ప్రముఖ యాంకర్ సుమ హోస్ట్ చేస్తోన్న షోలలో 'స్టార్ట్ మ్యూజిక్' షో ఒకటి. బిగ్ బాస్ కంటెస్టెంట్లను, టీవీ ఆర్టిస్ట్ లను ఈ షోకి అతిథులుగా తీసుకొచ్చి వారితో రకరకాల టాస్క్ లు చేయిస్తూ ఫన్ క్రియేట్ చేస్తుంటుంది సుమ. తాజాగా ఈ షోకి 'జానకి కలగనలేదు' టీమ్ వచ్చింది. ఈ సీరియల్ లో సీనియర్ హీరోయిన్ రాశి కీలకపాత్ర పోషిస్తోన్న సంగతి తెలిసిందే. ఆమెతో పాటు ఆమె భర్తగా, కొడుకుగా అలానే సీరియల్ లో ముఖ్య పాత్రలు పోషిస్తున్న వారు అతిథులుగా వచ్చారు. 

'ఇస్మార్ట్ అమ్మ వర్సెస్ ఇన్నోసెంట్ అబ్బాయి' అంటూ ఈ ఎపిసోడ్ కి సంబంధించిన ప్రోమోను విడుదల చేశారు. గెస్ట్ లను తన ఫన్నీ పంచ్ లతో ఓ ఆట ఆడేసుకున్న సుమ.. ఆ తరువాత రాశిని ఉద్దేశిస్తూ.. 'మీరు ఇండస్ట్రీకి వచ్చి ఎన్నేళ్లు అవుతుందండి' అని ప్రశ్నించింది. దానికి రాశి.. 'నా ఏజ్ ఎంతో అంత' అని చెప్పగా.. 'ఓ.. అయితే నా అంతే' అంటూ కౌంటర్ వేసింది సుమ. 

అనంతరం రాశి ఇండస్ట్రీకి వచ్చి 35 ఏళ్లు అవుతున్న సందర్భంగా.. ఇదే షోలో సెలబ్రేషన్స్ చేశారు. ఆమె లాంటి ఆర్టిస్ట్ తో కలిసి వర్క్ చేస్తున్నందుకు చాలా సంతోషంగా ఉందంటూ కో ఆర్టిస్ట్ లంతా ఆమె ముందు మోకాళ్లపై నుంచొని నమస్కారం పెట్టగా.. భావోద్వేగానికి గుర‌వుతూ వారిని ఆప్యాయంగా హత్తుకుంది రాశి. ప్రస్తుతం ఈ ప్రోమో యూట్యూబ్ లో వైరల్ అవుతోంది.