వర్మ...రామ్ గోపాల వర్మ తాను తీయబోతున్న "డిపార్ట్ మెంట్" అనే చిత్రంలో హీరోగా దగ్గుపాటి రానాని తీసుకున్నారని విశ్వసనీయ వర్గాల ద్వారా అందిన సమాచారం. వివరాల్లోకి వెళితే ప్రముఖ దర్శక, నిర్మాత రామ్ గోపాల వర్మ పోలీస్ డిపార్ట్ మెంటుకి సంబంధించిన కథతో త్వరలో తాను తీయబోయే "డిపార్ట్ మెంట్" సినిమాలో హీరోగా మన తెలుగు హీరో దగ్గుపాటి రానాని తీసుకున్నారట. ప్రస్తుతం రామ్ గోపాల వర్మ "బుడ్డా" అనే చిత్రాన్ని పూరీ జగన్నాథ్ దర్శకత్వంలో, తాను నిర్మాతగా మారి హిందీలో నిర్మిస్తున్నారు.

ఇటీవల ఆయన తెలుగులో తీసిన "కథ, స్క్రీన్ ప్లే, దర్శకత్వం అప్పల్రాజు" సినిమా బాక్సాఫీస్ వద్ద ఆశించిన స్థాయిలో విజయం సాధించలేదు. ఆ తర్వాత రామ్ గోపాల వర్మ ప్రయోగాత్మకంగా కేనన్ 5డి కెమెరాతో, రవితేజ, ఛార్మి, మంచు లక్ష్మీ ప్రసన్న, ప్రకాష్ రాజ్, సునీల్, బ్రహ్మానందం వంటి వారితో స్వీయ దర్శకత్వంలో తీసిన "దొంగల ముఠా" చిత్రం కూడా ఢమాల్ అనటంతో మళ్ళీ తెలుగు నుంచి హిందీ వైపే మొగ్గు చూపిన వర్మ ఈ "డిపార్ట్ మెంట్" చిత్రాన్ని హిందీలో తీస్తున్నారు. రానా ఇప్పటికే హిందీలో "దమ్‍ మారో దమ్" అనే చిత్రంతో హిందీ ప్రేక్షకులకు పరిచయమయ్యాడు. అందుకేనేమో వర్మ అతన్ని తన "డిపార్ట్ మెంట్" సినిమాలో హీరోగా తీసుకుంటున్నాడు.