ్చారు సుకుమార్‌. 2021లో పుష్ప రిలీజ్‌ అయితే పుష్ప2 రిలీజ్‌ అవ్వడానికి మూడేళ్ళు పడుతోంది. అయితే పుష్ప2 రిలీజ్‌ అయిన వెంటనే మూడో భాగం షూటింగ్‌ మొదలుపెట్టే అవకాశం లేదని తెలుస్తోంది. ఎందుకంటే ఆ గ్యాప్‌లో అల్లు అర్జున్‌ ఒక సినిమా, సుకుమార్‌ ఒక సినిమా చెయ్యాల్సి ఉంది. ఈ రెండు సినిమాలు పూర్తయిన తర్వాతే పుష్ప3 స్టార్ట్‌ చేస్తారని తెలుస్తోంది. దీన్నిబట్టి ఈ సినిమా స్టార్ట్‌ కావడానికి మరో రెండు సంవత్సరాలు ఈజీగా పడుతుంది. ఎందుకంటే బన్నీ మరో సినిమా చెయ్యాలంటే లుక్‌ పూర్తిగా మార్చుకోవాలి. ఆ సినిమా పూర్తి చేసి పుష్ప గెటప్‌లోకి రావాలంటే చాలా టైమ్‌ పడుతుంది. అలాగే షూటింగ్‌ పూర్తి చేసి సినిమాను రిలీజ్‌కి రెడీ చెయ్యాలంటే మరో రెండు సంవత్సరాలు పడుతుంది. దీన్నిబట్టి పుష్ప3 థియేటర్స్‌కి రావడానికి నాలుగైదు సంవత్సరాలు పట్టే అవకాశం ఉంది. అన్ని సంవత్సరాలు సినిమా కోసం వెయిట్‌ చెయ్యాలంటే ఏదైనా బలమైన రీజన్‌ ఉండాలి. అందులో భాగంగానే మూడో పార్ట్‌పై ఆడియన్స్‌లో క్యూరియాసిటీని పెంచేందుకు ఒక అద్భుతమైన క్లిప్‌ హ్యాంగర్‌ను ప్లాన్‌ చేశారట సుకుమార్‌. దాన్ని కూడా చాలా కొత్తగా తీశారని తెలుస్తోంది. ఇప్పటికే దీనికి సంబంధించిన షూటింగ్‌ పూర్తయింది. పుష్ప క్లైమాక్స్‌లో వదిలిన క్లిప్‌ హ్యాంగర్‌ వల్లే సెకండ్‌ పార్ట్‌పై ఆసక్తి మరింత పెరిగింది. ఏది ఏమైనా పుష్ప2 రిలీజ్‌ అయిన తర్వాత మూడో పార్ట్‌ సంగతి ఆడియన్స్‌ తాత్కాలికంగా మర్చిపోవడం మంచిదని తెలుస్తోంది.