English | Telugu
"సంద్రం" లోగో లాంచ్
Updated : Sep 9, 2011
శ్రీ సాయి మిత్రా ప్రొడక్షన్స్ పతాకంపై, "సై" అర్జున్ హీరోగా, దీపికను హీరోయిన్ గా పరిచయం చేస్తూ, కుమార్ రాజు ముదునూరిని దర్శకుడిగా పరిచయం చేస్తూ, రాజేష్ తెన్నేటి నిర్మిస్తున్న తొలి చిత్రం "సంద్రం". సెప్టెంబర్ 8 వ తేదీన, హైదరాబాద్ ఫిల్మ్ నగర్ లోని ప్రొడ్యూసర్స్ కౌన్సిల్ హాల్లో ఈ "సంద్రం" చిత్రం యొక్క లోగోని, ప్రముఖ పాత్రికేయులు, నిర్మాత, "సూపర్ హిట్" వారపత్రిక అధిపతి అయిన బి.ఎ.రాజు స్వహస్తాలతో ఆవిష్కరించారు. ఈ చిత్రానికి సంగీతం క్రిష్, సినిమాటోగ్రఫీని బి.దుర్గా కిశోర్ నిర్వహిస్తూండగా, ప్రముఖ యువ పాత్రికేయుడు నాగు గవర ఈ చిత్రంలో ఉన్న అయిదు పాటలనూ వ్రాశారు.
ఈ చిత్రం లోగో లాంచింగ్ రోజునే ప్రముఖ సంగీత దర్శకురాలు, గాయని అయిన యమ్.యమ్.శ్రీలేఖ జన్మదినం కావటంతో, ఆమె జన్మదిన వేడుకలను కూడా ఇదే వేదిక మీద జరిపారు. శ్రీలేఖ ఈ "సంద్రం" చిత్రంలో మూడు పాటలను పాడారు. ఈ సందర్భంగా హీరో అర్జున్ ప్రసంగిస్తూ తనకీ అవకాశమిచ్చిన దర్శక, నిర్మాతలకు తన కృతజ్ఞతలు తెలిపారు. పాటల రచయిత నాగు గవర మాట్లాడుతూ భావోద్వేగానికి గురయ్యారు. తనను తాను ఒక దర్శకుడిగా, రచయితగా నిరూపించుకోటానికి సినీ పరిశ్రమకొచ్చాననీ, అలాంటిది ఆ విషయాన్ని మరచిపోయే సమయంలో తనకు తొలి చిత్రంలోనే అన్నిపాటలూ వ్రాసే అవకాశమిచ్చిన నిర్మాతకు తన కృతజ్ఞతలు తెలియజేశారు. ముఖ్య అతిధిగా విచ్చేసిన బి.ఎ.రాజు ఈ చిత్రం యూనిట్ కు తన శుభాశీస్సులు అందజేశారు.