English | Telugu
లైవ్లో టీవీ యాక్టర్ ఆత్మహత్యాయత్నం..!
Updated : Jun 10, 2021
కరోనా వైరస్ కారణంగా చాలా మంది ఇబ్బందులు పడుతున్నారు. ఈ వైరస్ అన్ని దేశాలను అతలాకుతలం చేస్తోంది. ఇండియాలో దీని ప్రభావం మరింత ఎక్కువగా ఉంటుంది. దీన్ని కట్టడి చేయాలని ప్రభుత్వం విధించిన లాక్ డౌన్ కారణంగా ఎందరో ప్రజాలు జీవనోపాధిని కోల్పోయారు. చాలా మంది పేద ప్రజలు ఉపాధిని కోల్పోయి రోడ్డున పడ్డారు. తినడానికి తిండి లేక ఆకలి చావులకు గురవుతున్నారు. ఈ వైరస్ ప్రభావం సినీ పరిశ్రమపై కూడా పడింది.
షూటింగ్స్ లేకపోవడంతో సినీ కార్మికులు కూడా ఇబ్బందులు పడుతున్నారు. ఈ క్రమంలో బెంగాలీ నటుడు సువో చక్రవర్తి అవకాశాలు లేక ఆర్థిక సమస్యలు ఎదుర్కోవాల్సిన పరిస్థితి రావడంతో ఫేస్ బుక్ లైవ్ లో సూసైడ్ చేసుకోవడానికి ప్రయత్నించాడు. బెంగాలీలో 'మంగళ చాందీ', 'మానస' వంటి సీరియల్స్ తో అక్కడ ప్రేక్షకులకు దగ్గరైన చక్రవర్తి రీసెంట్ గా అభిమానులతో ఫేస్ బుక్ లైవ్ లో పాల్గొన్నాడు.
లైవ్లో మాట్లాడుతూ సడెన్ గా ఎక్కువ మోతాదులో నిద్ర మాత్రలు మింగేశాడు. ఇది చూసిన ఆయన స్నేహితులు వెంటనే పోలీసులకు సమాచారం ఇచ్చారు. దీంతో రంగంలోకి దిగిన పోలీసులు సువో చక్రవర్తిని హాస్పిటల్లో చేర్పించి అతడి ప్రాణాలు కాపాడారు. ప్రస్తుతం ఆయన ఆరోగ్యం కుదుటపడింది. ఆర్థిక ఇబ్బందుల కారణంగానే ఆయన ఆత్మహత్యాయత్నానికి పాల్పడినట్లు పోలీసులు తెలిపారు.