జనసేనానికి మళ్లీ బీజేపీ పిలుపు... ఈసారి ఎందుకు పిలిచారంటే...
ఒకవైపు ఏపీ రాజకీయాలు... మరోవైపు సినిమా షూటింగులతో క్షణం తీరిక లేకుండా గడుపుతోన్న పవన్ కల్యాణ్ కు మళ్లీ ఢిల్లీ పిలుపొచ్చింది. ఇప్పటికే రెండుమూడుసార్లు ఢిల్లీ వెళ్లొచ్చిన పవన్ కు... మళ్లీ హస్తిన పిలుపురావడం హాట్ టాపిక్ గా మారింది. మొన్ననే ఢిల్లీకి వెళ్లి మూడు రాజధానులపై కేంద్రానికి నివేదించి, ఆర్థికమంత్రి నిర్మలకు వినతిపత్రమిచ్చి, బీజేపీ అధ్యక్షుడిగా పూర్తిస్థాయి బాధ్యతలు చేపట్టిన నడ్డాను కలిసొచ్చిన పవన్కు, అంతలోనే మళ్లీ పిలుపెందుకొచ్చిందన్న చర్చ జరుగుతోంది. అయితే ఈసారి పిలుపునకు ఢిల్లీ అసెంబ్లీ ఎన్నికల కోసమని తెలుస్తోంది. ఢిల్లీ సమరంలో కేజ్రీవాల్ను ఢీకొట్టలేక సతమతమవుతున్న, మోడీ, అమిత్ షాలు, అన్ని ఆయుధాలనూ ప్రయోగిస్తున్నట్టే, పవన్నూ ప్రయోగిస్తున్నారు. ఇప్పటికే సైనా నెహ్వాల్ను పార్టీలో చేర్చుకున్న కమలదళం... ఢిల్లీ ప్రచారం కోసం రంగంలోకి దింపుతోంది. అలాగే, బాలీవుడ్ సెలబ్రిటీలు, క్రీడాకారులను సైతం క్యాంపెయిన్కు పిలుస్తున్నారు. ఈ నేపథ్యంలో జనసేన అధినేత పవన్కు కూడా బీజేపీ పిలిచినట్లు చెబుతున్నారు.
ఢిల్లీలో తెలుగువారి జనాభా బాగానే వుంది. ఇక కన్నడ, తమిళ, కేరళ రాష్ట్రాల ప్రజలూ మంచి సంఖ్యలోనే వున్నారు. సౌతిండియాలో పాపులర్ హీరో అయిన పవన్ కల్యాణ్తో ఢిల్లీ ప్రచారం చేయిస్తే, బాగుంటుందని భావిస్తున్నారట బీజేపీ నేతలు. దక్షిణాది ప్రజలు ఎక్కువగా నివసించే ప్రాంతాల్లో క్యాంపెయిన్ చేయించేందుకు షెడ్యూల్ సెట్ చేస్తున్నారు. జనసేన-బీజేపీ జతకట్టిన నేపథ్యంలో, ఉమ్మడి కార్యాచరణపై కసరత్తు చేస్తున్నారు రెండు పార్టీల నేతలు. అమరావతిలో రెండుపార్టీలూ కలిసి లాంగ్ మార్చ్ నిర్వహించాలని తలపెట్టినా, ఎందుకనో వాయిదా పడింది. మూడు రాజధానులపై కేంద్రం సుముఖంగా లేదని పవన్ ప్రకటించడం, అయితే, కేంద్రానికి ఎలాంటి సంబంధంలేదని జీవీఎల్ అనడంపై, ఇప్పటికీ రాద్దాంతం జరుగుతూనే వుంది. ఎవరు చెప్పింది నిజమనుకోవాలో అర్థంకాక జనసైనికులు తికమకపడుతున్నారు.
మొత్తానికి అటు సినిమా షూటింగ్లు, ఇటు అమరావతి నిరసనలు, పార్టీ నిర్మాణంపై తీరికలేకుండా ముందుకెళుతున్న పవన్, ఢిల్లీ ఎన్నికల ప్రచారానికీ డేట్స్ ఇస్తున్నారు. మొత్తానికి పవన్ కల్యాణ్ బిజీబిజీగా గడుపుతున్నారు. అయితే హస్తిన ఎన్నికల ప్రచారమేనా, రెండు పార్టీలకు సంబంధించి ఇంకా కీలకమైన చర్చలు, అధిష్టాన పెద్దలతో చేస్తారా అన్న చర్చ కూడా జరుగుతోంది.