సినిమా రంగంలో ఎలాంటి బ్యాక్‌గ్రౌండ్‌ లేకుండా, ఎలాంటి సపోర్ట్‌ లేకుండా రాణించడం చాలా కష్టంతో కూడుకున్న పని. అలాంటిది ఎలాంటి సినిమా నేపథ్యం లేకుండా కేవలం తమ టాలెంట్‌తోనే విజయాలు సాధించి తారాపథంలో దూసుకెళ్ళిన వారు చాలా మంది ఉన్నారు. వారిలో ముఖ్యంగా చెప్పుకోవాల్సిన బాలీవుడ్‌ హీరో సుశాంత్‌ సింగ్‌ రాజ్‌పుత్‌. తను చేసే సినిమాల విషయంలో ఎంతో విభిన్నంగా ఆలోచించే సుశాంత్‌ ఆ విధంగానే చేసింది కొన్ని సినిమాలైనా ఎంతో వైవిధ్యంతో కూడిన సినిమాలే చేశారు. అతనికి మంచి భవిష్యత్తు ఉంది. తప్పకుండా స్టార్‌ హీరో రేంజ్‌కి వెళతాడని అందరూ భావించారు. కానీ, దురదృష్టం అతన్ని వెంటాడిరది. కొన్ని ఘటనల వల్ల మానసికంగా కుంగిపోయిన సుశాంత్‌ ఆత్మహత్య చేసుకున్నారు. సుశాంత్‌ ఆత్మహత్య అప్పట్లో పెద్ద సంచలనం సృష్టించింది. 

ఇదిలా ఉంటే.. ఈమధ్య ఒక వార్త సోషల్‌ మీడియాలో చక్కర్లు కొడుతోంది. సుశాంత్‌ సింగ్‌ ఇంటిని బాలీవుడ్‌ స్టార్‌ హీరోయిన్‌ అదాశర్మ కొనుగోలు చేసిందనేదే ఆ వార్త. ఇటీవలి కాలంలో అదా కొన్ని వైవిధ్యమైన సినిమాల్లో నటిస్తూ అందర్నీ ఆశ్చర్యపరుస్తోంది. ది కేరళ ఫైల్స్‌, బస్తర్‌ వంటి సినిమాల్లో అద్వితీయమైన నటనతో అందర్నీ ఆకట్టుకున్న అదా ఇప్పుడు మరోసారి డిస్కషన్‌ పాయింట్‌గా నిలుస్తోంది. అసలు సుశాంత్‌ ఇంటిని అదా ఎందుకు కొనుగోలు చేసింది అనే ప్రశ్న అందరిలోనూ తలెత్తుతోంది. దీనిపై ఇటీవల అదాశర్మ స్పందించింది. 

‘నేను ఇంతకుముందు కేరళలో ఉన్న ఇల్లు చాలా విశాలంగా ఉండేది. చుట్టూ చెట్లతో ఎంతో ప్రశాంతంగా ఉండేది. పైగా పక్షులు వాలేందుకు, తిరిగేందుకు ఎంతో వీలుగా ఉండేది. ముంబైలో అలాంటి ఇంటి కోసం చాలా వెతికాను. ఆ సమయంలోనే సుశాంత్‌సింగ్‌ ఇల్లు నాకు బాగా నచ్చింది. అందుకే ఇక్కడికి మారిపోయాను. తీసుకున్న ఇంటిని అలాగే ఉంచకుండా చాలా మార్పులు చేశాను. రీమోడలింగ్‌లో భాగంగా ఒక ఫ్లోర్‌ను పూజగదిగా, డాన్స్‌ రూమ్‌, మ్యూజిక్‌ రూమ్‌.. ఇలా అన్నింటినీ మార్చేశాను. ఇప్పటివరకు నాకు ఎలాంటి ఇల్లు కావాలనుకుంటున్నానో అలా ఈ ఇంటిని మార్చుకున్నాను’ అన్నారు.