సుకుమార్ దర్శకత్వంలో ఐకాన్ స్టార్ అల్లు అర్జున్ హీరోగా నటించిన పాన్ ఇండియా మూవీ 'పుష్ప ది రైజ్'. డిసెంబర్ 17 న థియేటర్స్ లో విడుదలైన ఈ సినిమా కలెక్షన్ల వర్షం కురిపించింది. ముఖ్యంగా హిందీలో అందరి అంచనాలను తలకిందులు చేస్తూ రూ.80 కోట్లకు పైగా కలెక్షన్స్ తో సత్తా చాటింది.

పుష్ప సినిమాతో బన్నీ క్రేజ్ ఊహించని విధంగా పెరిగిపోయింది. తన డైలాగ్ డెలివరీ, మ్యానరిజంతో సామాన్యుల నుంచి సెలబ్రిటీల వరకు అందర్నీ ఆకట్టుకున్నాడు. క్రికెటర్స్ సైతం బన్నీని ఇమిటేట్ చేస్తూ తగ్గేదేలే అంటున్నారు అంటేనే అర్థం చేసుకోవచ్చు బన్నీ ఏ స్థాయిలో ప్రభావితం చేశాడో. ఇన్నాళ్లు సౌత్ లో సత్తా చాటిన బన్నీ పుష్ప సినిమాతో నార్త్ లోనూ మంచి క్రేజ్ సంపాదించుకున్నాడు. ఆ క్రేజ్ ని క్యాష్ చేసుకోడానికి అక్కడి నిర్మాతలు ప్రయత్నిస్తున్నారు. ఈ క్రమంలోనే బన్నీ గత చిత్రం 'అల వైకుంఠపురములో' సినిమా హిందీలో విడుదలకు సిద్ధమైంది.

త్రివిక్రమ్ దర్శకత్వంలో బన్నీ నటించిన 'అల వైకుంఠపురములో' సినిమా ఘన విజయాన్ని అందుకుంది. పుష్ప హిందీలో సూపర్ హిట్ గా నిలిచిన నేపథ్యంలో ఇప్పుడు గోల్డ్ మైన్స్ సంస్థ 'అల వైకుంఠపురములో' సినిమాని హిందీలో డబ్ చేసి విడుదల చేస్తోంది. ఈ సినిమా జనవరి 26 న థియేటర్స్ లో విడుదల కానుంది. మరి పుష్పతో హిందీలో సంచనాలు సృష్టించిన బన్నీ.. 'అల వైకుంఠపురములో'తో ఏ స్థాయిలో మెప్పిస్తాడో చూడాలి.