English | Telugu
ఫుడ్ డెలివరీ బాయ్గా మారిన డాన్స్ షో కంటెస్టెంట్.. అంతలోనే యాక్సిడెంట్!
Updated : Jun 7, 2021
హిందీ బుల్లితెరపై 'డాన్స్ ఇండియా డాన్స్' షో ఎంతో పాపులారిటీ సంపాదించుకుంది. దశాబ్ద కాలంగా సాగుతున్న ఈ షోలో న్యాయనిర్ణేతలుగా అప్పుడప్పుడు బాలీవుడ్ స్టార్స్ కూడా కనిపిస్తుంటారు. అయితే ఈ షో లో కంటెస్టెంట్ గా పాల్గొన్న బికీ దాస్ రోడ్డు ప్రమాదానికి గురయ్యాడు. గత శుక్రవారం బైక్ మీద వెళ్తున్న బికీ దాస్ మరో బైక్ ను ఢీ కొట్టడంతో ఈ ప్రమాదం చోటుచేసుకుంది. ఈ ఘటనలో అతడి పక్కటెముకలు విరిగి తీవ్ర గాయాలపాలైనట్లు తెలుస్తోంది.
ప్రస్తుతం బికీ దాస్ ను హాస్పిటల్ లో జాయిన్ చేసి చికిత్స అందిస్తున్నారు. ఈ ఘటన మీద బికీ దాస్ భార్య పోలీసులకు ఫిర్యాదు చేసింది. ఇదిలా ఉండగా.. బికీ దాస్ 2014లో ప్రసారమైన 'డాన్స్ ఇండియా డాన్స్' నాల్గో సీజన్ లో పాల్గొని అందరి దృష్టిని ఆకర్షించాడు. తన డాన్స్ స్టెప్పులతో చాలా మందికి ఫేవరెట్ గా మారాడు. ఫైనల్స్ లో మాత్రం రన్నరప్ గా సరిపెట్టుకోవాల్సి వచ్చింది.
ఈ షో తరువాత అతడి సినిమాల్లో అవకాశాలు రాకాపోవడంతో.. పలు ఈవెంట్స్ చేసుకుంటూ, కొన్ని షోలలో మెంటర్ గా కనిపిస్తూ జీవనం సాగించాడు. కరోనా కారణంగా అతడికి ఉపాధి లేకుండా పోయింది. దీంతో వారం క్రితమే ఆయన ఫుడ్ డెలివెరీ బాయ్ గా జాయిన్ అయ్యాడు. కోల్కతాలో ఫుడ్ డెలివర్ చేస్తోన్న సమయంలో అతడికి యాక్సిడెంట్ జరిగింది. మరి ఇప్పటికైనా సినీ పెద్దలెవరైనా బికీ దాస్ కు సాయం అందిస్తారేమో చూడాలి!