రీ రిలీజ్ సినిమాలు రూ.10 కోట్ల షేర్ కలెక్ట్ చేస్తేనే గొప్ప. అలాంటిది, రీ రిలీజ్ అవుతున్న ఓ మూవీ.. తెలుగు రాష్ట్రాల్లోనే ఏకంగా రూ.30 కోట్లకు పైగా బిజినెస్ చేస్తే?. ఇప్పుడు 'బాహుబలి' అలాంటి ఫీట్ నే సాధించింది. (Baahubali: The Epic)

'బాహుబలి' సినిమా రెండు భాగాలను కలిపి, ఒక భాగంగా 'బాహుబలి: ది ఎపిక్' పేరుతో విడుదల చేస్తున్న సంగతి తెలిసిందే. అక్టోబర్ 31న విడుదల కానున్న 'బాహుబలి: ది ఎపిక్' కోసం అందరూ ఎంతగానో ఎదురుచూస్తున్నారు. ట్రేడ్ వర్గాలు కూడా ఈ మూవీ రూ.100 కోట్లకు పైగా గ్రాస్ రాబడుతుందని అంచనా వేస్తున్నాయి. అందుకు తగ్గట్టుగానే బిజినెస్ కూడా భారీగా జరుగుతోంది.

నైజాంలో రూ.17 కోట్లు, సీడెడ్ లో రూ.4.5 కోట్లు, ఆంధ్రాలో రూ.15 కోట్లు చొప్పున.. తెలుగు రాష్ట్రాల్లో 'బాహుబలి: ది ఎపిక్' ఏకంగా రూ.36.5 కోట్ల బిజినెస్ చేసినట్లు తెలుస్తోంది. అంటే బ్రేక్ ఈవెన్ సాధించాలంటే రూ.37 కోట్లకు పైగా షేర్ రాబట్టాల్సి ఉంది.

సాధారణంగా నాని, విజయ్ దేవరకొండ వంటి యంగ్ స్టార్ల కొత్త సినిమాలు.. తెలుగు స్టేట్స్ లో ఈ రేంజ్ బిజినెస్ చేస్తుంటాయి. అలాంటిది, ఒక రీ రిలీజ్ మూవీ.. ఈ రేంజ్ బిజినెస్ చేయడం ఆశ్చర్యం కలిగించే విషయమే. అయితే 'బాహుబలి' కాబట్టే ఇది సాధ్యమైందని ప్రత్యేకంగా చెప్పాల్సిన అవసరం లేదు.

'బాహుబలి: ది ఎపిక్'కి సంబంధించిన బిజినెస్ లెక్కలు వింటుంటే.. ఈ సినిమా 100 కోట్లు కాదు, 200 కోట్ల గ్రాస్ రాబట్టినా ఆశ్చర్యంలేదు అనిపిస్తోంది.