English | Telugu
'జబర్దస్త్'.. ఇంద్రజ అవుట్, రోజా ఈజ్ బ్యాక్!
Updated : May 21, 2021
'జబర్దస్త్' షోలో జడ్జి రోజా కీలకపాత్ర పోషిస్తుంటారు. తనదైన పంచ్ లు, కౌంటర్ లతో కమెడియన్స్ ను టీజ్ చేస్తూ షోని రక్తి కట్టిస్తుంటారు. గత కొంతకాలంగా ఆమె అనారోగ్య కారణాలతో 'జబర్దస్త్' షోకి దూరమైన సంగతి తెలిసిందే. ఆమె ప్లేస్ ను భర్తీ చేయడానికి ఒకప్పటి హీరోయిన్ ఇంద్రజను తీసుకొచ్చారు. తన అందం, అభినయంతో 'ఎక్స్ట్రా జబర్దస్త్' షోలో ఎంట్రీ ఇచ్చిన ఇంద్రజ తక్కువ సమయంలోనే తన పంచ్ లతో అందరినీ ఆకట్టుకున్నారు.
దీంతో రోజా లేని లోటుని భర్తీ చేసిందనే పేరు తెచ్చుకున్నారు. స్కిట్ లలో ఇన్వాల్వ్ అవుతూ.. కంటెస్టెంట్స్ కు బూస్టింగ్ ఇస్తూ పూర్తి స్థాయిలో వినోదాన్ని పంచారు ఇంద్రజ. అంతేకాదు.. హీరోయిన్ గా రాని గుర్తింపు 'జబర్దస్త్' షో సంపాదించుకోగలిగారు. కొన్ని ఎపిసోడ్లే చేసినప్పటికీ..ఆమెకి ఫ్యాన్ ఫాలోయింగ్ కూడా పెరిగిపోయింది. దీంతో ఇంద్రజ ఇక షోలో ఫుల్ టైమ్ జడ్జిగా కంటిన్యూ అవుతుందని అందరూ అనుకున్నారు.
అయితే ఇప్పుడు ఆ ఊహాగానాలకు ఫుల్ స్టాప్ పెట్టింది 'జబర్దస్త్' టీమ్. అనారోగ్యం నుండి తిరిగి కోలుకున్న రోజాను తిరిగి షోలోకి తీసుకొచ్చారు. మే 27న ప్రసారం కానున్న ఈ ఎపిసోడ్ కి సంబంధించిన ప్రోమోను విడుదల చేశారు. ఇందులో మరో జడ్జి మనోతో కలిసి రోజా రెట్టింపు ఉత్సాహంతో కనిపించారు. రీఎంట్రీ ఇచ్చి తనదైన పంచ్ లతో అలరించారు. ఎప్పటిలానే టీమ్ లీడర్స్ రాసుకున్న పంచ్ లను ముందే చెప్పేస్తూ చురుకైన జడ్జి అనిపించుకున్నారు రోజా.