కొన్నిరోజులుగా స్టార్ మాలో ప్రసారమవుతోన్న 'జానకి కలగనలేదు' సీరియల్ బుల్లితెర ప్రేక్షకులను విపరీతంగా ఆకట్టుకుంటోంది. ఈ సీరియల్ లో పనిమనిషి క్యారెక్టర్ లో నటిస్తోన్న చికిత (రమ్య) తన నటనతో మెప్పిస్తోంది. ఈమె సోషల్ మీడియాలో చాలా యాక్టివ్ గా ఉంటుంది. నటనపై మక్కువతో ఇండస్ట్రీలో అడుగుపెట్టింది. కుటుంబానికి తానే ఆధారం కావడంతో ఇండస్ట్రీలో అవకాశాల కోసం ఎదురుచూస్తోంది రమ్య. అయితే తనకు అవకాశాలు వస్తున్నాయి కానీ నాకేంటి అంటూ వేధించేవాళ్లు ఎక్కువగా ఉన్నారంటూ ఆవేదన వ్యక్తం చేసింది. 

తొలిసారి 'జానకి కలగనలేదు' సీరియల్ లో ఆఫర్ వచ్చిందని.. రాశి, అమర్, ప్రియాంక లాంటి పెద్ద పెద్ద ఆర్టిస్ట్ లతో పని చేయడం సంతోషంగా ఉందని చెప్పింది. కెమెరా ముందు ఎలా చేయాలో తనకు తెలియకపోతే వాళ్లే హెల్ప్ చేశారని చెప్పుకొచ్చింది. అనంతరం ఇండస్ట్రీలో పరిస్థితుల గురించి మాట్లాడుతూ.. అందరూ అమ్మాయిలను అదే ఉద్దేశంతో చూస్తున్నారని.. ఒక్కోసారి ఇండస్ట్రీకి ఎందుకు వచ్చానా అని అనిపిస్తోంద‌ని.. ఎందుకు బతికున్నానా..? అనే ఫీలింగ్ వచ్చిందని చెప్పుకొచ్చింది. 

తన ఇంట్లో ఆర్థిక‌ ఇబ్బందుల కారణంగా ఇండస్ట్రీకి రావాల్సి వచ్చిందని.. వచ్చిన తరువాత క్యాస్టింగ్ కౌచ్ ఇబ్బందులు వచ్చాయని చెప్పింది. అలాంటి సంఘటనలు ఎదురైనప్పుడు నో చెప్పేదాన్ని అనీ, అందుకే సరైన అవకాశాలు రాలేదనీ తెలిపింది. కానీ 'జానకి కలగనలేదు' టీమ్ వాళ్లు సాయం చేయడంతో తనకు అవకాశం వచ్చిందని అంటూ.. టీమ్ మొత్తానికి కృతజ్ఞతలు చెప్పింది.