English | Telugu
'జానకి కలగనలేదు'కు డేట్, టైమ్ ఫిక్స్
Updated : Mar 16, 2021
స్టార్ మాలో సరికొత్త సీరియల్ 'జానకి కలగనలేదు' ప్రారంభం కాబోతోంది. 'మౌనరాగం' సీరియల్లో హీరోయిన్గా నటించడం ద్వారా మంచి గుర్తింపుని సొంతం చేసుకున్న ప్రియాంక జైన్, అమర్దీప్ చౌదరి ప్రధాన పాత్రల్లో నటిస్తున్నారు. ఇక ఇదే సీరియల్తో నటుడు రాజా రవీంద్ర, నటి రాశి బుల్లితెరంగేట్రం చేస్తున్నారు. మెయిన్ లీడ్ గా నటిస్తున్న ప్రియాంక జైన్కి తండ్రిగా రాజా రవీంద్ర నటిస్తుంటే.. ప్రియాంక జైన్కి జోడీగా నటిస్తున్న అమర్దీప్ చౌదరికి తల్లిగా రాశి నటిస్తున్నారు.
ఐపీఎస్ ఆఫీసర్ కావాలనుకున్న ఓ అమ్మాయికి, చదువు ఏమాత్రం అబ్బక స్వీట్ షాప్ని రన్ చేస్తున్న అబ్బాయికి పెళ్లి జరిగితే ఆ బంధం ఎలా వుంటుంది?.. భార్య కోరిక తెలుసుకున్న భర్త ఆమెకు ఎలా అండగా నిలబడ్డాడు?.. తన కొడుకు కంటే ఎక్కువ చదివే కోడలుని తన ఇంటికి తెచ్చుకోనని చెప్పే తల్లికి తెలియకుండా కొడుకు తన భార్యని ఎలా ఐపీఎస్ చదివించాడు.. అన్నదే ఈ సీరియల్ అసలు కథ. హిందీ సూపర్ హిట్ సీరియల్ 'దియా ఔర్ బాతీ హమ్'కు రీమేక్గా ఈ సీరియల్ని నిర్మించారు.
అక్కడ 1487 ఎపిసోడ్లు విజయవంతంగా ప్రసారం అయిన ఈ సీరియల్ తెలుగులోనూ అదే స్థాయిలో ఆకట్టుకుంటుందని మేకర్స్ భావిస్తున్నారు. స్టార్ మాలో ఈ ధారావాహిక ఈ నెల 22 నుంచి రాత్రి 9 గంటలకు సోమవారం నుంచి శుక్రవారం వరకు ప్రసారం కానుంది.