బుల్లితెరపై యాంకర్ రష్మీతో కలిసి సుధీర్ చేసే హడావుడి గురించి ప్రత్యేకంగా చెప్పనక్కర్లేదు. ఈ జంటకి చాలా మంది ఫాలోవర్లు ఉన్నారు. బుల్లితెరపై ఈ జంట పండించే కెమిస్ట్రీకు మిలియన్ల వ్యూస్ వస్తుంటాయి. కానీ తెర వెనుక మాత్రం మేమిద్దరం స్నేహితులు మాత్రమేనని చెబుతుంటుంది ఈ జంట. ఇప్పటివరకు 'ఎక్స్‌ట్రా జబర్దస్త్' షోలో ఈ జంట ప్రేమ, పెళ్లి అంటూ చాలా స్కిట్లు చేశారు. తాజాగా మరో స్కిట్ చేశారు.

రీసెంట్ గా రిలీజ్ చేసిన ప్రోమోలో ఈ జంట నిజమైన ప్రేమికుల్లానే అందరినీ నమ్మించారు. ఈ స్కిట్లో రష్మీ లాంగ్ డ్రైవ్ కు వెళ్తున్నట్లు పెట్టిన స్టేటస్ చూసి సుధీర్ కూడా రెడీ అవుతాడు. ఆమె వెళ్లేదారిలో కాచుకొని.. ఆమెని లిఫ్ట్ అడుగుతాడు. "ఎటు వెళ్తున్నావ్ రష్మీ.. ఈ దారిలో నువ్వేంటి..?" అని ఏమీ తెలియనట్లుగా అడిగితే.. "కూరగాయలు కొనడానికి వెళ్తున్నా" అని రష్మీ బదులిస్తుంది. దానికి సుధీర్ "అదేంటి స్టేటస్ లో లాంగ్ డ్రైవ్ అని పెట్టావ్ కదా..?" అని అడుగుతాడు.

దానికి రష్మీ "స్టేటస్ చూసే వచ్చావ్ కదా మరి ఎందుకు ఓవరాక్షన్!" అంటూ కౌంటర్ వేస్తుంది. అలా లాంగ్ డ్రైవ్ కి వెళ్తోన్న సమయంలో "బాగా ఉక్కబోస్తుంది.. డోర్ తీసి ప్రపంచాన్ని చూడు." అని సుధీర్ కి సలహా ఇస్తుంది రష్మీ. "నేను ప్రపంచాన్నే చూస్తున్నాను." అంటూ రష్మీ వంక ఆరాధ‌న‌గా చూస్తూ చెబుతాడు సుధీర్. దానికి ఆమె తెగ సిగ్గుపడిపోతుంది. ఈ ప్రోమో చివర్లో నిర్వాహకులు వీరి ప్రేమను ఎలివేట్ చేస్తూ కొన్ని కొటేషన్స్ కూడా రాశారు. ఈ ప్రోమో నెట్టింట తెగ సంద‌డి చేస్తోంది.