ప్రస్తుతం కరోనా సెకండ్ వేవ్ కారణంగా ప్రజలు ఎన్నో ఇబ్బందులను ఎదుర్కొంటున్నారు. సినీ పరిశ్రమకు కూడా కష్టాలు ఏర్పడ్డాయి. దాదాపు షూటింగులన్నింటికీ బ్రేక్ పడింది. కానీ కొందరు మాత్రం ఇండోర్‌ షూటింగ్ లను అతి తక్కువ మంది స్టాఫ్‌తో కానిచ్చేస్తున్నారు. అందులో 'కార్తీకదీపం' సీరియల్ కూడా ఉంది. అన్ని జాగ్రత్తలు తీసుకుంటూ.. తక్కువమందితో ఈ సీరియల్ ను చిత్రీకరిస్తున్నారు. ఈ సీరియల్ లో నటించేవారందరూ కూడా తెలుగు ప్రేక్షకులకు దగ్గరయ్యారు.

ముఖ్యంగా వంటలక్క పాత్రలో నటిస్తోన్న ప్రేమి విశ్వనాథ్‌కు భారీ క్రేజ్ వచ్చింది. మలయాళీ అమ్మాయి అయినప్పటికీ తెలుగు రాష్ట్రాల్లో ఆమెకి ఎనలేని గుర్తింపు లభించింది. తాజాగా యాంకర్ సుమతో కలిసి ప్రేమి విశ్వనాథ్ లైవ్ లోకి వచ్చింది. తెనాలి డబుల్స్ హార్స్ అనుబంధం అంటూ ఈ ఇద్దరూ లైవ్ లో పాల్గొన్నారు. అందులో ప్రేమి విశ్వనాథ్ చాలా విషయాలను పంచుకుంది. షూటింగ్ ల కోసం ప్రతి వారం కేరళ, తెలంగాణ అంటూ తిరుగుతున్నానని చెప్పింది.

ప్రతి వారం కరోనా టెస్ట్ లు చేయించుకుంటున్నానని తెలిపింది. అయితే ఇలా కరోనా సమయంలో బయటకు రావడం మాత్రం తన తండ్రికి అసలు ఇష్టం లేదని చెప్పుకొచ్చింది. తన గురించి ఆయన ఎప్పుడూ బాధపడుతూనే ఉంటారని.. క్షేమంగా ఇంటికి వచ్చేవరకు టెన్షన్ పడుతూనే ఉంటారని చెప్పింది. ఇంటికి వెళ్లి స్నానం చేసి ఆయన ముందు కూర్చున్నప్పుడే టెన్షన్ పోతుందని.. తన తండ్రి గురించి చెబుతూ లైవ్‌లోనే ప్రేమి విశ్వనాథ్ కంటతడి పెట్టుకుంది. సీరియల్ లో తప్ప బయట ఎక్కడా ఏడవలేదని.. ఇదే మొదటిసారి అని చెబుతూ ఎమోషనల్ అయింది.