మరో ఏడాది ఏడాదిన్నర లోపు వచ్చే సినిమాలలో రూ.1000 కోట్లకు పైగా గ్రాస్ రాబట్టగల సత్తా ఉన్న సినిమాలలో పుష్ప రెండో భాగంగా రానున్న పుష్ప: ది రూల్ ముందు వరుసలో ఉంటుంది. ఈ సినిమా వెయ్యి కోట్లు రాబడుతుందనే అంచనాలు ముందు నుంచి ఉన్నాయి. అయితే ఇప్పుడు ఈ సినిమా రేంజ్ పెరిగిందని, 1500 కోట్లు రాబట్టినా ఆశ్చర్యంలేదనే అభిప్రాయాలు వ్యక్తమవుతున్నాయి.

అల్లు అర్జున్ హీరోగా సుకుమార్ దర్శకత్వంలో రూపొందిన చిత్రం పుష్ప: ది రైజ్. ఈ సినిమా పాన్ ఇండియా రేంజ్ లో ఊహించని విజయాన్ని సొంతం చేసుకుంది. వసూళ్ల పరంగా కేజీఎఫ్-1 ని మించిన విజయాన్ని అందుకుంది. నార్త్ లోనూ పుష్ప-1 కి బ్రహ్మరథం పట్టారు. ఇప్పుడు పుష్ప-2 కి కూడా అదే సీన్ రిపీట్ అయ్యే అవకాశముంది. వసూళ్ల పరంగా కేజీఎఫ్-2 ని మించిన విజయాన్ని సొంతం చేసుకునే అవకాశం కనిపిస్తోంది. కేజీఎఫ్ తో పోలిస్తే పుష్ప కి మ్యూజిక్, మ్యానరిజమ్స్ బిగ్ అసెట్. సెలబ్రిటీలు సైతం పుష్పరాజ్ మ్యానరిజమ్స్ కి ఫిదా అయ్యారు. ఆ లెక్కన కేజీఎఫ్-2 తరహాలో వెయ్యి కోట్ల క్లబ్ లో చేరడం పుష్ప-2 కి పెద్ద మేటర్ కాదు. ఇప్పటికే పుష్ప-2 పై పాన్ ఇండియా రేంజ్ లో భారీ అంచనాలు నెలకొన్నాయి. దానికితోడు తాజాగా పుష్ప-1 కి గానూ బెస్ట్ యాక్టర్ గా బన్నీ నేషనల్ అవార్డు గెలుచుకున్నారు. దీంతో ఇప్పుడు పుష్పరాజ్ పేరు మారుమోగిపోతోంది. పుష్ప-2 రేంజ్ పెరగడంతో పాటు అంచనాలు రెట్టింపు అయ్యాయి. ఇప్పుడు పుష్ప-2 టార్గెట్ రూ.1000 కోట్లు కాదని, రూ.1500 కోట్లని అంటున్నారు. అదే జరిగితే వెయ్యి కోట్ల క్లబ్ లో ఉన్న కేజీఎఫ్-2, ఆర్ఆర్ఆర్ వంటి చిత్రాలను దాటేసి.. సౌత్ నుంచి బాహుబలి-2 తర్వాత రూ.1500 కోట్ల క్లబ్ లో చేరిన రెండో సినిమాగా నిలవనుంది.