English | Telugu
నాగార్జున సోదరి మృతి.. అక్కినేని కుటుంబంలో విషాదం!
Updated : Oct 18, 2023
చిత్ర పరిశ్రమను విషాదాలు వెంటాడుతూనే ఉన్నాయి. ఈమధ్యకాలంలో ఎంతో మంది ప్రముఖులు కన్నుమూశారు. ఇప్పుడు అక్కినేని కుటుంబంలో తీవ్ర విషాదం నెలకొంది. అక్కినేని నాగేశ్వరరావు కుమార్తె, నాగార్జున సోదరి నాగ సరోజ మృతి చెందారు. ఈ వార్త కాస్త ఆలస్యంగా వెలుగులోకి వచ్చింది. మంగళవారం ఆమె తుది శ్వాస విడిచినట్టు తెలుస్తోంది. అక్కినేని కుమార్తె అనగానే అందరికీ నాగసుశీల పేరే తెలుసు. కానీ, నాగసరోజ పేరు మాత్రం ఎక్కడా వినిపించదు, కనిపించదు. సినిమా రంగానికి ఆమె ఎప్పుడూ దూరంగానే ఉంటారు. అందుకే ఆమె మరణ వార్త కూడా ఆలస్యంగానే తెలిసింది.
అక్కినేని నాగేశ్వరరావుకి ఐదుగురు సంతానం. సత్యవతి, నాగసుశీల, నాగ సరోజ, వెంకట్, నాగార్జున. సత్యవతి చాలా కాలం క్రితమే కాలం చేశారు. ఇప్పుడు నాగసరోజ అనారోగ్యంతో మరణించారు. అక్కినేని నాగేశ్వరరావు కుమార్తె మరణం అక్కినేని కుటుంబంలో తీవ్ర విషాదాన్ని నింపింది. ఆమె మరణం పట్ల పలువురు సినీ ప్రముఖులు తమ సంతాపాన్ని తెలిపారు.