English | Telugu
ధనుష్ కి షాకిచ్చిన నిర్మాతల మండలి.. కొత్త సినిమాలు చేయకూడదు!
Updated : Jul 29, 2024
కోలీవుడ్ హీరో ధనుష్ (Dhanush) కి తమిళ నిర్మాతల మండలి షాక్ ఇచ్చింది. నిర్మాతల దగ్గర అడ్వాన్స్లు తీసుకుని ధనుష్ సినిమాలు పూర్తి చేయకపోవడంతో.. ఆగస్టు 15 తర్వాత ఏ కొత్త సినిమా మొదలు పెట్టకూడదు అంటూ నిర్మాతల మండలి ఆదేశాలు జారీ చేసింది. అంతేకాదు, ఎవరైనా ధనుష్తో సినిమా చేయాలంటే.. నిర్మాతల మండలి అనుమతి తప్పనిసరి అని స్పష్టం చేసింది.
ధనుష్ తమ వద్ద అడ్వాన్స్ తీసుకొని చాలా రోజులవుతున్నా సినిమాలు చేయడం లేదంటూ కొందరు నిర్మాతలు నిర్మాతల మండలికి ఫిర్యాదు చేశారు. ధనుష్ తో పాటు మరికొందరు హీరోలది కూడా ఇదే తంతు. నిర్మాతల ఫిర్యాదుతో సమావేశం ఏర్పాటు చేసిన నిర్మాతల మండలి కీలక నిర్ణయాలు తీసుకుంది. ఆగస్టు 15 తర్వాత కొత్త సినిమాలను ప్రారంభించవద్దని తెలిపింది. నిర్మాణ దశలో ఉన్న సినిమాలను అక్టోబర్ 31 నాటికి పూర్తి చేయాలని డెడ్ లైన్ పెట్టింది. స్టార్ హీరోలు నటించిన సినిమాలను థియేటర్లలో విడుదలైన ఎనిమిది వారాల తర్వాత ఓటీటీలో స్ట్రీమింగ్ చేయాలని చెప్పింది. సినీ పరిశ్రమకు సంబంధించిన సమస్యల పరిష్కారం కోసం నిర్మాతలు, డిస్ట్రిబ్యూటర్లు, థియేటర్ల యజమానులతో కూడిన జాయింట్ యాక్షన్ కమిటీ ఏర్పాటు చేస్తున్నట్లు ప్రకటించింది.