రానా దగ్గుబాటి హీరోగా తేజ దర్శకత్వంలో తెరకెక్కిన 'నేనే రాజు నేనే మంత్రి' చిత్రం ప్రేక్షకులను ఎంతలా ఆకట్టుకుందో తెలిసిందే. 2017 ఆగస్టులో విడుదలైన ఈ చిత్రం ఘన విజయం సాధించింది. ఇప్పుడు వీరి కాంబినేషన్ లో మరో మూవీ రాబోతుంది. ఈ విషయాన్ని స్వయంగా డైరెక్టర్ తేజ ప్రకటించాడు. అంతేకాదు ఈ సినిమాకి 'రాక్షస రాజు' అనే టైటిల్ ని పరిశీలిస్తున్నట్లు రివీల్ చేశాడు.

రానా సోదరుడు అభిరామ్ 'అహింస' అనే చిత్రంతో తెలుగుతెరకు హీరోగా పరిచయమవుతున్నాడు. తేజ దర్శకత్వం వహించిన ఈ సినిమా జూన్ 2న ప్రేక్షకుల ముందుకు రానుంది. తాజాగా జరిగిన ఈ మూవీ ప్రీరిలీజ్ ఈవెంట్ కి రానా హాజరయ్యాడు. ఈ సందర్భంగా రానా సమక్షంలోనే తన తదుపరి సినిమా వివరాలను వెల్లడించాడు తేజ. 'నేనే రాజు నేనే మంత్రి' తర్వాత మరోసారి రానాతో చేతులు కలుపుతున్నట్లు తేజ చెప్పాడు. ఈ సినిమాకి 'రాక్షస రాజు' అనే టైటిల్ ని పరిశీలిస్తున్నామని, అయితే ఇంకా ఖరారు చేయలేదని తెలిపాడు. అంతేకాదు ఈ చిత్రం ద్వారా 40-50 మంది కొత్త నటీనటులను పరిచయం చేయనున్నట్లు చెప్పుకొచ్చాడు. ఇదిలా ఉంటే 'రాక్షస రాజు' టైటిల్ బాగుందని, దానినే ఖరారు చేయాలని దగ్గుబాటి ఫ్యాన్స్ కోరుతున్నారు.