ఈ మధ్య కాలంలో హిందీ టెలివిజన్ రంగాన్ని పలు వివాదాలు చుట్టుముడుతున్నాయి. రీసెంట్ గా నటుడు కరణ్ మెహ్రా తన భార్యను వేధించిన కేసులో అరెస్ట్ అయ్యి, బెయిల్‌పై బ‌య‌ట‌కు వ‌చ్చాడు. ఈ వివాదం ఇంకా ఓ కొలిక్కి రాలేదు. ఇంతలోనే మరో టీవీ స్టార్ యాక్ట‌ర్‌ అరెస్ట్ కావడం హాట్ టాపిక్ గా మారింది. 'నాగిన్ 3' సీరియల్ తో పాపులారిటీ తెచ్చుకున్న పెరల్ వి పురి అత్యాచారం కేసులో ఇరుక్కున్నాడు. అత‌డిని పోలీసులు 'పోక్సో' (ప్రొటెక్ష‌న్ ఆఫ్ చిల్డ్ర‌న్ ఫ్ర‌మ్ సెక్సువ‌ల్ అఫెన్సెస్‌) సెక్ష‌న్ కింద‌ అరెస్ట్ చేశారు. ఈ ఉదంతం బాలీవుడ్ వ‌ర్గాల‌ను షాక్‌కు గురిచేశాయి.

వివరాల్లోకి వెళితే.. ఇది పాత కేస‌నీ, టీవీ సీరియ‌ల్స్‌లో అవ‌కాశాలు ఇప్పిస్తున్నానని ప్రామిస్ చేసి, మైన‌ర్ బాలిక‌ను లైంగికంగా వాడుకున్నాడ‌నేది పెర‌ల్ వి పురిపై ఉన్న అభియోగ‌మ‌నీ పోలీసులు తెలిపారు. అత‌డిని రాత్రి ముంబైలోని వాలివ్ పోలీసులు అరెస్ట్ చేశారు. తొమ్మిదేళ్లుగా టీవీ సీరియ‌ల్స్‌లో న‌టిస్తోన్న పురి, ఆ మైన‌ర్ బాలిక‌తో స‌న్నిహితంగా మెల‌గుతూ వ‌స్తున్నాడ‌ని వారు చెప్పారు. అత‌డిని పోలీస్ క‌స్ట‌డీలోకి తీసుకున్నారు.

కాగా 'నాగిన్ 3'లో పురితో క‌లిసి న‌టించిన అనిత (నువ్వు నేను హీరోయిన్‌) అత‌డికి మ‌ద్ద‌తుగా నిలిచింది. పెర‌ల్ మంచివాడంటూ దీన్ని నాన్‌సెన్సిక‌ల్ న్యూస్‌గా అభివ‌ర్ణించింది. అత‌డి గురించి త‌న‌కు బాగా తెలుస‌నీ, ఇలాంటి ప‌నులు చేసేవాడు కాద‌నీ అనిత చెప్పింది.