English | Telugu
రవితేజతో యుటివి సినిమా లేదోచ్
Updated : Apr 28, 2011
రవితేజతో యుటివి సినిమా లేదోచ్ అని ఫిలిం నగర్ వర్గాలంటున్నాయి. వివరాల్లోకి వెళితే మాస్ మహరాజా రవితేజ హీరోగా, త్రిష హీరోయిన్ గా, బాలీవుడ్ లో సూపర్ హిట్టయిన "బ్యాండ్ బాజా బారాత్" సినిమాని తెలుగులో "చిక్ బమ్ చిక్" పేరుతో రీమేక్ చేస్తున్నారని మీడియా నానా గోలచేసింది. అదీ గాక ఈ "చిక్ బమ్ చిక్" చిత్రాన్ని ప్రఖ్యాత సినీనిర్మాణసంస్థ యుటివి నిర్మిస్తుందని బాగా ప్రచారం జరిగింది. కానీ యుటివి సంస్థ ప్రతినిధి ఒకరు "తెలుగులో మేము అలాంటి సినిమా ఏది చేయటం లేదనీ, అసలా సినిమాకూ మాకూ ఎలాంటి సంబంధం లేద"నీ ఘంటాపధంగా నొక్కి వక్కాణించారు.
ఈ విషయాలేమి తెలియని హీరో రవితేజ పాపం తన మానాన తాను తన "వీర" సినిమా షుటింగులో యమ బిజీగా ఉన్నాడు. రమేష్ వర్మ దర్శకత్వంలో, కాజల్ అగర్వాల్, తాప్సి హీరోయిన్లుగా, గణేష్ ఇందుకూరి నిర్మిస్తున్న చిత్రమే "వీర". ఈ చిత్రం తాలూకు షుటింగ్ ఇటీవల మారిషస్ లో జరిగింది. అక్కడ హీరో రవితేజ, హీరోయిన్ తాప్సీలపై రెండు పాటలను, కొన్ని కీలక సన్నివేశాలనూ చిత్రీకరించారు. ఏప్రెల్ 30 వ తేదీన రవితేజ, కాజల్ అగర్వాల్ పై ఈ చిత్రంలోని పాట చిత్రీకరణకు యూరప్ వెళ్తున్నారు.