యశ్ రాజ్ ఫిలిమ్స్ స్పై యూనివర్స్ లో భాగంగా తెరకెక్కనున్న 'వార్-2'తో జూనియర్ ఎన్టీఆర్ బాలీవుడ్ ఎంట్రీ ఇవ్వనున్న సంగతి తెలిసిందే. 'బ్రహ్మాస్త్ర' ఫేమ్ అయాన్ ముఖర్జీ దర్శకత్వంలో రూపొందనున్న ఈ సినిమాలో బాలీవుడ్ స్టార్ హృతిక్ రోషన్ తో కలిసి ఎన్టీఆర్ స్క్రీన్ షేర్ చేసుకోనున్నాడు. అయితే ఈ సినిమా అధికారిక ప్రకటన ఇంకా రావాల్సి ఉంది. ఇదిలా ఉంటే ఈ సినిమాలో ఎన్టీఆర్ రోల్ కి సంబంధించి రకరకాల చర్చలు జరుగుతున్నాయి. ఇందులో హృతిక్, ఎన్టీఆర్ ఇద్దరూ హీరోలేనని ఒకసారి.. కాదు ఎన్టీఆర్ విలన్ అని మరోసారి ఇలా రకరకాల వార్తలు వినిపిస్తున్నాయి. ఇక ఇప్పుడు తాజాగా 'వార్-2'లో ఎన్టీఆర్ నెగిటివ్ రోల్ లో నటిస్తున్నట్లు బలంగా న్యూస్ వినిపిస్తోంది.

'వార్-2'లో ఎన్టీఆర్ రోల్ నెగిటివ్ షేడ్స్ తో చాలా పవర్ ఫుల్ గా ఉంటుందట. ఈ పాత్రలో చాలా లేయర్స్ ఉంటాయట. కేవలం 'వార్-2'లో మాత్రమే కాదు.. మొత్తం స్పై యూనివర్స్ కే ఈ పాత్ర చాలా కీలకమట. అందుకే నిర్మాత ఆదిత్య చోప్రా పట్టుబట్టి మరీ ఆ పాత్ర కోసం ఎన్టీఆర్ ను రంగంలోకి దింపుతున్నట్లు తెలుస్తోంది. ఎన్టీఆర్ ఎలాంటి పాత్రలోనైనా యిట్టే ఇమిడిపోతాడు. 'జై లవ కుశ' సినిమాలో రావణ(జై)గా నెగిటివ్ పాత్రలో అదరగొట్టాడు. ఇప్పుడు 'వార్-2'తో తన నటనతో దేశవ్యాప్తంగా ప్రేక్షకులను ఫిదా చేస్తాడు అనడంలో సందేహం లేదు.

ఎన్టీఆర్ ప్రస్తుతం తన 30వ సినిమాని కొరటాల శివ దర్శకత్వంలో చేస్తున్నాడు. ఎన్టీఆర్ పుట్టినరోజు(మే 20) కానుకగా రేపు ఈ మూవీ టైటిల్, ఫస్ట్ లుక్ రివీల్ చేయనున్నారు. అలాగే మే 20న 'వార్-2' అఫీషియల్ అనౌన్స్ మెంట్ వచ్చే అవకాశముంది. వీటితో పాటు ప్రశాంత్ నీల్ దర్శకత్వంలోనూ ఓ భారీ పాన్ ఇండియా ప్రాజెక్ట్ చేయనున్నాడు ఎన్టీఆర్.