English | Telugu
మహాదేవనాయుడుగా నందమూరి బాలకృష్ణ
Updated : Apr 23, 2011
"మహాదేవనాయుడు"గా నందమూరి బాలకృష్ణ నటిస్తున్నారని విశ్వసనీయ వర్గాల ద్వారా అందిన సమాచారం. వివరాల్లోకి వెళితే శ్రీ కీర్తి కంబైన్స్ పతాకంపై, యువరత్న నందమూరి బాలకృష్ణ హీరోగా త్రిపాత్రాభినయం చేస్తూండగా, లక్ష్మీ రాయ్, సలోని, ఛార్మి హీరోయిన్లుగా, పరుచూరి మురళి దర్శకత్వంలో, యమ్.యల్.కుమార్ చౌదరి ఒక చిత్రాన్ని నిర్మిస్తున్నారు. ఈ చిత్రానికి ఏం పేరు పెడతారాని అంతా ఎదురు చూస్తుండగా, కీర్తి కంబైన్స్ బ్యానర్ మీద "మహాదేవనాయుడు" అనే టైటిల్ ని రిజిస్టర్ చేశారని ఫిలిం నగర్ వర్గాల ద్వారా అందిన సమాచారం.
ఆ టైటిల్ ఒక్క నందమూరి బాలకృష్ణకే సరిగ్గా సరిపోతుందనీ, అది ప్రస్తుతం కీర్తి కంబైన్స్ బ్యానర్ లో నందమూరి బాలకృష్ణ నటిస్తున్న సినిమాలో తాతయ్య పాత్ర పేరనీ అంటున్నారు. అంటే ఈ చిత్రంలో నందమూరి బాలకృష్ణ తాత, కొడుకు, మనవడుగా త్రిపాత్రాభినయంలో నటిస్తున్నారట. తాత "మహాదేవనాయుడు" పాత్ర ఫ్యాక్షనిస్టు అయితే తండ్రి పాత్ర పెద్దమనిషిగా ఉంటాడట. మనవడు పాత్రలో జర్నలిస్ట్ గా నటిస్తున్నాడట. ఈ మూడు పాత్రలూ ఒకదానితో ఒకటి పోటీపడతాయని ఫిలిం నగర్ జనాలంటున్నారు.ఈ సినిమా ఇప్పటివరకూ మూడు పాటల చిత్రీకరణ, అలాగే 30 రోజుల పాటు టాకీ చిత్రీకరణ జరుపుకుందట. ఈ "మహాదేవనాయుడు" చిత్రాన్ని నందమూరి బాలకృష్ణ పుట్టిన రోజైన జూన్ 10 వ తేదీన విడుదల చేయ్యాలని నిర్మాత యమ్.యల్.కుమార్ చౌదరి సన్నాహాలు చేస్తున్నారు.