English | Telugu
మూడు సిద్ధిపేట కుటుంబాలకు సాయం చేసిన అభిజిత్!
Updated : May 21, 2021
దేశవ్యాప్తంగా కరోనా విజృంభిస్తోన్న సంగతి తెలిసిందే. సెకండ్ వేవ్ కారణంగా వందల మంది మరణిస్తున్నారు. రోజుకి లక్షల్లో కేసులు నమోదవుతున్నాయి. రెండు తెలుగు రాష్ట్రాలలో లాక్ డౌన్ విధించిన సంగతి తెలిసిందే. దీంతో సామాన్య ప్రజలు మరోసారి నిత్యావసర సరుకులు లేక ఇబ్బందులు ఎదుర్కొంటున్నారు. ఇలాంటి సమయంలో అవసరంలో ఉన్నవారిని ఆదుకోవడం కోసం సామాన్య ప్రజల నుండి సెలబ్రిటీల వరకు ముందుకు వస్తున్నారు.
తాజాగా బిగ్ బాస్ సీజన్ 4 విన్నర్ అభిజిత్ కూడా తన ఉదారతను చాటుకున్నాడు. సిద్ధిపేటకు చెందిన మూడు పేద కుటుంబాలకు నిత్యావసర సరుకులు పంపిణీ చేసి వారి అవసరాన్ని తీర్చాడు. దీనికి సంబంధించిన ఫోటోలను, వీడియోలను అభిజిత్ తన ఇన్స్టాగ్రామ్ లో షేర్ చేశాడు.
''మూడు కుటుంబాలు నిత్యావసర సరుకుల కోసం ఇబ్బంది పడుతున్నారని నిన్న సాయంత్రం సిద్ధిపేట నుండి ఓ వ్యక్తి నాకు ఫోన్ చేశాడు. వెంటనే నేను నాకు తెలిసిన యువకులను దీని గురించి తెలుసుకోమని చెప్పాను. తెల్లారిలేచే సరికి ఈ ఫోటోలు, వీడియోలు నాకు పంపించారు. ఇందులో సహకరించిన సిద్ధిపేట యువకులకు ధన్యవాదాలు'' అంటూ అభిజిత్ రాసుకొచ్చాడు.