English | Telugu
సిత్తరాల సిత్రావతి.. ఉన్నపాటున పోయే మతి.. శ్రీలీల అం(ఉం)టే అంతేమరి!
Updated : Sep 6, 2023
శ్రీలీల.. ఈతరం కుర్రకారు కలలరాణి. వరుస విజయాలతో, వరుస సినిమాలతో దూసుకుపోతున్న ఈ యంగ్ బ్యూటీ.. ఐదు నెలల పాటు వరుసగా ఐదు చిత్రాలతో సందడి చేసేందుకు సిద్ధమైంది. ఇందులో భాగంగానే.. రీసెంట్ గా ఆయా చిత్రాల ఫస్ట్ సింగిల్స్ యూట్యూబ్ ముంగిట హల్ చల్ చేస్తున్నాయి కూడా. ఈ క్రమంలోనే.. మరో ఫస్ట్ సింగిల్ తో ఎంటర్టైన్ చేసేందుకు సిద్ధమైంది ఈ 'ధమాకా' భామ.
ఆ వివరాల్లోకి వెళితే.. 'ఉప్పెన' స్టార్ వైష్ణవ్ తేజ్ కి జంటగా శ్రీలీల ఓ సినిమా చేసిన సంగతి తెలిసిందే. 'ఆది కేశవ' పేరుతో తెరకెక్కిన ఈ మూవీ దీపావళి కానుకగా నవంబర్ 10న థియేటర్స్ లోకి రాబోతోంది. నూతన దర్శకుడు శ్రీకాంత్ ఎన్. రెడ్డి రూపొందించిన ఈ మూవీని సితార ఎంటర్టైన్మెంట్స్, ఫోర్ట్యూన్ ఫోర్ సినిమాస్ సంస్థలు నిర్మించాయి. ప్రముఖ తమిళ స్వరకర్త జీవీ ప్రకాశ్ సంగీతమందించారు. ఇదిలా ఉంటే, ఈ చిత్రం నుంచి ఫస్ట్ సింగిల్ గా "సిత్తరాల సిత్రావతి.. ఉన్నపాటున పోయే మతి" అంటూ మొదలయ్యే పాటని సెప్టెంబర్ 9న రిలీజ్ చేయనున్నారు. ఆ పాట ఎలా ఉండబోతోందోచెప్పే ప్రయత్నంగా బుధవారం (సెప్టెంబర్ 6) ప్రోమో రిలీజ్ చేశారు. ట్యూన్, లిరిక్స్, విజువల్స్, వోకల్స్.. వెరసి ఈ పాట ఇంప్రెసివ్ గా ఉందనే చెప్పాలి. మరి.. ప్రోమోగా ఎంటర్టైన్ చేసిన "సిత్తరాల సిత్రావతి"..ఫుల్ సాంగ్ గానూ మురిపిస్తుందేమో చూడాలి.
కాగా, ఈ పాటని రాహుల్ సిప్లిగంజ్, రమ్య బెహరా గానం చేయగా.. రామజోగయ్య శాస్త్రి పదరచన చేశారు.