English | Telugu
`మాస్టర్` రీమేక్ లో సల్మాన్?
Updated : Apr 5, 2021
దక్షిణాది రీమేకుల్లో నటించడం.. వాటితో విజయాలు అందుకోవడం బాలీవుడ్ కండల వీరుడు సల్మాన్ ఖాన్ కి కొత్తేమీ కాదు. `హలో బ్రదర్` రీమేక్ `జుడ్వా`తో మొదలుకుని.. `వాంటెడ్` ( `పోకిరి` రీమేక్), `రెడీ`, `కిక్`, `బాడీగార్డ్` వరకు పలు విజయవంతమైన దక్షిణాది రీమేక్స్ లో సందడి చేశాడు సల్లూ భాయ్.
కట్ చేస్తే.. స్వల్ప విరామం తరువాత మరో సౌత్ రీమేక్ కి సల్మాన్ గ్రీన్ సిగ్నల్ ఇచ్చాడట. ఆ వివరాల్లోకి వెళితే.. తమిళ, తెలుగు భాషల్లో ఈ సంక్రాంతికి విడుదలై సక్సెస్ అయిన `మాస్టర్`ని హిందీ లో పునర్నిర్మించడానికి సన్నాహాలు జరుగుతున్నాయి. ఇందులోనే సల్మాన్ నటించబోతున్నారని సమాచారం. కోలీవుడ్ స్టార్స్ విజయ్, విజయ్ సేతుపతి ప్రధాన పాత్రల్లో నటించిన ఈ చిత్రాన్ని హిందీ నేటివిటికి తగ్గట్టు మార్పులుచేర్పులు చేస్తున్నారని.. త్వరలోనే ఈ సినిమా సెట్స్ పైకి వెళ్ళనుందని వినికిడి. దర్శకుడు, ఇతర వివరాలు మరికొద్ది రోజుల్లో వెల్లడయ్యే అవకాశముంది.
కాగా, సల్మాన్ తాజా చిత్రం `రాధే` రంజాన్ కానుకగా మే 13న థియేటర్స్ లో సందడి చేయనుంది. ప్రభుదేవా డైరెక్ట్ చేసిన ఈ సినిమాలో దిశా పటాని నాయికగా నటించింది. జాకీ ష్రాఫ్, రణదీప్ హుడా, భరత్, మేఘా ఆకాశ్ ఇతర ముఖ్య పాత్రల్లో దర్శనమివ్వనున్నారు.