టాలీవుడ్ టాప్ దర్శకులలో త్రివిక్రమ్ శ్రీనివాస్ ఒకరు. 'అత్తారింటికి దారేది', 'అల వైకుంఠపురములో' వంటి సినిమాలతో ఆయన సంచలన విజయాలను అందుకున్నారు. అయితే ఇప్పుడు తన తోటి దర్శకులు పాన్ ఇండియా స్థాయిలో సత్తా చాటుతుండటంతో.. త్రివిక్రమ్ చూపు కూడా పాన్ ఇండియా వైపు మళ్లిందట. 'బాహుబలి', 'ఆర్ఆర్ఆర్'తో రాజమౌళి పాన్ ఇండియా స్థాయిలో ఎన్నో సంచలనాలు సృష్టించారు. ఇప్పుడు జక్కన్న సినిమాలు గ్లోబల్ దృష్టిని ఆకర్షిస్తున్నాయి. ఇక 'పుష్ప'తో పాన్ ఇండియా రేంజ్ లో సత్తా చాటిన సుకుమార్.. 'పుష్ప-2'తో సంచలనాలు సృష్టించడానికి సిద్ధమవుతున్నారు. వీరితో పాటు 'దేవర'తో కొరటాల శివ, 'కల్కి 2898 AD'తో నాగ్ అశ్విన్ ఇలా ఎందరో తెలుగు దర్శకులు పాన్ ఇండియా లెవెల్ లో తమ అదృష్టాన్ని పరీక్షించుకోవడానికి రెడీ అవుతున్నారు. అయితే ఇప్పుడు కాస్త ఆలస్యంగానైనా అదిరిపోయే ప్లానింగ్ తో త్రివిక్రమ్ అడుగులు పాన్ ఇండియా వైపు పడుతున్నాయట.

త్రివిక్రమ్ ప్రస్తుతం మహేష్ బాబుతో 'గుంటూరు కారం' చేస్తున్నారు. 2024 సంక్రాంతికి ఇది రీజనల్ సినిమాగానే విడుదల కానుంది. దీని తర్వాత చేయబోయే సినిమాతోనే త్రివిక్రమ్ పాన్ ఇండియా అడుగులు మొదలు కానున్నాయి. 'గుంటూరు కారం' తర్వాత ఆయన అల్లు అర్జున్ తో ఓ సినిమా చేయబోతున్నారు. 'జులాయి', 'సన్నాఫ్ సత్యమూర్తి', 'అల వైకుంఠపురములో' వంటి విజయవంతమైన చిత్రాల తర్వాత త్రివిక్రమ్-బన్నీ కలయికలో వస్తున్న నాలుగో చిత్రమిది. పైగా 'పుష్ప'తో బన్నీ ఇప్పటికే పాన్ ఇండియా ఇమేజ్ సొంతం చేసుకున్నారు. అందుకే బన్నీతో తాను చేయబోయే సినిమాని పాన్ ఇండియా సినిమాగా రూపొందించబోతున్నారట త్రివిక్రమ్. ఇది భారీ బడ్జెట్ తో తెరకెక్కనుందని సమాచారం. దీని తర్వాత కూడా ప్రభాస్, రామ్ చరణ్, జూనియర్ ఎన్టీఆర్ వంటి పాన్ ఇండియా స్టార్స్ తో సినిమాలు చేయడానికి త్రివిక్రమ్ సన్నాహాలు చేస్తున్నారట. ఇప్పటికే త్రివిక్రమ్, ప్రభాస్ మధ్య కథా చర్యలు జరిగినట్లు తెలుస్తోంది. అలాగే త్రివిక్రమ్-ఎన్టీఆర్ కాంబినేషన్ లో అత్యంత భారీ బడ్జెట్ తో ఓ సినిమా ఉంటుందని గతంలో నిర్మాత నాగవంశీ చెప్పారు. త్రివిక్రమ్ ఇలా వరుసగా పాన్ ఇండియా స్టార్స్ తో సినిమాలు చేసి సత్తా చాటితే.. పాన్ ఇండియా వైడ్ గా ఆయన పేరు మారుమోగిపోవడం ఖాయం.