English | Telugu
రాజకీయాల్లోకి దిల్ రాజు?
Updated : Apr 4, 2023
సినిమా వాళ్ళు రాజకీయాల్లోకి వెళ్లడం సహజం. ఇటీవల ప్రముఖ నిర్మాత దిల్ రాజు కూడా పొలిటికల్ ఎంట్రీ ఇవ్వబోతున్నారంటూ వార్తలు వినిపించాయి. అయితే దిల్ రాజు మాత్రం రాజకీయాలు తన వల్ల కాదని అంటున్నారు.
దిల్ రాజు ప్రొడక్షన్స్ బ్యానర్ లో రూపొందిన 'బలగం' సినిమా మార్చి 3న థియేటర్లలో విడుదలై ఘన విజయం సాధించిన సంగతి తెలిసిందే. ఓటీటీలోనూ విశేష ఆదరణ పొందుతున్న ఈ చిత్రాన్ని.. కొన్ని గ్రామాల్లో ప్రత్యేక షోలు వేసుకొని మరీ అందరూ కలిసి చూస్తున్నారు. 'బలగం' సినిమా ప్రేక్షకులకు ఇంతలా చేరువ అవ్వడంతో.. తాజాగా మూవీ టీమ్ తో కలిసి ప్రెస్ మీట్ నిర్వహించిన దిల్ రాజు తమ ఆనందాన్ని పంచుకున్నారు. ఈ సందర్భంగా దిల్ రాజు పొలిటికల్ ఎంట్రీకి సంబంధించిన ప్రశ్న ఎదురైంది.
"రాజకీయాల్లోకి రమ్మని నన్ను అడుగుతున్నారు. అయితే వెళ్లాలా వద్దా అనేది ఇంకా నాకే క్లారిటీ లేదు. సినీ పరిశ్రమలో నాపై విమర్శలు వస్తేనే తట్టుకోలేను. రాజకీయాల్లోకి వెళ్లాలంటే మెంటల్ గా ప్రిపేర్ అయ్యి వెళ్ళాలి. అది నా వల్ల కాకపోవచ్చు. దీనిలోనే మీకు కావాల్సిన సమాధానం ఉంది" అంటూ దిల్ రాజు తనదైన శైలిలో పొలిటికల్ ఎంట్రీపై స్పందించారు.