నోరు మంచిదైతే ఊరు మంచిదవుతుందంటారు. ముఖ్యంగా ఎక్కువగా జనాల్లో నానే సినీ ప్రముఖులు.. తమ నోటిని ఎంత అదుపులో పెట్టుకుంటే అంత మంచిది. ఈ విషయాన్ని ప్రముఖ హీరోయిన్ మృణాల్ ఠాకూర్ గుర్తించలేకపోతోంది. వరుస సినిమాలతో స్టార్ హీరోయిన్ స్థాయికి ఎదుగుతున్న ఆమె.. అనవసరమైన వివాదాలతో తరచూ వార్తల్లో నిలుస్తోంది. (Mrunal Thakur)

ఆ మధ్య బిపాసా బసు గురించి 'మగాడి మజిల్స్ ఉన్న అమ్మాయి' అంటూ కామెంట్స్ చేసి ట్రోల్స్ కి గురైంది మృణాల్. ట్రోల్స్ దెబ్బకి దిగొచ్చి.. బిపాసా బసుకి క్షమాపణలు కూడా చెప్పింది. అయితే ఇప్పుడు మృణాల్, మరో వివాదంలో చిక్కుకుంది. అనుష్క శర్మను కించపరిచేలా పరోక్ష వ్యాఖ్యలు చేసి.. విమర్శలు ఎదుర్కొంటోంది. (Anushka Sharma)

మృణాల్ ఠాకూర్ ఇటీవల ఓ ఇంటర్వ్యూలో పాల్గొనగా.. అందులో ఆమె రిజెక్ట్ చేసిన సూపర్ హిట్ సినిమాల ప్రస్తావన వచ్చింది. తాను కొన్ని సూపర్ హిట్ సినిమాలను వదులుకున్నానని చెప్పిన మృణాల్.. సుల్తాన్ సినిమా పైనా, అందులో హీరోయిన్ గా నటించిన అనుష్క శర్మ పైనా పరోక్ష వ్యాఖ్యలు చేసింది.

"అప్పుడు నేను రెడీగా లేకపోవడంతో ఆ సినిమాను వదులుకున్నాను. అది సూపర్ హిట్ అయింది. హీరోయిన్ కి కూడా స్టార్డమ్ తెచ్చిపెట్టింది. అయితే ఆ సినిమా నేను చేసుంటే.. నన్ను నేను కోల్పోయేదాన్ని. ఎందుకంటే ఇప్పుడు ఆ హీరోయిన్ సినిమాలు చేయట్లేదు. నేను చేస్తున్నాను. ఇది నేను సాధించిన విక్టరీగా భావిస్తాను. ఇన్ స్టాంట్ గా వచ్చిన ఫేమ్.. ఇన్ స్టాంట్ గానే పోతుంది." అంటూ మృణాల్ ఠాకూర్ సంచలన కామెంట్స్ చేసింది.

మృణాల్ చేసిన కామెంట్స్ పై అనుష్క అభిమానులు, నెటిజెన్లు తీవ్రస్థాయిలో విరుచుకుపడుతున్నారు. అనుష్క అవకాశాల్లేక నటనకు దూరం కాలేదని, ఫ్యామిలీ లైఫ్ యాక్టింగ్ కి దూరంగా ఉంటుందని గుర్తు చేస్తున్నారు. అయినా అనుష్క ఎన్నో బ్లాక్ బస్టర్స్ చూసిందని, అలాంటిది తనకంటే సక్సెస్ ఫుల్ అని నువ్వు ఎలా చెప్పుకుంటావని ఫైర్ అవుతున్నారు.

కాగా, అనుష్క శర్మ స్టార్ క్రికెటర్ విరాట్ కోహ్లీని పెళ్లి చేసుకున్న విషయం తెలిసిందే. వీరికి ఇద్దరు పిల్లలు. 2018 వరకు బాలీవుడ్ లో స్టార్ హీరోయిన్ గా సత్తా చాటిన అనుష్క.. ఆ తర్వాత ఫ్యామిలీ లైఫ్ కోసం నటనకు దూరమైంది.