బుల్లితెరపై యాంకర్ సుమ టాప్ యాంకర్ గా దూసుకుపోతున్నారు. 'సుమ‌క్క' స్థాయి నుంచి 'సుమ ఆంటీ' స్థాయికి వ‌చ్చినా ఆమె క‌రిష్మాలో మార్పేమీ లేదు. ఆమె ఏ షోని హోస్ట్ చేసినా అది సూపర్ హిట్ అవ్వాల్సిందే. ప్రస్తుతం ఆమె చేతిలో పలు ప్రాజెక్ట్స్ ఉన్నాయి. ఈటీవీలో 'క్యాష్', 'స్టార్ మహిళ' షోలతో పాటు స్టార్ మాలో కొన్ని షోలు.. అలానే జీ తెలుగులో 'బిగ్ సెలబ్రిటీ ఛాలెంజ్' అంటూ చాలా బిజీగా గడుపుతున్నారు. అయితే ప్రస్తుతం లాక్ డౌన్ కారణంగా షూటింగ్ లు జరగడం లేదు. టీవీలో టెలికాస్ట్ చేస్తున్నవి కూడా లాక్‌డౌన్‌కు ముందు షూట్ చేసినవే.

ఇదిలా ఉండగా.. యాంకర్ రవితో కలిసి సుమ 'బిగ్ సెలబ్రిటీ ఛాలెంజ్' షోను హోస్ట్ చేస్తోన్న సంగతి తెలిసిందే. వీరిద్దరూ కలిసి చేసే సందడి మాములుగా ఉండదు. ప్రతి వారం సెలబ్రిటీలను ఈ షోకి తీసుకొస్తూ రకరకాల ఛాలెంజ్ లతో ప్రేక్షకులను ఎంటర్టైన్ చేస్తుంటారు. తాజాగా ఈ షోకి 'డ్రామా జూనియర్స్‌' పిల్లలు వచ్చాయి. ఈ ఆదివారం ప్రసారం కాబోతున్న ఈ ఎపిసోడ్ లో స్పెషల్ అప్పియరెన్స్ గా 'గల్లీ బాయ్స్' సద్దాం వచ్చారు. దీనికి సంబంధించిన ప్రోమోను విడుదల చేశారు.

ఈ షోలో సుమ ఎక్కడా కనిపించలేదు. సుమ లేకుండా వచ్చిన మొదటి ప్రోమో ఇదే. సుమ ఎందుకు కనిపించలేదు..? అంటూ నెటిజన్లు ఈ ప్రోమోపై కామెంట్స్ చేస్తున్నారు. లాక్ డౌన్ కంటే ముందుగానే ఈ ఎపిసోడ్ జరిగినా.. సుమ రాకపోవడానికి కారణం ఏంటని నెటిజన్లు ప్రశ్నిస్తున్నారు. సుమ ఈ షో నుండి తప్పకున్నారా..? లేక వేరే కారణాలతో హాజరు కాలేకపోయారా..? అనే విషయాలపై క్లారిటీ రావాల్సివుంది!